Read turkana Matayo 15 Bible Online

Matayo 15 - turkana bible

Matayo 15

¹Pot Ngiparisayo ka ngiketatamak a etal alo Yerusalem kingita Yesu tamasi,

² “Nyo nyiwapitotor ngirukitos kon ngitalio lu kolong kata apaayok? Nyilotanarete kesi ngakan kech eringa nyimuja!”

³Tatachak Yesu kesi tama, “Nyo bo iwapitotor esi ngitalio kus nakaneni nyiwapito etal a Akuj?

⁴Kainyo alimuni Akuj tama, ‘Toker apakon ka itiokon,’ nabo tama, ‘Itwaan daang ni elimit apakeng ka itiokeng anaaronok, ejoikinit eario.’

⁵Nakaneni itatamete esi ibaasi ani keyei itwaan ibore ni esaki akingarakinea apakeng ka itiokeng, nakaneni tama ngesi, ‘Alemik ibore en Akuj,’

⁶nyitemokino ngesi ekeri apakeng. Aloger kangolo, ingero esi Etal a Akuj sodi kiwapeta ngitalio kus.

⁷Esi ngikamodeanak! Iteni dir, ngakiro nakolong adwari Isaya anikus tama,

⁸‘Ebala Akuj, kakerito ngitunga lu ayong a ngakituk, nakaneni eloka ngitai kech anikang.

⁹ Kelipito kesi ayong pas, kainyo itatamete ngitalio a ngitunga kitusubut ngitalio a Akuj.’ ”

¹⁰Tanyarau Yesu asepich a ngitunga nikeng tama, “Topupokisi nabo toyeneta!

¹¹Meere ibore ni elomari nakituk a itwaan epedori akitoron ngesi, pearai ibore ni epuduni anakituk keng itoroni ngesi.”

¹²Pot ngirukitos nikeng tamasi, “Iyeni iyong atamar ekadakinito Ngiparisayo ngakiro na ilimuni iyong a?”

¹³Tatachak Yesu kesi tama, “Ekitoe daang lo nyitakina Apakang lo eyei nadis, erutorio.”

¹⁴ Tolimok Yesu kesi tama, “Tojongoto akachit kesi! Eraakasi kesi ngikarikok a ngimuduk, na erikio emuduk emuduk loche, echakakinosi kesi daang nakipany.”

¹⁵Kikeu Petero tolim tama, “Kitatamikinae sua eger a ngakitadapet kanu atoyena.”

¹⁶Tolimok Yesu kesi tama, “Ikwa eringa esi dang nyeosuno kidwanga ngitunga luche a?

¹⁷Nyiyenete esi atamar ibore ni elomari nakituk a itwaan elomari nakook sodi topudo anakwaan a?

¹⁸Nakaneni ibore ni epuduni anakituk a itwaan ebunit alotau keng. Ngakiro na ikote nu kesi itoronete itwaan.

¹⁹Kainyo lotau ngesi eponitotor ngitamen luaronok lu ikote akiar, elomit ka akiper ka itwaan ni nyiutut ka iyong, akoko, alioko, eswamit.

²⁰ Ngakiro na ikote nu kesi itoronete itwaan, meere akimuj nyilatara ngakan loger lo ibaatar esi.”

²¹Torotok Yesu kaneni toten nakwap na eyei diye ngirerea lu a Tiro ka Sidon.

²²Abu aberu apei na arai Akanaanit na alomit nakwap ngina bu nikeng. Kimaima ngesi irema tama, “Ekaapaan, Lokookeng a Daudi! Kisienoi ayong! Ichanit nakookang Ekipe noi.”

²³Nakaneni nyelimokina Yesu ngesi akiroit, tani apei. Pot ngirukitos keng nikeng kimaimaa ngesi tamasi, “Kitwarak aberu na tolot! Kainyo kiwapit ngesi ngoni eyaunit echale!”

²⁴Tatachak Yesu tama, “Kameunio ayong lotunga a Isirael make, lu ikote ngamesekin na echakara.”

²⁵Esaa ngolo bu aberu tadakakin nakejen keng, tolim tama, “Kingarakinae ayong ekaapaan!”

²⁶Tatachak Yesu tama, “Nyejoikinit akimuj a ngide echakakinio ngingokwo.”

²⁷Tatachak aberu tama, “Iteni ekaapaan, nakaneni enyamete tani ngingokwo akimuj na ebucheene ilope tochakar na imuja alomeesa.”

²⁸Nakaneni tatachak Yesu tama, “Irai iyong aberu na inupit lokojokon noi! Kisubakinere iyong na isaki daang.” Esaa lopei ngolo tojoker ikoku keng.

²⁹Torotok Yesu kaneni, kitor nanam a Galilaya. Dio todoka moru kiboikin.

³⁰Bu asepich a ngitunga nia Yesu eyaunito ngikangwalak ka ngimuduk ka ngikechodok ka lu nyiruorosi ta lukaalak lu adeakasi ngidekesinei ngigelagelae. Kiwaakis ngikadeakak nakejen keng sodi kitojok ngesi kesi.

³¹Tatalasi ngitunga ngakiro nguna na engolikineta lu nyiruorosi iruorikinete, ka lu angwalak erotokinete ka lukechodok ejokearosi, ka lumuduk ingolikinete, sodi kipuruut kesi Akuj a Isirael.

³²Tanyarau Yesu ngirukitos keng ni ayei ngesi tolimok tama, “Kesienito ayong ngitunga lu kainyo kiruk ayong ka kesi ngirwa nguuni. Nakaneni emam tokona kesi akimuj enyamete. Nyasaki ayong akimiekin kesi eloose eringa nyisimuja, kainyo epedorete akirakanar alorot eloose nawiyei kech.”

³³Kingita ngirukitos keng tamasi, “Nyai ni kilemunea ngoni akimuj anariet kana na itemuni asepich na daang?”

³⁴Kingit Yesu kesi tama, “Ngai ngamugati itingito esi?” Tatachakis tamasi, “Ngakan-kaarei ka ngikolia luuchik ngidikidio.”

³⁵Nakaneni tolimok Yesu asepich a ngitunga atamar kiboikinos kwap.

³⁶Sodi tolem ngamugati nakan-kaarei ka ngikolia, tobuak Akuj alakara. Ani erumor tonyilinyili sodi nak ngirukitos keng tokorakis ngitunga.

³⁷Kimuja kesi daang kimwoko. Sodi tolemut ngirukitos keng ngategerin ngakan-kaarei na eleleba akimuj na apiyanun.

³⁸Ngitunga lu emujete akimuj ngina araakasi ngikiliok ngabunge ngoomwon, emam itwaan emarit ngaberu ka ngide.

³⁹Tolimok Yesu ngitunga atamar toloto, ani erumor todoka natubwa toten nakwap a Magadan.