Read turkana Malaki 1 Bible Online

Malaki 1 - turkana bible

Malaki 1

¹Eraakasi nugu ngakiro a Akuj na adwario kotere Isirael, tolimo Malaki.

² Ebala Ekapolon Akuj kona, “Kamina ayong esi jiik. Nakaneni ingitasi esi ibalasi, ‘Kimina iyong sua kwaai?’ ” Tatachu Ekapolon Akuj tama, “Ikwa pearai Esau lokaatokeng a Yakobo a? Abu ayong atominak Yakobo

³atoremokin Esau. Enyasu ayong akwap keng na ngimukur etiliwo aka ngikolowoi alu a ariet.”

⁴Ani kelimut Ngiedomae lu eraakasi ngalesea a Esau tamasi, “Enyasun ngirerea kosi, nakaneni kibongokini sua akiduk.” Elimuni Akuj Namerikanyer tama, “Kimiekisi kesi tobongokis akiduk, ayatari ayong nabo. Kiruorotor ngitunga kesi tamasi, ‘Akwap aronon, ngitunga lu enyunyurikina Ekapolon Akuj jik.’ ”

⁵Esi Ngisirael, ingolikinete esi ngakiro nguna a ngakonyen kus a ngikulepek, sodi tolimut tamasi, “Epol Ekapolon Akuj napei anakwap a Isirael tanang nakwapea nache!”

⁶Elimokinit Akuj Namerikanyer ngimurok ebala, “Ekerit ikoku apakeng, ani ekasuban etich ekerit ekapolon keng. Ani karai ayong apakus, nyo bo pekikeritotor esi ayong? Ani karai ayong ekapolon kus, nyo bo pekikeritotor esi ayong? Tatachutu mono esi ngimurok lu kimenyarito ayong! Ingitasi esi ibalasi, ‘Kimenyarit sua iyong kwaani?’

⁷Kimenyarito esi ayong ani kilemanakineta ngakipeyos a akimuj ana inyasuna. Nakaneni ingitasi esi ibalasi, ‘Kinyasu sua ngakipeyos kwaani?’ Inyasut ani imenyaritotor ekeno a ngakipeyos kang.

⁸ Na irikunioto esi ibarasit nimuduk akipeyore, ikwa meere ibore ngini akiroit aronon a? Nabo a, na irikunioto esi ngibaren luangwalak ka lu edeakasi kipeyokis ayong, ikwa meere ibore ngini akiroit aronon a? Kirumak iyong ekapolon kon ibarasit ni ikoni ngini, nyejoikinete ngesi ngakiro kon, kori nyikiminakini ngesi iyong.”

⁹Tokona bocha esi ngimurok a Akuj, kilipa Akuj Namerikanyer sodi tojoker ngesi aniyok. Ani kitingito esi akipeyos na ikoni ngina anakan kus, eminakini ngesi tani ipei kus dir a?

¹⁰Ebala Akuj Namerikanyer kona, “Arai bo toyei ipei kus dang ni egoli ngidorin a akai a Akuj, nyiinokakineta esi akim pas alokeno kang! Nyakajoikinito ayong ngakiro kus, kotere ngakiro nguna, nyachamuni ayong ngakipeyos anakan kus.

¹¹Ngitunga a ngibukui kadaang anakwap, napei anajipunet a akolong tanang nadooyoret, ituruunito ekiro kang. Kenomanakinete kesi ayong emitina awadaang enyarito ekiro kang, nabo kepeyonokinete ngakipeyos na ikiuna, kainyo ituruunitoe ekiro kang anikech.

¹²Nakaneni nyikikerito esi ayong na ibalatar erai ekeno kang epasit, kimenyarito ngakipeyos na ipeyoenete esi kaneni.

¹³Ibalasi esi, ‘Kituburut sua ngakiro nugu lokojokon,’ toliworos kinyaiyonorete ayong. Kirikonokinete esi ayong ngibaren lu ianyunete a erukoonu, kori lukangwalak kori lukadeakak. Ekoe, isakete esi ayong atolema ngibaren ngulu anakan kus a? Ayong Akuj Namerikanyer alimu nguna.

¹⁴Ilamam ekaliokon lo eyei ibarasit nikile losipanit keng, kikong ngesi atamar alemikini Ekapolon, ani erumor kipeyok ngesi ibarasit ni eyei akemer. Kingolik a, arai ayong ekapolon lo apol noi, nabo ekeritae ekiro kang alobukui kadaang. Ayong Akuj Namerikanyer alimu nguna.”