Read turkana Matayo 14 Bible Online

Matayo 14 - turkana bible

Matayo 14

¹Ngirwa ngulu, kiira Erode lo arai ekapolon a Galilaya ngakiro a Yesu.

²Tolimok Erode ngikasubak etich keng tama, “Erai itwaan en Yoana Ekebatisan ayaru anakitu ngesi esubea ngakitoodikinet nakailiilok nu.”

³Kainyo alimunit sek Erode atamar kirumunae Yoana, toenae a ngiriko sodi toinikinae lojela. Asubi ngesi nguna kotere Erodia, aberu a lokaatokeng alo anyaritae Pilip.

⁴Kainyo alimonokini sek Yoana Ekebatisan Erode tama, “Nyejoikinit iyong itiliwori Erodia aberu kon.”

⁵ Asaki Erode akiar ngesi nakaneni toem Ngiyaudi kainyo abaasi kesi Yoana erai ekadwaran a Akuj.

⁶Akolongit na etamunitere akidounet a Erode, abu nakookeng a Erodia kidonga alongaren ngipeyok daang. Talakar Erode noi.

⁷Kikong ngesi ebala ainakini nakookeng ibore daang ni esaki.

⁸Tolim ngesi loger lo alimokinitor itiokeng tama, “Nakinae tokona kona akou a Yoana Ekebatisan anatubwa!”

⁹Kialolong ekapolon, nakaneni kotere akichikakinet na alimuni ngesi alongaren ngipeyok keng daang, tolim ngesi atamar tosubakinae nguna asaki apese ngina.

¹⁰Sodi apon Yoana totubunoe akou alojela.

¹¹Yaunae akou keng eyei tooma natubwa nakinae apese, sodi yaa nia itiokeng.

¹²Pot ngirukitos a Yoana kilepulepoosi akwaan keng, tonuka, ani erumor toloto tolimokis Yesu.

¹³Na eirarea Yesu ngakiro a Yoana, torotok kaneni kiwaar a atubwa tolot alopei nariet. Na eirareta ngitunga ngakiro nguna, apot toisikis ngirerea kech kiwapakis ngesi iriwokina ekwaas a anam.

¹⁴Na adokunea Yesu anatubwa, kingolik asepich a ngitunga. Kisieneto ngesi ngitunga noi dio kitojok ngulu adeakasi.

¹⁵Na anangea ebong, pot ngirukitos keng nikeng tamasi, “Awar tokona, tarai ne ariet. Kimiek ngitunga toloto nadakarin togiela akimuj na enyamete.”

¹⁶Tatachak Yesu kesi tama, “Nyechamit kesi eloose, nakisi esi kesi ibore idio ninyamat!”

¹⁷Tatachakis kesi tamasi, “Ngamugati ngakan ka ngikolia ngiarei make eya ne.”

¹⁸Tama Yesu, “Yautu nege.”

¹⁹Tolimok ngesi ngitunga atamar kiboikinos lonyia. Sodi tolem ngamugati nakan nguna ka ngikolia luarei tokienyia kidiama nadis, tobuak Akuj alakara. Tonyilinyili ngamugati nak ngirukitos keng, sodi tokorakis ngirukitos keng ngitunga.

²⁰Kimuj itwaan daang kimwon. Sodi tolemut ngirukitos keng ngategerin ngatomon ka ngaarei na eleleba akimuj na apiyanun.

²¹Araakasi ngikiliok lu emujete ngabunge ngakan, peimarunitae ngaberu ka ngide.

²²Todungok Yesu ngirukitos keng atamar todokasi natubwa kingarenikis toloto ekwakaye anam eringa ngesi etinenikinit akisuruor ngitunga tolooso.

²³Na arumorea alimokin ngitunga atamar toloto, todoka ngesi moru alopei akilip. Ayei Yesu alopei inaa na awaria.

²⁴Esaa ngolo alona atubwa ayei kiding anam ebapabapate ngitoroi kainyo akutunit ekuwam anakan ana aloose kesi.

²⁵Ani enangi ni ebayiarea bu Yesu nikech elosi alokidiama ngakipi.

²⁶Ani ingolikinete ngirukitos keng ngesi elosi alokidiama ngakipi apot tobul, tolimut ebaasi, “Erai Ekipe,” sodi kiremasi ebulit.

²⁷Tolimok Yesu kesi atipei tama, “Totitinyeketo. Nyieam, ayong itwaan.”

²⁸Sodi tolim Petero tama, “Ekapolon, ani kerai iyong dir, tolimokinae ayong dang abu nikon alosi alokidiama ngakipi.”

²⁹Tatachak Yesu tama, “Bua!” Todoku Petero anatubwa kisiak alosit nia Yesu alokidiama ngakipi.

³⁰Na akutakinea ngesi ekuwam abu toem kisiakis ngakipi akilikor ngesi. Kikalou tama, “Toyuunae Ekapolon.”

³¹Atipei todol Yesu ngesi kikamu tama, “Etia ekiditeu a anupit kon ai? Nyo ingayakinitor iyong?”

³²Ani edokarete Yesu ka Petero natubwa, toper ekuwam.

³³Apot ngirukitos lu ayakasi natubwa kilipa Yesu tamasi, “Irai iyong dir Lokookeng a Akuj.”

³⁴Todokasi ekwakaye anam todokut anakwap a Genesaret.

³⁵Na ayeneta ngitunga a akwap kangina Yesu, tokeikis akiroit neni atamar yaunae ngikadeakak. Apon yaunae ngikadeakak a akwap kangina daang nia Yesu.

³⁶Sodi kimaimae ngesi tamarae kimiek lu adeakasi tatapa tani ekwaas a eworu keng. Tojokearos daang lu atapete eworu keng.