Read turkana Matayo 16 Bible Online

Matayo 16 - turkana bible

Matayo 16

¹Pot Ngiparisayo ka Ngisadukayo nia Yesu esakete akining ngesi. Tolimokis tamasi, “Tosubak ngakitoodikinet nakailiilok na itodiunito atamar ibunit iyong ani a Akuj.”

²Nakaneni tatachak Yesu kesi tama, “Esaa lo iraraa akolong adooyor ilimunete esi tamasi, ‘Ejoker akolongit ani erengikinitor adis’.

³Nabo nataparach elilim ilimunete esi tamasi, ‘Erami akiru akolongit na kainyo erengikinit adis kidiisikinite akwap’. Ipedorete esi ayenun ngakiro na adis kotere akitere ngidowon. Nakaneni nyo tokona peiyenuneta esi ngakitoodikinet nakailiilok na itodiunitae ngirwa lu!

⁴ Eroko noi ngitunga a ngirwa kalu nyekerito tani Akuj! Esakete kesi kidodikinae ngakitoodikinet nakailiilok! Nakaneni emam ngakitoodikinet ngache nakailiilok idodikinio kesi mati nakolong a ekadwaran a Akuj Yona.” Sodi kimiek ngesi kesi torotok.

⁵Na adokareta ngirukitos a Yesu ekwakaye anam, kimuriak kesi akiting ngamugati.

⁶ Tolimok Yesu kesi tama, “Tochoikinos anakiro anaaronok a Ngiparisayo ka Ngisadukayo ana ikote ekitoe lo itubui ngamugati.”

⁷Tolomakis kesi ekiruor make ebalasi, “Elimunit ngesi nu kainyo emam ngamugati kitingit ngoni.”

⁸Ayeni Yesu ngakiro na eruorosi kesi sodi kingit kesi tama, “Nyo iruorotor esi make ibaatar emam ngamugati itingito? Etia ekiditeu a anupit kus ai?

⁹Eringa esi nyeyenuna a? Nyitamunito esi nakolong anyilinyilia ayong ngamugati ngakan kotere ngitunga ngabunge ngakan a? Ngai kolong ngategerin ilelebete esi?

¹⁰Ani bo ngamugati nakan-kaarei na anyilinyili kotere ngitunga ngabunge ngoomwon? Ngai ngategerin ilelebete esi?

¹¹ Kainyo peiyeneta esi atamar meere kotere ngakiro a ngamugati kesuruorea ayong esi? Tochoikinos anakiro anaaronok a Ngiparisayo ka Ngisadukayo ana ikote ekitoe lo itubui ngamugati.”

¹²Nakaneni toyena ngirukitos keng atamar meere ngakiro a ekitoe alo itubui ngamugati echikichikea ngesi kesi nakaneni araakasi ngakiro a ngakitatamet a Ngiparisayo ka Ngisadukayo.

¹³Torotok Yesu tolot nakwap na ayei diyete ere a Kaisaria Pilipi. Kingit ngesi ngirukitos keng kaneni tama, “Ebaasi mono ngitunga Lokookeng a Itwaan ngesi ngae?”

¹⁴ Tatachakis tamasi, “Ebaasi ngiche Yoana Ekebatisan. Ebaasi ngiche erai Elija. Tabaas ngiche irai iyong Yeremia kori epei a ngikadwarak a Akuj.”

¹⁵Kingit kesi tama, “Ani bo esi, ibaasi esi ayong ngesi ngae?”

¹⁶ Tatachak Simon Petero tama, “Irai iyong Kiristo, Lokookeng a Akuj ana eyari.”

¹⁷Tatachak Yesu tama, “Kongina robo Simon, lokookeng a Yoana! Kipiaritae iyong noi. Erai meere itwaan kidodikini iyong ngakiro na iteni na ikote nguna nakaneni erai Apakang lo eyei nadis kitodikini iyong.

¹⁸Kalimokinit iyong Petero atamar, ekiro kon Petero, ngesi atamar ataaba. Nakaneni nataaba na ngesi adukokini ayong ekanisa kang. Nyepedori tani akitu akuruwor jik!

¹⁹ Kainakini iyong ngingaet lu Apolou a Akuj. Daang na ingeri iyong anakwap, engerio tani anadis. Daang na ichamuni iyong anakwap, echamunio anadis.”

²⁰Nakaneni tolimok Yesu ngirukitos keng atamar nyeelimokis itwaan tani ipei atamar arai ngesi Kiristo.

²¹Tolomak Yesu esaa ngolo alimonokin ngirukitos keng ngakiro na eleerete ebala, “Ejoikinit ayong alosi Yerusalem, katoboliatar ngikasukou a Atuk ka ngimurok luapolok a akai a Akuj ta ngiketatamak a etal. Kaario ayong ani akolongit na a ngauni ayaruni.”

²²Tachada Petero ngesi nikeng bon tolomak akikilakin tama, “Meere kongina Ekapolon! Nyesubakinosi nguna anikon jik!”

²³ Torei Yesu tolimok Petero tama, “Koto anikang Esiitan! Nyo kiretakinitor iyong ayong? Meere nia Akuj eponitotor ngitamen lukon lu, eponito alotunga.”

²⁴Nabo tolimok Yesu ngirukitos keng tama, “Itwaan daang ni esaki akiwapakin ayong, ejoikinit ejalun bon sodi toriong apir keng bu kewapak ayong.

²⁵Kainyo itwaan cha daang ni esaki akirichun akiyar keng, ebukori. Nakaneni ni ejali akiyar keng kotere ayong, eyari.

²⁶Nyoni eanyuni itwaan erai kitiliwo ngesi ibore daang nia akwap ikeng nakaneni tobukor anakiyar? Mam jik! Emam ibore ipotori ngesi kilokonyuunio akiyar keng.

²⁷Kainyo dikino Lokookeng a Itwaan ebuni a Apolou anaketimon ka Apakeng erukito ka ngimalaikae keng. Sodi tatach itwaan daang itemem ka etich keng.

²⁸ Kalimokinit ayong esi atamar eya ngiche nege lu nyetoakete eringa nyeanyungara Lokookeng a Itwaan ebuni erai Ekapolon.”