Read turkana Matayo 12 Bible Online

Matayo 12 - turkana bible

Matayo 12

¹Ngirwa ngulu kitoro Yesu ka ngirukitos keng lomanikor a ngimomwa akolongit na Sabato. Anyamit ngirukitos keng akoro, tolomakis abiluunun ngakies a ngimomwa toninata, tanyama.

² Na engolikineta Ngiparisayo ngakiro nguna, kingita Yesu tamasi, “Nyo esubeta ngirukitos kon na engeritoe alotal esubio akolongit na a Sabato?”

³Tatachak Yesu tama, “Nyisoma esi nakolong asubi Daudi ka ngitunga keng na anyamea akoro a?

⁴Toloma ngesi kai a Akuj sodi tanyama ka ngirukitos keng ngamugati na epeyokinitere Akuj. Arono Alotal kech enyamete ngamugati nguna, araakasi ngimurok a akai a Akuj make achamakinitae enyamete.

⁵Nyisoma esi Alotal a Musa atamar akolongit na Sabato nyiwapeenete ngimurok a akai a Akuj etal, nakaneni nyesechito a?

⁶Kalimokinit atamar eyei ibore nege ni epolot ni idwangit akai a Akuj.

⁷Arai toyenete esi eger a ngagiran ana ebaasi, ‘Nyasaki ayong ngakipeyos a ibarasit nakaneni asaki apatanu’, pekiriraenete esi lu nyesechito.

⁸ Kainyo Lokookeng a Itwaan ngesi erai Ekapolon a Sabato.”

⁹Torotok Yesu kaneni toloma kai a Atuk.

¹⁰ Nakaneni ayei itwaan neni ni angwalit akan. Aya ngitunga ngiche lu asakete akititakin Yesu a ibore a idio ani ichwangakini, apot kingita ngesi tamasi, “Ejoikinit alotal yok itangalekinio akolongit na Sabato a?”

¹¹Tatachak Yesu tama, “Ngae anikus erai ani kechakakin amesek keng nakipany nakooyen akolongit na Sabato, nyirumuni kikeu?

¹²Nakaneni ejok itwaan noi idwangit amesek! Nakaneni echamakinitae alotal ingarakinio itwaan akolongit na Sabato.”

¹³Sodi alimokin itwaan ngini tama, “Kitorwaa akan kon.” Abu kitorwaa akan keng sodi tojoker kikok nache.

¹⁴Sodi topudosi Ngiparisayo toloto totuko eger lo eareta Yesu.

¹⁵Na eirarea Yesu atamar etukitoe akiar ngesi, abu torotok kaneni sodi kiwapakis ngitunga lukaalak ngesi. Kitojok ngesi daang lu adeakasi

¹⁶nabo kichikichik kesi atamar nyeelimokis luche atamar ngesi erai ngae.

¹⁷Asubi ngesi nguna kiyookinotor nakolong alimuni ekadwaran a Akuj Isaya ebala:

¹⁸“Ekasuban etich kang lo, lo aseu ayong, lo amina ayong, nabo lo ketalakarit. Ameuni Etau kang bu nikeng. Sodi tolimokinea ngitunga a ngibukui alu nyerai Ngiyaudi daang eboyor a akitiriyan ngakiro.

¹⁹Nyepegi ngesi kori nyirema. Nyiirema iruoro alorotin.

²⁰Eliwor ngesi lo epalaana kangulu palag nakaneni epataner kangulu emam ibore. Erubakini ngesi tanang iyookin na eriyan kidwanga na nyeriyan.

²¹ Ngibukui lu nyerai Ngiyaudi daang, igienosi ngesi.”

²²Sodi apot ngitunga ngiche yaut nia Yesu itwaan nimuduk nipeeruoro ani akoporitotor ngikerep. Kitojok Yesu itwaan ngini sodi kiruorik nabo taanyunga tani akwap.

²³Abu asepich a ngitunga tatalasi na asubi Yesu. Sodi kingitas tamasi, “Erai cha dir ngesi lokookeng a Daudi a?”

²⁴ Ani iirareta Ngiparisayo ngakiro nguna, apot tatachut ebaasi, “Erai Beelsebul ekapolon a ngipean ngesi itaanyunit ngesi agogongu na itwaranakinea ngipean.”

²⁵Kona ayenea Yesu na etamete kesi, abu tolimok kesi tama, “Akwap na etiakatiakatar ngitunga tojwoto make, inyasun akwap ngina. Kori ani ketiakatiakasi ngitunga a ere a epei kori a apeiwi tojioto make, ialarosi kesi.

²⁶Ani kitwarakin Esiitan bon, idodiunit ibore ngini atamar etiakatiaka apolou keng, nakaneni nyerubakini jik.

²⁷Ibaasi esi etwaranakini ayong ngipean kotere agogongu na aanyuni ani a Beelsebul. Ngae itaanyuununi ngirukitos kus agogongu na itwaranakineta ngipean? Ngakiro na esubete ngirukitos kus idodiunito atamar isechito esi jik.

