Read turkana Matayo 17 Bible Online

Matayo 17 - turkana bible

Matayo 17

¹Adaunet a ngirwa a ngikan-kapei, abu Yesu toriko Petero ka Yakobo ta Yoana lu araakasi ngikaitotoi, todokasi kesi make kidiama emoru lokooyen.

²Kibelei Yesu iteete kesi. Tokwanger ereet keng tomilimil loger a akolong. Tokwangeta ngiworui keng loger a akicha.

³Sodi kingolikis ngirukitos luuni ngulu Musa ka Elija iruorosi ka Yesu.

⁴Tolimok Petero Yesu tama, “Ekapolon, ejok noi ani kiyakar ngoni ne. Ani kichamit iyong, adukokini ayong ngakais ngauni ne, apei akon, apei aka Musa, nache aka Elija.”

⁵ Ani eringa ngesi iruorikinit, totiyaun edou loakwaan noi tarap kesi. Kiirasi kesi etoil alodou kangolo ebala, “Lokookang lominat ngesi lo. Ketalakarit ngesi ayong. Topupokisi ngesi!”

⁶Na eirareta ngirukitos etoil, tadakakinos kwap, tobul noi.

⁷Bu Yesu tatap kesi tama, “Tonyoutu. Tojongoto aemit.”

⁸Ani ingoliarete kesi, emam itwaan iche engolikis mati Yesu bon.

⁹Ani etiyaate alomoru, todungok Yesu kesi ngakiro na abala, “Nyiilimokis itwaan tani ipei akitoodikinet na ingolikis esi anakisingolikinet a Akuj tanang akolongit na iteyarunere Lokookeng a Itwaan.”

¹⁰ Kingita ngirukitos Yesu tamasi, “Nyo ebaatar ngiketatamak a etal ejoikinit Elija ebuni ekingaren?”

¹¹Tatachak Yesu kesi tama, “Iteni ebuni Elija ekingaren sodi tosubak ngakiro daang kitiriyan.

¹² Nakaneni kalimokinit atamar abu kolong Elija nakaneni emam itwaan ayen ngesi. Tosubeta ngitunga ngesi ngakiro daang na asakete asubea, loger lo moi eboliatar tani Lokookeng a Itwaan.”

¹³Nakaneni toyena ngirukitos keng atamar eruoro ngesi ngakiro a Yoana Ekebatisan.

¹⁴Na abongoreta kesi nasepich a ngitunga, bu ekile eche nia a Yesu toriedik alongaren keng

¹⁵tolim tama, “Ekapolon, kingarak lokookang edeak! Irakanar ngesi lokojokon, echakanakin nakim ka nakipi.

¹⁶Ayaunit ayong ngesi lorukitos kon, nakaneni nyitojoka kesi ngesi.”

¹⁷Tatachu Yesu tama, “Iraakasi esi ngitunga lu iroko noi nyinupito ngakiro a Akuj. Ejoikinit ayong kiruki ka esi tanang ori? Anaikini ayong ngakiro kus tanang ori? Yautu idia ngini ne.”

¹⁸Todungok Yesu Ekipe atamar tolom ani a idia! Tojoker ngesi esaa ngolo.

¹⁹ Potu ngirukitos a Yesu ni ayei ngesi elope kingita tamasi, “Nyo pekitwarakinea sua Ekipe?”

²⁰Tatachak Yesu kesi tama, “Erai ni nyinupitotor esi lokojokon. Kalimokinit ayong esi dir atamar, tani kedit anupit kus ketia echokit a ekoropus, ilimokinete emoru lo tamasi, ‘Kape kane, toten ama’ sodi torotok. Ipedorete akisub daang! [

²¹Akilip na eronere akimuj ngesi epedori akitwarakin Ekipe lo ikoni lo. Emam ibore iche epedori!]”

²²Na achununotor ngirukitos daang wapei alo Galilaya, tolimok Yesu kesi tama, “Aapuu ni erikokinere Lokookeng a Itwaan ngitunga

²³lu earete ngesi. Nakaneni akolongit na a ngauni iteyarunio ngesi.” Apot ngirukitos kialolongo noi.

²⁴ Na ananguneta Yesu ka ngirukitos keng Kaperinaum, pot ngikalemak a ngaropiyae a ekanisa nia Petero kingita tamasi, “Ebukeene Eketataman lokus echur a akai a Akuj a?”

²⁵Tatachak Petero kesi tama, “Ee, ebukeene.” Naalomarea Petero kai, kiruorik Yesu ekingaren tama, “Simon! Esibit iyong kwaai? Ngae ebuki echur a ngikapolok a ngakwapea kanu? Ngikulepek a akwap kori ngitunga a akwap anache?”

²⁶Tatachak Petero ngesi tama, “Ngitunga a akwap anache.” Tatachu Yesu tama, “Idodiunito ngakiro nguna atamar, nyechamit ngikulepek a akwap ebukete echur.

²⁷Kona nyikisakea kesi toronikis ngakiro nu, kape nanam, tochakak ekorobich nakipi. Ekolia lo irumuni iyong ekingaren, tangaa akituk keng toriam ngaropiyae na itemokino iyong ka ayong kiwaakini kai a Akuj, naa kesi ngaropiyae nguna tatachea echur yok!”