Read turkana Sekaria 8 Bible Online

Sekaria 8 - turkana bible

Sekaria 8

¹Katolimok ayong Akuj Namerikanyer akiroit

²tama, “Kaminarit ayong Yerusalem lokojokon noi, nabo anyunyurikina ayong ngimoe keng lokojokon.

³Abonguni ayong Yerusalem, emoru kang lo italeuno, eboikin neni. Enyarao ere a Yerusalem, Ere lo emunoi, emoru a Akuj Namerikanyer, enyarao emoru lo italeuno.

⁴Ngikasukou ka ngakimak, ingolikinio nabo ibooyete alorotin a Yerusalem, etingit ipei kech daang aburo na ichogaa kotere amojongu.

⁵Ilelebunosi ngide lusapa ka lupesur lorotin a ere toboliata.

⁶“Alotunga alupiyayek, esibit ngakiro nugu nyesubakinosi. Ani anikang, esubakinosi.

⁷Ayuuni ayong ngitunga kang anakwap ana alo kide ka na alo too,

⁸etolom lore a Yerusalem. Eliworosi kesi ngitunga kang, atoliwor ayong Akuj kech. Apolokini ayong kesi arai lokamunoi atarai lo etiriyanit ngakiro.

⁹“Totitinyeketo! Ipupete tokona esi ngakiro nakolong kilimokinete ngikadwarak ngirwa lukolong esiakinere adupakin ngateak a akai kang na abongokinere akiduk akai a Akuj Namerikanyer.

¹⁰Ani eringa ngirwa ngulu, amam itwaan asaki akirumun itwaan kitusub etich tamam egielit a ngibaren. Amam ekisil ani a ngimoe kainyo abu ayong eteremok ngitunga daang.

¹¹Nakaneni napei tokona jik, nyasubea ayong ngitunga lupiyayek alotunga kalu ngakiro nakolong asubea luche.

¹²Ayauni tokona ayong ekisil nakwap. Etepi akiru loger lopalem sek, tokoko ngamanat, taraa ngamusabib. Etaanyuni ayong lupiyayek alobukut kalo nguna daang tarata ngakech.

¹³Esi ngitunga a Yuda ka Isirael! Ngirwa lu ngoon adaunosi, ikote esi ekitetemes a ngitunga alu ilamitae alobukui. Nakaneni kayuuni tokona ayong esi, toliworos ekitetemes a ngitunga alu epiaritae. Nyieam robo, totitinyeketo!”

¹⁴Ebala Akuj Namerikanyer kona, “Nakolong ketongoeta ayong taapaakus, abu ayong atotiaku asubea kesi ngakiro naaronok, atowou akiloch ngatameta kang, tongop kona kesieniyete kesi ayong.

¹⁵Aloger alopei kangolo, atiaku ayong asubea ere a Yerusalem naajokak ka ngitunga a Yuda aapei. Kotere nguna, totitinyeketo!

¹⁶Ngakiro nugu ejoikinit esi isubete, tolimok ipei kus daang itwaan niche ngakiro na iteni. Ani ngikatubok ngakiro kus, tarata jiik etubete ngakiro eriyan, ngakiro na eyaunete ekisil.

¹⁷ Nyiituk asubea niche naaronok, nabo nyiiminak akikong kotere alioko, kainyo aremokino ayong Ekapolon Akuj nguna.”

¹⁸Akuj Namerikanyer, abu katolimok ayong Sekaria akiroit tama,

¹⁹“Aroniet akimuj na elap alo a nguomwon ka na elap alo a ngikan, ka na elap alo a ngikan-kaarei ta na elap alo a ngitomon, eliworosi ngisukukui a alakara ka akimaritetere alotunga a Yuda. Kotere nguna, tominakisi ngakiro na iteni ka ekisil.”

²⁰Ebala Akuj Namerikanyer kona, “Epote ngirwa lu eponeta ngitunga a ngirerea alukaalak[3] Yerusalem.

²¹Elimokinete lu eponito alore a epei lu eponito alore aloche tamasi, ‘Kilipi sua Akuj Namerikanyer atolimokisi atamar kisaki apiaro. Potu apana!’

²²Ee robo, epote ngitunga lukaalak ka ngibukui lukajwok Yerusalem akilip ayong Akuj Namerikanyer esakete apiaro.

²³Ngirwa ngulu, ngitunga ngitomon a ngakwapea anache, epote Loyaudit epei tamasi, ‘Kisaki sua erukosi ka esi, kainyo kiira atamar irukito esi ka Akuj.’ ”