Read turkana Malaki 3 Bible Online

Malaki 3 - turkana bible

Malaki 3

¹ Tatachu Ekapolon Akuj Namerikanyer tama, “Kingolik a, ameari ayong emeanara kang kengarenik ayong tolot asubakin erot kang. Ekapolon lo isakete esi, ebuni kai keng atipei. Emeanara lo kimuit esi akingolikin, ebuni tolimo achamunet kang.”

²Ngae epedori anaikin akolongit na ebunio ngesi? Ngae epuun na etakanunea ngesi? Ikokini ngesi akim na itosegi ngasua. Ee robo, ikokini esabuni a ekelotan ngiworui.

³Ebuni ngesi akirirare loger a itwaan ani itosegi ka akiput akwangat. Italeuni ngesi ngimurok kikiunos, loger lo itosegea eketiakan akwangat ka egolit. Italeuni ngesi ngimurok, yauneta nia Ekapolon Akuj ngakipeyos na itemokino.

⁴Ani ikokini neni, ngakipeyos a ngitunga a Yuda ka Yerusalem, ejoikinete Ekapolon Akuj loger lokolong ajoikinitotor a angorot.

⁵Ebala Ekapolon Akuj Namerikanyer kona, “Ani erumor ataapuu ayong nikus kerira. Nyamamakini alimor ngakiro a ngikapilak, ka ngikalomak, ka ngikengalak, ka lu emodeenete ngikasubak etich kech itanyamete ngaropiyae, ka lu eboliatar ngapuseru, ka ngikokiok, ka lu eboliatar ngitunga a akwap anache ta daang lu nyakakerito ayong.

⁶“Ni araakar ayong Ekapolon Akuj na nyelocho ngesi eringaakar esi ngalesea a Yakobo nyemunyara.

⁷Ireasi esi alotalio kang iwout akiwap loger lokolong areatar taapaakus. Tokona, tobongutu nikang, katobongok ayong esi. Nakaneni ingitasi esi ibalasi, ‘Kikokini sua kibonguni nikon ai?’

⁸Kengisit ayong esi abala, ‘Epedori itwaan akoko ngiboro a Akuj a?’ Mam jik. Tani kikoni neni, ikokoa esi ngiboro kang. Ingitasi esi ibalasi, ‘Kikoni sua kikokoi ngiboro kon ai?’ Ikokoyete esi ngiboro kang analemunet a apei anatomon ta ngadekon kus nache.

⁹Ani kona ikokoeta esi ngiboro kang, elam ebukut kus daang etia ni etia.

¹⁰Yautu alemunet apei anatomon na itemokino lokeru kang, minio akimuj kai kang. Toroae ayong a eger kangolo, kingolikis pekangaari ngipidinga a adis katobukok esi apiaro nakaalan noi.

¹¹Ekilakini ayong ngikur lukanyamak ngalemet kus sodi nyiinyasut nabo. Erayete ngimusabib kus kigononoto.

¹² Toliworos ngibukui daang ebalasi kipiaritae esi, kainyo eliwor akwap kus akwap a ajokon.”

¹³Ebala Ekapolon Akuj kona, “Kiruorotor esi ayong niaronon, tabalas ‘Anukiro kiruoror sua iyong?’

¹⁴Ibalasi esi, ‘Erai akisub etich a Akuj akituburuna pas. Nyo kianyuni ngoni erai kiwap ngakiro na elimunit ngesi, kori nyo kianyuni erai kidodik ngesi atamar kiriangakina ngoni ana kisub?

¹⁵Abe kitee bo ngoni atamar ngitunga lukenisak kesi epiaritae. Meere ajako bon eanyunito ngitunga luaronok, pearai tani na iningioto kesi Akuj, tobucharos.’ ”

¹⁶Apot ngitunga lu ekerito Ekapolon Akuj kiana make, kiira Ekapolon Akuj ngakiro na eanete kesi. Kiwaakinae akitab ngaren Ekapolon Akuj, kigirae ngakiro a ngitunga kadaang alu akerito ngesi, toriakas.

¹⁷Ebala Ekapolon Akuj Namerikanyer kona, “Eliworosi kesi ngikang dir akolongit na anyounio ayong atosubak akiroit. Kesieniyete kesi ayong, loger lo isieniyo apa lokookeng lo esubi etich keng.

¹⁸Topedoreta ngitunga kang nabo akiyen ibore ni etiakit itwaan ni etenoono ka niaronon, itwaan ni esubi etich a Akuj ka ni nyesubi etich a Akuj.”