Read turkana Matayo 18 Bible Online

Matayo 18 - turkana bible

Matayo 18

¹ Esaa ngolo pot ngirukitos a Yesu nikeng kingita tamasi, “Ngae epolot noi anapolou a Akuj?”

²Sodi tanyarau Yesu ikoku kitowo alongaren kech,

³dio alimuni tama, “Kalimokinit ngakiro na iteni dir atamar ani pekilochosi esi kikokis ngide luuchik, nyilomarete napolou a Akuj.

⁴Itwaan ni epolot noi Anapolou a Akuj ngesi ngini itiditeun kikok ikoku niichi en.

⁵ Itwaan cha daang ni itepeyoni ikoku niichi ni ikoni en a ekiro kang, ketepeyon tani ayong.

⁶“Itwaan cha daang ni itesechi ipei a luuchik kanupito ayong kalu, ejoikinit eenikinio akiries lomosiring tochakakinae nanam nituluk.

⁷ Oitiakoi! Etioko nginyas epote nakwap kainyo epete ngakiningioto na epedorete akitapalikin ngitunga anupit kech! Ngakiro na ikote nguna esubakin ngirwa daang, nakaneni etioko nginyas eanyunete ngitunga lu irokunito ngakiningioto nguna!

⁸“Ani kitosech iyong akan kon kori akeju kon, totubo tochaka. Ejoikinit ilomari nakiyar ingwalit akan kori akeju idwangit achakakino nakim na nyedunge eyakasi ngakejen daang ka ngakan.

⁹ Ani kitosech iyong akongu kon, touto tochaka. Ejoikinit ilomari nakiyar idoony idwangit achakakino nanam na akim eyakasi ngakonyen daang.

¹⁰“Tochoito imenyarete tani ipei a luuchik kalu. Kalimokinit ayong esi atamar, erukito ngimalaikae kech ngirwa daang ka Apakang lo eyei nadis.

¹¹[ Kainyo abuni Lokookeng a Itwaan ayuun lu echakara.]

¹²“Esibit esi ikokini itwaan ni eyakasi ngamesekin amiat apei, dio tochakar apei ai? Imiekini ngesi nache natomwon-koomwon ka ngakan-koomwon edakasi akook a emoru sodi tasaka napei na echakara.

¹³Kalimokinit ayong esi atamar, ani keanyu amesek ngina, elakar noi kotere amesek napei ngina kidwang epit anatomwon-koomwon ka ngakan-koomwon peachakara.

¹⁴Aloger alopei kangolo, nyesaki Apakus lo eyei nadis tani ipei a luuchik kalu tochakar.

¹⁵“Ani kisechakini iyong lokaatokon, kape nikeng kidodik ngesi atamar esechit ngesi. Nakaneni tolimok anikeng bon, iraakasi esi luarei make. Ani kiira ngesi ngakiro kon, iyuu iyong lokaatokon ibuu.

¹⁶Nakaneni ani pekiira ngesi ngakiro kon, kape nabo nikeng irikit itwaan ipei kori ngiarei, sodi tarauneta ngakiro daang na esechit ngesi na aanyut ngitunga ngiarei kori nguuni, loger lo igiritere nagiran.

¹⁷ Ani pekiira ngesi ngakiro kech, yaa ngakiro daang lotunga a ekanisa. Ani esal kanguna, ani pekiira ngakiro a ngitunga a ekanisa, kisikok ngesi itwaan ni nyenupit Akuj kori eketubukon echur.

¹⁸“Nakaneni kalimokinit ayong esi daang atamar: daang na ingerete esi anakwap, engerio tani ka ama anadis. Nakaneni na ichamunete esi anakwap, echamunio tani anadis.

¹⁹Nabo kalimokinit ayong esi atamar, na epupokinotor ngiarei kus kane anakwap kotere ibore ni ilipasi esi, kisubakinea esi Apakang lo eyei nadis.

²⁰ Kainyo na iriamiriameta ngiarei kori nguuni wapei kotere ekiro kang, kirukit ayong ka kesi kaneni.”

²¹ Bu Petero nia Yesu kingit tama, “Ekapolon arimakini ayong lokaatokang lo kasechanakini ayong jiik ngarimanakinet ngai? Ngakan-kaarei ngakimarunet ngakan-kaarei a?”

²²Tatachu Yesu tama, “Mam, meere ngakan-kaarei nakaneni erai ngatomwon-kaarei ngakimarunet ngakan-kaarei.

²³Kainyo ikoni Apolou a Akuj ne. Ayei kolong ekapolon lo asaki akimichare ngamichae na aarito ngikasubak etich keng.

²⁴Napei esiakinea ngesi akimichare, torikunoe epei lo aarit ngaropiyae ngabunge ngatomon.

²⁵Amam ekasuban etich ngolo ngaropiyae nakaalak na etemokino etachea amicha keng. Nakaneni todung ekapolon ngolo atamar togielarae ngesi ka aberu ka ngide ta awi keng daang taraut ngirikon sodi tatachere amicha.

²⁶Toriedik ekasuban etich kimaima ekapolon tama: ‘Kiapakinae kare! Atachi ayong amicha kon daang’.

²⁷Kisieni ekapolon ngolo ekasuban etich keng torimak, tajalak amicha keng, sodi kimiek ngesi tolot.

²⁸“Topudo ekile ngolo nikalapatan torukau ekasuban etich loche lorukitos keng lo aarit ngadinari amiat apei anikeng. Torwakin ngesi tomied ebala, ‘Tatach amicha kang daang’.

²⁹Tadakakin ekasuban etich lorukitos keng ngolo nalup toriedik kimaima ngesi tama, ‘Kiapakinae kare. Kimiekinae katachakini ayong iyong amicha kon daang’.

³⁰Nakaneni towou ngesi arimakin loche, tama toinikisi loche lojela tanang ni etachea amicha keng.

³¹Na engolikineta ngikasubak etich luche ngakiro na asubakin, apot tongoa noi sodi toloto tolimokis ekapolon ngakiro daang na asubasi.

³²Sodi tanyarau ekapolon ekasuban etich tooma akai tolimok tama, ‘Irai iyong ekasuban etich loaronon, kajalakini ayong iyong amicha kang daang kotere ani kimaimaea iyong ayong.

³³Ejoikinit iyong dang kisieni ekasuban etich erukitos kon loger lo kisienio iyong ayong.’

³⁴Tongo ekapolon noi sodi torikok ekasuban etich ngolo asiger a ejela toenae tanang akolongit na etachea amicha keng daang.”

³⁵Tolim Yesu ngakiro narumoret ebala, “Ngakiro napei nguna ngesi kisubea esi Apakang lo eyei nadis erai pekerimaki ipeikus lokaatokeng alotau keng kadaang.”