Read turkana Matayo 11 Bible Online

Matayo 11 - turkana bible

Matayo 11

¹Na arumorea Yesu akichikakin ngirukitos keng lutomon ka ngiarei ngakiro nguna, torotok kaneni tolot akitatam alorerea alu ayakasi diye neni.

²Na eirarea Yoana Ekebatisan alojela ngakiro na asubi Kiristo, tomea ngirukitos ngiche nia Kiristo.

³Apot kingita Yesu tamasi, “Iyong ngesi lokolong abala Yoana ebuni kori ejoikinit sua kidari itwaan iche?”

⁴Tatachak Yesu tama, “Tobongosi tolimokisi Yoana na iirasi ka na ingolikis.

⁵Ngimuduk engolikis akwap, ngikangwalak eloose, lu edeakasi enomokere etangalekin ajoketa, ngikinim epupete, eteyarun ngikatoak, ani ngikebootok itatamio tokona Ngakiro Naajokak.

⁶ Epiarit Akuj noi itwaan ni nyeketongoyae ayong.”

⁷Ani eringa ngirukitos a Yoana eloose na abongoreta, tolomak Yesu akisiruor asepich a ngitunga ngakiro a Yoana ebala, “Nailooso esi nia Yoana na ayakar nariet, isakete esi akingolikin nyo? Akuyen na eloiloi ekuwam a?

⁸Nyo ilosito esi akingolikin? Itwaan ni anapit ngiworui lukaanikak esiritoe a? Toyena atamar lu enapito loger ngolo ibooyete anakais a ngikapolok.

⁹Tolimokinae kare, nyo kolong isakete esi akingolikin? Ekadwaran a Akuj a? Ee, nakaneni kalimokinit atamar ingolikis esi lo idwangit tani ekadwaran a Akuj.

¹⁰Kainyo Yoana ngesi lo elimunit Akuj anagiran ebala: ‘Ngesi erai emeanara kang, ameari ngesi kingarenik iyong tolot tosubak erot kon.’

¹¹Kalimokinit ngakiro na iteni atamar, alotunga kadaang alu edoun nakanuan, emam lo epolot idwangit Yoana Ekebatisan. Tani ikoni neni, ngini edit noi apolou a Akuj, epolot akidwang Yoana.

¹²Napei kolong isiakini Yoana Ekebatisan akitatam tanang akolongit na, aliwor apolou a Akuj aka a ekurikur nabo itepegio, nabo eningo ngikadedengak alemar a ekileenu kech.

¹³Kolong eringa ngirwa lu a Yoana, eruorosi ngikadwarak a Akuj daang nabo egiritae Lotal a Musa ngakiro a apolou a Akuj.

¹⁴Ani kisakete akinup ngakiro na eruorosi kesi, Yoana ngesi Elija lo adwaritae atamar ebuni.

¹⁵ Ani keya ngaki, kiira robo.

¹⁶“Tokona, nyo esikwaanea ayong ngitunga a ngirwa kalu? Ikote kesi ngide lu ibooyete anagielet a ngiboro. Enyaraate epewae kech luche tamasi,

¹⁷‘Kikutakini sua aburuch, nakaneni nyimwomworikina esi. Kisutonokini sua nakaneni nyikalouno esi’.

¹⁸Na abunio Yoana, aroneene nabo nyeemasi emuna lo epuritoe, tamasi ngitunga daang ekoporito ngesi ngikerep.

¹⁹Na abunio Lokookeng a Itwaan, emuji nabo tamasi, tama itwaan daang, ‘Kingolikisi itwaan en! Edakana ngesi nabo ematana emuna lo epuritoe, erai nabo epae a ngiketubukok echur ka ngitunga luasechak’. Nakaneni aosou a Akuj eyenunio atamar erai na iteni alotichisio keng.”

²⁰Kikilak Yesu ngitunga a ngirerea alu kolong asubea ngakitoodikinet nakailiilok kainyo awounete akilung ngasechesea kech.

²¹“Oitiakoi! Abe etioko nginyas eanyunete ngitunga a Korasin ka Betisaida dang! Kainyo arai kolong tosubae ngakitoodikinet nakailiilok na asubasi anikus alo Tiro ka Sidon, kenapito kesi ngiworui lukoris nabo tojuko ekuron kidodiunotor atamar alunga kesi ngasechesea kech.

²²Kalimokinit ngakiro na iteni atamar isieniyete Akuj ngitunga a Tiro ka Sidon akolongit na a Eriras akidwang esi.

²³Esi ngitunga a Kaperinaum! Isakete esi tanang ekipur kus kidiama nadis a? Kichakakinio esi tooma nanam na a akim. Kainyo arai kolong tosubae ngakitoodikinet nakailiilok na asubasi anikus alo Sodom, keringa ere ngolo eyei tani tokona.

²⁴ Kitamutu iteni atamar isieniyete Akuj ngitunga a Sodom akolongit na a Eriras akidwang esi!”

²⁵Esaa ngolo tolim Yesu tama, “Apa, Ekapolon a adis ka kwap. Kabuakinit iyong alakara kainyo idodik iyong lu nyeosok ngakiro na idaitae ani eyakasi lukebe a ngakies ka lukoosok.

²⁶Kongina Apa, isub iyong nguna daang loger lo ichamitor iyong alope a ajokis kon.

²⁷ Kainaki ayong Apakang ngiboro daang. Emam itwaan eyeni Lokookeng atamar ngesi ngae, mati Apa, nabo emam itwaan eyeni atamar Apa ngesi ngae mati Lokookeng kangulu daang esaki Lokookeng akidodikin Apakeng.

²⁸“Potu nikang esi daang lu kinuit eegos, kesiangari ayong esi.

²⁹Kiwoko eegos kang, kitatamas anikang kainyo apalaana ayong nabo etiditeuna nakaneni iangarete esi.

³⁰ Kainyo eegos lo kainakini ayong esi eook, nabo ngolo kesiwoki ayong esi, ebeben.”