Read turkana Sekaria 6 Bible Online

Sekaria 6 - turkana bible

Sekaria 6

¹Ataanyunga ayong akisingolikinet ache. Anakisingolikinet kana, ataanyunga ngaurukukui ngoomwon itorunito napak a ngimoru a ngiarei alu a asuat ananyang.

²Aurukuk na ekingaren, erito ngangolei naarengak. Aurukuk na ngaarei, erito ngangolei nakirionok.

³Aurukuk na ngauni, erito ngangolei naakwaak, ani na ngoomwon, erito ngangolei nakapelo.

⁴ Abu ayong engit emalaikat ngolo atama, “Ekaapaan, nyo eger a ngaurukukui kanu?”

⁵Katatachak ngesi ayong tama, “Eraakasi ngaurukukui nugu ngikuwamea lu eponito alowaitin aluomwon. Ayakasi kesi ngaren Ekapolon Akuj lo epolokinit akwap daang, nakaneni anyout tokona arotokis.

⁶Aurukuk na erito ngangolei nakirionok, alosi lowae lo alokwap ateni Babilonia. Aurukuk na erito ngangolei naakwaak, alosi too. Ani na erito ngangolei nakapelo, alosi kuju.”

⁷Ebunyakina ngangolei nguna asakete alosit akireb akwap. Tama emalaikat, “Kapesi torebo akwap!” Toloto kesi torebo akwap.

⁸ Ani erumor kirema emalaikat kirema tama, “Kingolik a! Ngangolei na aloose Babilonia, esiapakis anyunyura a Ekapolon Akuj.”

⁹Katolimok ayong Ekapolon Akuj akiroit tama,

¹⁰“Tolema ngainakinet na eyaunete ngirikon. Elidai ka Tobija ta Yedaya lu apote alo Babilonia kesi eyaunete ngiboro ngulu. Kape akolongit napei ngina nawi a Yosia, lokookeng a Sepania.

¹¹Akwangat ka egolit lo idiauni iyong anikech, tosubakinea ekiraun sodi kiwaak nakou a emuron aloapolon alo enyaritae Yochua, lokookeng a Yeosadak.

¹²Tolimok ngesi atamar ebala Akuj Namerikanyer kona, ‘Kingolik a, itwaan ni enyaritae Ateni, iniapar ani eyei kaneni, katodukok ayong Ekapolon Akuj akai.

¹³Ngesi eduki akai ngina. Erimae ngesi ani eraakar ekapolon, kiboikin lokicholong keng a apolou, topolok ngitunga keng. Diyete ekicholong a apolou a ekapolon kangolo, iboikin emuron loapolon, tosuba luarei ngulu etich aapei, isilito.’

¹⁴ Iwaakinio ekiraun ngolo kai kang toliwor itamunitere Elidai, ka Tobija, ka Yedaya ta Yosia lokookeng a Sepania.”

¹⁵Ngitunga lu elomito nialonan, epote kingarakis akiduk akai a Ekapolon Akuj. Ani esubakinosi nguna, iyenunete esi atamar Akuj Namerikanyer ngesi kameuni ayong nikus. Esubakinosi nguna daang erai kiwap esi lokojokon etoil a Ekapolon Akuj ana erai Akuj kus.