Read turkana Malaki 2 Bible Online

Malaki 2 - turkana bible

Malaki 2

¹Akuj Namerikanyer elimokinit ngimurok ebala, “Ee ngimurok, kadungokinit tokona ayong esi kona.

²Ejoikinit esi kikerete ayong a ngakiro ana isubete. Ani pekiirasi esi ngakiro kang, ayauni ayong ngilam nikus. Elami ayong ngiboro lu ianyunete esi toyareta. Iteni dir, elam kolong ayong ngiboro ngulu kainyo nyirichakinito esi ngakiro kang alotai kus.

³Kingolikisi a, erirae ayong ngide kus, ani esi ngikulepek, kachakea ngawar a ngibaren alu ipeyoenete esi loreetin. Ketwarakini ayong esi anikang.

⁴ Eger ngolo iyeneta esi atamar kainak ayong esi etal logo, torubea achamunet kang jik nakolong kichamakin ayong ka esi ta ngalesea a Lawi.

⁵“Anachamunet ana Ngilawi kangina, echikakini kolong ayong kesi akiyar ka ekisil. Etaanyu ayong kesi nguna, katorimatar ayong. Ngirwa ngulu, toliworos kesi lu karimasi ayong, katokear.

⁶Ngakitatamet na iyookino etorunito nakituk kech. Emam na ichwangakina na etorut nangajepa kech. Eruko ayong ka kesi a ekisil ka ateneanut. Toreeut kesi lukaalak anakisech.

⁷Ejoikinit ngimurok itatamete aosou a Akuj na iteni. Toloto ngitunga nikech akitatama na asaki ayong, kainyo eraakasi kesi ngimeanara a Akuj Namerikanyer.”

⁸Ebala Ekapolon Akuj Namerikanyer kona, “Nakaneni ireasi tokona esi ngimurok alorot, ilegeut esi ngitunga lukaalak kotere ngakiro na itatamete esi. Isecha esi achamunet nakolong kichamakin ayong ka Lawi.

⁹Ayong dang, emiekini Ngisirael kimenyarete esi kisuruma ngileech kainyo nyiwapa esi ngirotin kang. Nabo ipot esi kipakasi ngitunga ngiche nyiitatam etal eriyan.”

¹⁰Ekoe, ikwa meere apayok epei a? Ikwa meere kolong Akuj apei kisubuni ngoni daang a? Ani nyo kichwangakinea ngoni achamunet nakichamakinor ngoni, emenyarito achamunet na kolong achamakin Akuj ka taapaayok?

¹¹Echwangakis ngitunga a Yuda achamunet nasek achamakina ka Akuj kech. Asuba kesi alo Isirael ka Yerusalem ngakiro nakikadakinete. Enyasu Yuda akai a Akuj, na emina Ekapolon Akuj. Eutasi ngikiliok ngaberu na ilipito ngakujo nagelayek.

¹²Kimiekisi Ekapolon Akuj tolema alotunga a Isirael, itwaan ni esubi ngakiro naaronok nguna. Warasi ngesi nabo nyeeyau ngakipeyos na eyauni ebukut yok nia Ekapolon Akuj Namerikanyer.

¹³Ibore nabo iche isubete esi en. Ilelebete esi ekeno a Ekapolon Akuj ngakiyo ani igorotor esi tokunuas, kainyo nyeringa ngesi echamuni ngakipeyos na iyaununete esi.

¹⁴Ingitasi esi ibalasi, “Nyope echamunea ngesi?” Erai ni eyenea Ekapolon Akuj atamar erai ngesi ekaanyunan a achamunet ana kolong ichamakinosi iyong ka aberu nakolong iusi iyong isorokana. Idepa iyong achamunet nakolong ichamakinosi ka ngesi, tarai kolong ikongi iyong alongaren Akuj atamar iliwor lo imuno ngesi.

¹⁵Ikwa kolong pekitiliwori Akuj esi luarei etau epei ka akwaan apei a? Ikwa meere kolong Akuj apei kisubi ngoni kiteyar kotere akianget keng a? Ekoe, nyo kolong asaki ngesi asubea nguna kongina? Asubi ngesi kongina atourieta ngoni ngide lu eraakasi dir ngitunga a Akuj. Kotere nguna, kirichakisi atamar emam tani ipei ni edepari achamunet na kolong achamakinosi ka aberu na eusi alosorokane keng.

¹⁶Ebala Ekapolon Akuj na erai Akuj a Isirael kona, “Aremokino ayong elakit. Aremokino ayong eger lo emoitanikinea ekile aberu keng. Wara nyiidepa achamunet kon nakolong ibalar iyong iliwor lokimuno aberu kon.”

¹⁷Ituburut esi Ekapolon Akuj a ngakiro kus. Tani ikoni neni, ingitasi esi ibalasi, “Kitubur sua ngesi kwaani?” Ituburut esi ngesi ani ibalatar, “Itwaan daang ni esubi naaronok, ejoikinit Ekapolon Akuj, nabo emina Ekapolon Akuj ngesi.” Kori ani ibalatar, “Aliwae eyei Akuj a ngakiro ana eriyan?”