Read turkana Matayo 10 Bible Online

Matayo 10 - turkana bible

Matayo 10

¹Tanyarau Yesu ngirukitos keng lutomon ka ngiarei tochunak wapei, sodi kitogogong kesi topedoreta akitwarakin ngipean ka akitangalekin ngidekesinei ka ngilekesinei daang.

²Ngirora a ngimeanara alutomon ka ngiarei kesi lu: lo ekingaren ngesi Simon (lo anyaritae Petero) ka lokaatokeng Andirea, Yakobo ka lokaatokeng Yoana lu araakasi ngide a Sebedayo,

³Pilip ka Bartolomayo, Tomas ka Matayo loketubukon echur, Yakobo lokookeng a Alipayo ka Tadayo,

⁴Simon lo a atukuoru enyaritae Salote, ta Yuda Isikariote lo arikokini Yesu ngitunga.

⁵Tomea Yesu lutomon ka ngiarei lugu kichikak tama, “Nyiiloto nakwapea a ngibukui alu nyerai Ngiyaudi kori lorerea a Ngisamariae.

⁶Erai ejoikinit iloose lotunga a Isirael lu ikote ngamesekin na echakara.

⁷Iloose kitatama ibalasi, ‘Aapuu Apolou a Akuj.’

⁸Kitojoka lu edeakasi, kiteyarutu lukatoak, kitangalekisi lu a enomokere, kitwarakisi ngipean. Iriamut esi pas, kongina pei kipotosi esi dang pas.

⁹Nyiitinga ngaropiyae alochuei a ngiworui kus.

¹⁰ Nyiitinga echue lo ilipanarotor analosit kus, kori ngamuk, kori aburo, kori nyiilemasi eworu eche. Ejoikinit ekasuban etich einakinio ibore ni esaki.

¹¹“Nainangeta esi lore kori nadakar, tasaka keyei itwaan ni echamit akitepeyon esi, kiboikinos ka ngesi tanang akolongit na inyouneto kaneni.

¹²Na ilomareta esi kai, tamasi, ‘Min ekisil nikus’.

¹³Ani kitepeyon esi ngitunga a akai kangina, kitemokin emalas lota kus a ekisil. Ani pekitepeyon esi, tobuasi emalas kus.

¹⁴Nakaneni ani keya ngitunga a awi kori ere lu nyikitepeyonete kori nyikipupokinete esi, torotokisi kaneni tokurwosi ngalup a ngakejen akamaluwot kidodiu ibore ngini atamar esechito kesi.

¹⁵ Kalimokinit ngakiro na iteni atamar, akolongit na a Eriras isieniyete Akuj ngitunga a Sodom ka Gomora, kidwang ngitunga a ere kangolo.

¹⁶“Topupokisi, kamearit ayong esi loger a ngamesekin ana eya kiding ngipeei. Ejoikinit esi iliworosi lukachwaak loger a ngimunio nabo lukaalimok loger a ngakurio.

¹⁷Tochoikinos alotunga kainyo eya lukirumunete esi kitorikosi nitubet ngakiro nabo kibungaate kesi esi anakais a Atuk.

¹⁸Kirikorio esi kititae alokarikok ka ngikapolok sodi tolimokineta esi kesi ka lu nyerai Ngiyaudi Ngakiro Naajokak a Akuj.

¹⁹Nakirikorere esi akititare, kuriasi ngakiro nyeeriab ngitai kus atamar anukiro ilimunete, kori ilimunete kwaai. Naenangea esaa ngolo, tolimutu nakitoodikinio esi atamar tolimut.

²⁰ Kainyo ngakiro na ilimunete esi meere ngakus, erai ngaka a Etau ka Apakus.

²¹“Ipotorete ngitunga ta lokaatokech taarae nabo taapa ipotorete ngide kech loger ngolo. Enyoikinete ngide ngikauriak kech kipotosi sodi taarae.

²²Kiremokinosi esi ngitunga daang kotere ayong. Nakaneni ngini enaikini tanang losal, eyuunio.

²³ Ani kiboliatar kesi esi alore a eche, toloto lore loche. Kalimokinit iteni dir atamar, nyirumorete etich kus alorerea a Isirael kadaang eringa Lokookeng a Itwaan nyebonguno.

²⁴“Emam ni itatamio ni idwangit eketataman keng, kori emam ekasuban etich lo idwangit ekapolon keng.

²⁵ Itemokino ni itatamio ikwaanikin ka eketataman keng, kori ekasuban etich ikwaanikin ka ekapolon keng. Ani kenyaritae ekapolon a awi Beelsebul, enyarao ngitunga a awi kangina a ngirora aluaronok noi.

²⁶“Nakaneni nyiikear ngitunga kainyo emam ibore ni erapap ni nyileereuni, kori emam ibore ni idaitae ni nyetakanuni.

²⁷Ngakiro nakalimok ayong esi anaribu tolimosi esi anakicha, nabo nguna iirasi esi iruoroe imunonitae kikeutu esi anatuk.

²⁸Nyikear ngulu earete akwaan bon nakaneni nyepedorete akiar etau. Ejoikinit kikeri lo epedori akinyasun akwaan ka etau ananam ana a akim.

²⁹Egielio tanangolengor ngaarei a adurur, nakaneni emam tani ipei kech ni echakakin nalup peeyeni Apakus.

³⁰Imarunitae tani ngitim daang anakies kus.

³¹ Nakaneni nyieam! Ijokak esi noi idwangito ngikieny ngulu lu elalak.

³²“Itwaan cha daang ni elimori alongaren ngitunga atamar arai ngesi itwaan kang, alimori ayong dang ngesi alongaren Apakang alo eyei nadis.

³³ Nakaneni itwaan cha daang ni epegi alongaren ngitunga atamar meere ngesi itwaan kang, apegi ayong dang alongaren Apa kang lo eyei nadis atamar nyayeni ngesi.

³⁴“Nyiitamasi robo kori abuni ayong ayaun ekisil nakwap. Mam! Nyabunit ayong ayaun ekisil pearai arem.

³⁵Abunit ayong akiteremokin lusapa ka ta apakech, lupesur ka taito kech, ngaterak ka taata kech.

³⁶ Ngimoe luaronok a itwaan kesi ngitunga lupei a awi keng.

³⁷“Nyitemokino itwaan ni emina apakeng ka itiokeng noi akidwang ayong eliwor erukitos kang. Nyitemokino ni emina lokookeng kori nakookeng kesidwang ayong eliwor erukitos kang.

³⁸Nyitemokino itwaan ni nyiwoki apir keng kewapak ayong eliwor erukitos kang.

³⁹ Itwaan cha daang ni esaki akirichun akiyar keng, ebukori, nakaneni ni ejali akiyar keng kotere ayong, irichuni.

⁴⁰“Itwaan cha daang ni kitepeyoni esi, ketepeyon tani ayong, nakaneni ni ketepeyoni ayong, etepeyon tani lokolong kameuni ayong.

⁴¹Itwaan cha daang ni itepeyoni emeanara a Akuj ani eraakar ngesi emeanara a Akuj, emorete ka ngesi ebachit keng. Itwaan cha daang ni itepeyoni itwaan niajokon ani ejokia ngesi, emorete ka ngesi ebachit keng.

⁴² Kalimokinit ngakiro na iteni atamar, itwaan cha daang ni itamasi epei a luuchik kalu ngakipi ani eraakar erukitos kang, eriamuni ngesi ebachit keng.”