Read turkana Matayo 13 Bible Online

Matayo 13 - turkana bible

Matayo 13

¹Akolonngit napei ngina topudo Yesu alokai kangina, tolot kiboikin lokwaas a anam.

²Kotere asepich a ngitunga na achunakina neni, todoka ngesi kiboikin natubwa, towo asepich ngina alokwaas a anam.

³Kitatam ngesi kesi ngakiro nakaalak a ngakitadapet tama, “Ayei kolong eketan lo alosi akitare.

⁴Na ealakinea ngikinyam mana, apot ngikinyam ngiche kialakin lorot, sodi kidepasi ngikieny.

⁵Apot ngiche kialakin nalup na ewarawarakina kidiama natabab. Toruput ngikinyam atipei kainyo pealalak ngalup.

⁶Ani erirauni akolong, tonom ngimomwa luuchik ngulu, nabo kotere nipeapisitotor ngaten apot tooniyosi.

⁷Apot ngikinyam ngiche kialakin tooma lookwa. Ani erupunete ngiikwa torida ngimomwa lu arupunito.

⁸ Nakaneni kialakinos ngikinyam ngiche nalup naajokak, toruput ngimomwa topolout, tokoniut ngiche amiat apei, ngiche ngitomwon-kapei, ngiche ngitomwon-uni.”

⁹Na arumorea Yesu, tolim tama, “Ani keya ngaki kiira robo.”

¹⁰ Sodi pot ngirukitos a Yesu nikeng kingita ngesi ebaasi, “Nyo isuruorea iyong ngitunga a ngakitadapet?”

¹¹Tatachak Yesu kesi tama, “Kidodikin esi aosou a ngakiro a namunonoe a Apolou a Akuj, nakaneni nyidodikinitae kesi.

¹²Kainyo itwaan cha daang ni eyei ibore, einakinio ni elal, sodi talalaror ibore keng noi. Nakaneni itwaan ni emam ibore eyei, edemario tani nidiochichi ni etingit.

¹³Esuruori ayong kesi a ngakitadapet, toliwor iteete nakaneni nyebwangasi ngitamen toyena ngakiro, nabo epupete nakaneni nyechoiyarete kori nyeyenunete.

¹⁴Etemokin anikech nakolong alimuni ekadwaran a Akuj Isaya ebala: ‘Ipupokinete lokojokon, nakaneni nyiyenunete. Ingolikinete lokojokon, nakaneni nyebwangasi ngitamen toyena ngakiro.

¹⁵ Kainyo earit ngitunga lu abangaanut. Egolito ngaki kech, nabo arapa ngakonyen kech. Arai nyikote neni, kingolikinito a ngakonyen kech. Kori kiirarito a ngaki kech, nabo kitamunito alotamen kech. Ebala Akuj, kereuna kesi nikang, nabo ketangalekinit ayong kesi’.

¹⁶“Etia ekeny lo eyei esi ai? Iteete ngakonyen kus nabo epupete ngaki kus.

¹⁷Kalimokinit ngakiro na iteni atamar ngikadwarak a Akuj ngikaalak ka ngitunga a Akuj, asakete noi akingolikin na ingolikis esi, nakaneni nyingolikina, nabo asakete akiirar na ipupete esi, nakaneni nyiirara.

¹⁸“Topupokisi, sodi toyeneta eger a ngakitadapet a eketan.

¹⁹Lu iirarete akiroit a Apolou a Akuj nakaneni nyechoiyasi, ikwaan ka ngikinyam lu ealakinosi lorot. Ani ebuni Ekipe tolema akiroit na eyei lotai kech.

²⁰Isikwaanitae ngikinyam lu ealakinosi natabab, ka ngitunga lu iirarete akiroit tonupa a alakara napei iirareta.

²¹Nakaneni nyelomari akiroit lotai kech lokojokon kori nyenupete akiroit ngina nikooyen. Na ichanere kesi kori na eboliare kotere akiroit ngina, sodi toisikis kesi atipei.

²²Isikwaanitae ngikinyam lu ealakinosi tooma lookwa ka ngitunga lu iirarete akiroit, nakaneni ngichan a eboyor a akwap ka aminakinit ebari, nyisirichakinete kesi akiroit ngina, nakaneni tongopa ngakiro naajokak anakiroit kangina.

²³Ngikinyam lu ealakinosi nalup naajokak, ikote ngitunga lu iirarete akiroit tochoiasi, tokoniut ageor ngiche amiat apei, ngiche ngatomwon-kapei, ngiche ngatomwon-uni.”

²⁴Tolimok Yesu kesi ngakitadapet ngache ebala, “Ikoni Apolou a Akuj ne. Etakini itwaan ngikinyam luajokak mana keng.

²⁵Ani nakwaare, ejotoe itwaan daang, bu emoit kitak edoan kiding ngakanoi, sodi tolot.

²⁶Na arupuneta ngikinyam kibutungiasi ngakanoi, abu edoan dang tatakanu.

²⁷Pot ngikasubak etich a itwaan kangini tolimokis ngesi tamasi: ‘Ekapolon, be ajokak bo ngikinyam lu ngoon itakini iyong mana kon, aliwae abunio edoan lo?’

²⁸Tatachak tama: ‘Emoit ngesi kesubi ngakiro nu.’ Kingita ngikasubak etich ngesi nabo tamasi, ‘Isaki tokona iyong sua atorutosi edoan a?’

²⁹Tatachak tama, ‘Mam, kimiekisi, kainyo kilomasi esi akirut edoan ipedorete arutun tani ka ngakanoi aapei.

