Read turkana Sekaria 9 Bible Online

Sekaria 9 - turkana bible

Sekaria 9

¹ Elimunit Ekapolon Akuj akiroit na ebala, “Erirae ayong akwap a Adirak ka ere a Damasko. Ere loapolon a akwap a Siria, erai eka Ekapolon Akuj loger a ngitela a Isirael kadaang.

²Ere a Amas dang, lo eyei lokukuoru a Adirak, erai ekeng. Ngirerea a Tiro ka Sidon dang ka aosou kech, eraakasi ngikeng.

³Aduko ngitunga a ere a Tiro ngawasea naapolok na eyuunotor, asenokis akwangat etia apua ka egolit lo etia asakatan alorotin.

⁴Nakaneni kingolik a, elemari Ekapolon ibore a Tiro daang, tachakak ebari keng nanam, sodi kinom ere.

⁵ “Eemi ere a Achikelon na eanyungarea nguna. Ani Gasa, kibelebel eriaba. Ee robo, tani Ekiron, kainyo engopete nguna igieno ngesi. Etubor apolou alore a Gasa, tongopa ngitunga alore a Achikelon.

⁶Ngitunga lu inyialakina ngajul kesi elomete Achidod. Atubori ekinis a Ngipilisti.

⁷Achakari anakituk kech akiring na eyakasi ngaakot, atodema alokel kech akimuj na italeo akinyam. Eliworosi lupiyayek ngitunga kang, kikokis emachar epei alo Yuda. Ngitunga lua Ekiron, ikokinete Ngiebus.[4]

⁸Ayong alope etee akwap kang, eratak ngasigerea nyeetubonorosi kaneni. Emam ekechiekiaran eringa ebuni lotunga kang, kainyo engolik tokona a ngakonyen kang eger lo aboliare kesi.”

⁹ Ee ngitunga a Sion, talakaros kichurokis! Ee ngitunga a Yerusalem, kiremasi lokojokon! Kingolikisi a, ebunit ekapolon kus, ebunit ichuruno ani edwangea! Nakaneni epalaana, edokit esikiria, isikiria ni erai itasikiria.

¹⁰Etubori ngaurukukui a ejie alo Isirael. Tolema ngangolei a ejie alo Yerusalem. Ebilibilaario ngakwaaras na ejiere. Isisili ngesi ngibukui. Epetakin apolou keng wadaang, napei ananam a apei tanang nache. Epetar napei anangolol a Eupurate tanang losal a akwap.

¹¹ Ebala Ekapolon Akuj kona, “Kotere achamunet nakichamakin ayong ka esi, achamunet na eyookinio a ngaakot, alakakini ayong ngitunga kus anarikonot ana ikoni aaut na emam ngakipi.

¹²Esi ngirikon lu ianyut ibore ni igienosi, tobongutu nawasea kus nakaagongok. Kalimokinit tokona atamar kabuakini naajokak ngabuakinet ngaarei.

¹³Kainyo akudok ayong Yuda loger a akau kang. Etiliwo Isirael ngimalea kang a amod. Etiliwori Sion akwara etijio ngitunga a Giris.”

¹⁴Ee robo, eriki Ekapolon Akuj ngitunga keng. Egumari ngimalea keng loger a akimilea. Ekapolon lo erai Ekapolon Akuj, ekutakini aburuch, kirukut ka ekuwam lo ipiripiri, lo ekutunit alokuju.

¹⁵Akuj Namerikanyer, itee ngitunga keng. Emunyarete ngitunga ngulu ngimoe kech. Iwangakinete kesi alojie, loger a ngitunga alu irakarit epurot, kiyesasi ngaakot a ngimoe kech. Eleleunete loger a ngaakot a ngakipeyos, ana ebukunio anatubwa tobukokinae lokeno a ngakipeyos.

¹⁶Akolongit ngina, Ekapolon Akuj na erai Akuj kech, eyuuni kesi, loger lo eyuunea ekeyokon esipanit keng. Imaunete kesi anakwap keng loger a asir ana eyei lokiraun.

¹⁷Ee robo, ejoker wadaang a akwap kibuser! Edwarunete ngisapa ka ngapesur kotere alalau a akimuj ka emuna lokitetet.