Read turkana Sekaria 7 Bible Online

Sekaria 7 - turkana bible

Sekaria 7

¹Ekaru lo a nguomwon lo araakar Dario ekapolon, akolongit na ngoomwon a elap alo a ngikan-koomwon (alo enyaritae Kisilep), abu Ekapolon Akuj katolimok ayong Sekaria akiroit.

²Apot ngitunga a ere a Besel tomeasi ngitunga kech kirukosi ka Chareser ta Regemelek, toloto kai a Akuj Namerikanyer akilip Ekapolon Akuj apiaro,

³ka akingit ngimurok a akai a Akuj Namerikanyer ka ngikadwarak akiroit naga, “Ejoikinit kirubakini asutonokin ka aroneenen akimuj elap lo a ngikan loger lo ngoon sek kisubeene a ngikaru a ngikaalak tanang tokona a?”

⁴Katolimok ayong Akuj Namerikanyer akiroit

⁵tama, “Tolimok ngitunga daang a akwap ka ngimurok atamar nakolong aroneeneto kesi tosutonokis elap lo a ngikan ka lo a ngikan-kaarei alokaru alu ngoon tomwon-kaarei a, arai kolong ayong dir aroneeneto a?

⁶Nakolong emujeta kesi tamaase, pearai ibore ngini akimwonut kech a ngikulepek a?”

⁷Ngakiro nguna kesi nakolong kilimokini esi Ekapolon Akuj kisitoru nia ngikadwarak ngirwa lu ajokieta ngakiro daang alo Yerusalem kileleba ngitunga. Ngirwa ngulu, ayakasi ngitunga lukaalak lorerea lu edunyatar Yerusalem, ka ewae lo alokuju ta ngaukon na alo too.

⁸Abu Ekapolon Akuj kesuruor ayong Sekaria katolimok akiroit naga

⁹tama, “Kolong kanuan, adungokini ayong ngitunga kang atama, ‘Totubo ngakiro eriyan, nabo tapataketa tarata lu kisienito luche.

¹⁰Nyiichiakiasi ngapuseru, ka ngide lukokiok, ka ngitunga a akwap anache lu irukito ka esi ta itwaan cha daang ni ibat ngakan. Kori nyeesak itwaan anikus asubea niche naaronok.’

¹¹“Nakaneni apot ngitunga towout akiirar, tobobongo a akisianu kech togolo ngaki kech nyiirareta.

¹²Tonineketa ngitai kech kikokis aput. Towout kesi akiirar akitatamet a Etau a Akuj Namerikanyer na esitorunio lokadwarak lukolong ngorok. Kotere ngakiro nguna, abu Akuj Namerikanyer tongoik kesi.”

¹³Tolim Akuj Namerikanyer tama, “Ani kona anyaraa ayong kesi towout akiirar, abu ayong atowou akikere nakanyaraata kesi ayong.

¹⁴Nakaneni abu ayong atopeta kesi kirukosi ka ekuwam lo ipiripiri topetakin lobukui lusek peayenete kesi. Ani erotokinete kesi, kidong akwap erai alaireng, tongop itwaan etoronor kaneni. Ee robo, akwap nasek kebusean abu toliwor alaireng.”