²⁸Meere kongina. Etau a Akuj kainakinit ayong agogongu na etwarakinea ngipean, idodiunit ibore ngini atamar abu Apolou a Akuj nikus.

²⁹ “Emam itwaan elomakini itwaan nikajwon anawi keng, tolema ngiboro keng daang mati mono keen itwaan nikajwon ani ekisidi torem ngiboro a awi keng daang.

³⁰“Itwaan ni nyibakit alowae kang karemokino ayong. Itwaan ni nyekengarakinit ayong akichun, ialanari,

³¹nakaneni kalimokinit atamar erimakinio ngitunga ngasechesea ka ngakiro naaronok daang na imenyatar kesi, nakaneni itwaan cha daang ni elimuni naaronok imenyi Etau a Akuj, nyerimakinio jik.

³² Itwaan daang ni elimuni naaronok imenyi Lokookeng a Itwaan erimakinio, nakaneni itwaan cha daang ni elimuni naaronok imenyi Etau a Akuj nyerimakinio, jik ngirwa lu, kori tani lumonan.

³³“Ani ibala taanyu ageor naajokon ejoikinit eyei ekitoe loajokon lo ekilikili. Ani keyei iyong ekitoe loaronon ianyuni ageor naaronon. Eyenio ekitoe a ageor ana ekoniuni.

³⁴Esi lu iroko ikote ngarewa! Ipedorete alimun naajokak kwai taraakas esi ngitunga luaronok? Kainyo elimuni akituk a itwaan ngakiro na eupiyarito etau keng.

³⁵ Itwaan niajokon esubi ngakiro naajokak kotere ni ejokia etau keng. Itwaan niaronon esubi ngakiro naaronok kotere ni eronia etau keng.

³⁶“Nakaneni kalimokinit atamar, akolongit na eriras, isisauni itwaan daang akiroit naaronon daang nakolong eruoro.

³⁷Kainyo ngakiro kon kesi kiriraare iyong, kesi itodiunete atamar isechit iyong kori nyisechit.”

³⁸ Sodi tolimut ngiketatamak ngiche a etal ka Ngiparisayo ngiche tamasi, “Eketataman, kisaki sua iyong tosubak akitoodikinet nakailiilon.”

³⁹Nakaneni tatachak Yesu kesi tama, “Eroko noi ngitunga a ngirwa kalu nyekerito tani Akuj. Esakete kesi kidodikinae akitoodikinet nakailiilon. Nakaneni emam akitoodikinet ache nakailiilon na idodikinio kesi mati nakolong a ekadwaran a Akuj Yona.

⁴⁰Kona kolong aperio Yona nakook a ekolia a loapolon ngirwa nguuni akwaar ka apaaran, eperi Lokookeng a Itwaan dang tooma nalup ngirwa nguuni akwaar ka apaaran.

⁴¹Akolongit na a eriras, enyounete ngitunga a Ninewi kirirata esi, kainyo alungete kesi ngasechesea kech na kolong eirareta Yona itatami kesi ngakiro a Akuj. Kalimokinit ayong esi nabo atamar, eyei ibore nege ni epolot ni idwangit tani Yona.

⁴² Akolongit na a eriras enyouni akapolon a akwap a Cheba kirira esi, kainyo anyouni kolong ngesi anakwap keng tolot erot lokooyen noi ebunit akiirar akitatamet na aosou a ekapolon Solomon. Nakaneni kalimokinit ayong esi atamar, eyei ibore nege ni epolot ni idwangit tani Solomon!

⁴³“Naepudorea Ekipe anitwaan, tolot kitor nariet esaki ni iangarea. Ani pekeanyu ni iboikin, elimuni tama,

⁴⁴‘Abongori kai na ngoon alomit’. Ani ebonguni ngesi toriam itwaan ikoni akai na emam ibore eyei, kepiar keseger.

⁴⁵Sodi tolot toriku ngipean ngiche ngikan-kaarei luaronok noi lu idwangito tani ngesi, sodi pot kiboikinos nitwaan. Nakaneni ani ekisidi, eroner itwaan ngini noi kidwang ni kolong ngorot. Nugu kesi esubakin alotunga aluaronok a ngirwa kalu.”

⁴⁶Ani eringa Yesu isuruori asepich a ngitunga, pot itiokeng ka ngikaitotoi a Yesu. Towaa anikalapatan esakete akisuruor ngesi.

⁴⁷Tolimok itwaan ipei alu ayakasi neni ngesi tama, “Ayoro, ewaasi itiokon ka talokaatokon anikalapatan esakete akisuruor iyong.”

⁴⁸Tatachak Yesu ngesi tama, “Ngae erai itiokang? Tangae eraakasi talokaatokang?”

⁴⁹Sodi todod ngirukitos keng tama, “Kingolikisi! Lugu kesi eraakasi itiokang ka ngikaitotoi kang.

⁵⁰Itwaan cha daang ni esubi na esaki Apakang lo eyei nadis, ngesi erai lokaatokang ka nakaatokang ta itiokang.”