³⁰Kimiekisi ngakanoi ka edoan toruput daang aapei tanang ngirwa lu elemere. Sodi atolimok ayong ngikalemak atamar, torutut mono edoan sodi totukonokis a ngaenet kinomae, ani erumor tochunakinae ngakanoi kikachakinae lokeru kang.’ ”

³¹Tolimok Yesu kesi akitadapet ache ebala, “Ikoni Apolou a Akuj ne. Alemuni itwaan echokit a ekoropus kitak mana keng.

³²Edit echokit a ekoropus noi idwangit ngichok daang nakaneni ani kerupu, topoloor noi kidwang ngikito luuchik daang. Eliwor ekitoe pot ngikieny toduko ngakais naten keng.”

³³Tolimok Yesu kesi nabo akitadapet tama, “Ikoni Apolou a Akuj ne. Alemuni aberu ekitoe lo itubui ngamugati kimorik ka ngakiria anadepe tanang ebui wadaang.”

³⁴Esuruori Yesu asepich a ngitunga ngakiro nugu daang a ngakitadapet nyelimuno ngesi akiroit tani apei na nyerai ngakitadapet.

³⁵ Asubi ngesi kona kiyookinotor nakolong alimuni ekadwaran a Akuj ebala: “Esuruori kesi a ngakitadapet. Alimokini kesi ngakiro na nyeyenuna napei kolong anakisiakinet a akwap.”

³⁶Na asikinea Yesu asepich a ngitunga toloma tooma kai, pot ngirukitos keng nikeng tamasi, “Tolimokinae sua ngakitadapet a edoan alomana atamar ngesi nyo.”

³⁷Tatachak Yesu tama, “Itwaan ni etakini ngikinyam luajokak ngesi Lokookeng a Itwaan.

³⁸Amana ngesi akwap. Ngikinyam luajokak kesi ngitunga lu a Apolou a Akuj. Edoan kesi ngitunga lu a Ekipe.

³⁹Emoit lo etakini edoan ngesi Ekipe. Akilem ngesi esal a akwap. Ngikalemak kesi ngimalaikae.

⁴⁰Loger lo echunakinere edoan kinomae anakim, esubakinosi na ikote neni akolongit na a esal.

⁴¹Emeuni Lokookeng a Itwaan ngimalaikae keng tochunakis daang lu itosechenete luche ka ngikasechak daang, kipudunoe Anapolou a Akuj.

⁴²Sodi tachakakis kesi nakim nakariran, kigoro kaina tokiricha ngikel.

⁴³Min akicha na ikoni na akolong lotunga a Akuj Anapolou ka Apakech. Ani keya ngaki, kiira robo!

⁴⁴“Ikoni Apolou a Akuj ibore nikaalan a ngaropiyae emurakina mana. Kiyookin itwaan sodi tonuk nabo. Talakar noi, tolot, togiela ibore daang ni etingit ngesi. Ani erumor, tobongo togiel amana ngina.

⁴⁵“Ikoni Apolou a Akuj ne. Esaki emuchurut ngamoru a ngaropiyae enyaritae ngalului.

⁴⁶Na eanyunea ngesi apei naajokon noi, tolot, togiela ibore keng daang. Ani erumor bu togiel amoru nakaalan a ngaropiyae enyaritae alulu ngina.

⁴⁷“Ikoni nabo Apolou a Akuj ne. Achakakinete ngikechiemak ngiche epuute kech nanam lo erumuni ngikolia ngigelagelae.

⁴⁸Na ilelebunor epuute ngikolia, kiriut kesi lokwaas, kiboikinos sodi totiakatiakata ngikolia. Kiwaanakis luajokak nasaaja kech ani luaronok tochakanasi.

⁴⁹Ikokinete ngakiro neni akolongit na a esal. Eloose ngimalaikae totiakut ngitunga luaronok alotunga alu ajokak

⁵⁰sodi tachakakinae kesi nakim ni igorotor tokiricha ngikel.”

⁵¹Kingit Yesu kesi tama, “Iyena esi ngakiro nu a?” Tatachakis tamasi, “Ee, kiyen.”

⁵²Tatachak Yesu tama, “Idodiunito ngakiro nu atamar, eketataman a etal daang lo itatama Anapolou a Akuj, ikoni elope a akai lo ipuduni ngiboro lukiteat ka lungorok alopem.”

⁵³Na arumorea Yesu akisisaun ngakitadapet nguna, abu torotok kaneni,

⁵⁴tobongo lore lokolong apolounio. Kitatam alokai a Atuk, nakaneni daang lu apupete ngesi apot toiliilikis ngakiro keng. Kingitas ebaasi, “Aliwae aanyunea itwaan en aosou na ka ngakitoodikinet nakailiilok nu?

⁵⁵Meere ngesi lokookeng a ekile alo kechian ngiboro a? Nyerai Mariam itiokeng a? Nabo ikwa meere talokaatokeng kesi Yakobo ka Yosep ka Simon ta Yuda a?

⁵⁶Ikwa meere tanakaatokeng na elomito ne a? Aliwae aanyunea ngakiro nu daang?”

⁵⁷Apot tongero ngesi jik kanguna. Tolimok Yesu kesi tama, “Ipuruunitoe ekadwaran awadaang pearai lore keng ka ngitunga a awi keng make nyipuruunete.”

⁵⁸ Aloger amamakar kesi anupit, nyesuba Yesu ngakitoodikinet nakailiilok alalak kaneni.