Read turkana Matayo 19 Bible Online

Matayo 19 - turkana bible

Matayo 19

¹Na arumorea Yesu ekiruor ngakiro nu, torotok alo Galilaya, toten nakwap a Yudea todoka ekwakaye a angolol a Yorudan.

²Kiwapak asepich a ngitunga nakaalan ngesi kitojok ngesi kesi kaina.

³ Pot Ngiparisayo ngiche esakete akining ngesi kingita tamasi, “Echamakinitae alotal yok elaki ekile aberu keng kotere ibore cha daang ni aronikini ngesi a?”

⁴Tatachu Yesu tama, “Nyisoma esi ngagiran na ebaasi, kolong anakisiakinet, asubuni Akuj ekile ka aberu a?

⁵Sodi tolim Akuj tama, ‘Kotere ngakiro nguna, eisikini ekile apakeng ka itiokeng, sodi kiruko ka aberu keng, tarautu kesi luarei ngipei’.

⁶ Nakaneni nyeringa kesi nabo eraakasi ngitunga ngiarei, nakaneni erai itwaan ipei. Nyejoikinit itwaan etiaki ngini kolong emorik Akuj.”

⁷Kingita Ngiparisayo ngesi tamasi, “Nyo bo alimunitor Musa atamar ani kesaki itwaan akilak aberu keng ejoikinit igirakini abarua na elakit, totiakatar.”

⁸Tatachu Yesu tama, “Kichamakini Musa esi ilakete ngaberu kus kainyo egogong esi ngakies emam kona kitatamio. Nakaneni peekote ngakiro nguna neni nakolong asubunere akwap.

⁹ Kalimokinit ayong esi atamar, itwaan cha daang ni elaki aberu keng peelomit aberu, sodi kiuut aberu ache, eliwor ngesi ekaloman.”

¹⁰Tolimokis ngirukitos keng ngesi tamasi, “Ani kikote neni ngakiro a ekile ka aberu echamit peiutanario.”

¹¹Tatachak Yesu kesi tama, “Meere akitadapet na aka itwaan kadaang. Erai aka ngulu ainaki Akuj ngakiro nguna.

¹²Kainyo egelagela ngakiro napenyechamit ngitunga iutanareta. Ngiche eraakasi ni kolong edounere ikote neni. Ngiche ngitunga kolong esikokinete neni. Ngiche erai nyiutarete kotere Apolou a Akuj. Kimiekisi ngulu iwapito akitatamet ngina kiwapa.”

¹³Torikut ngitunga ngiche ngide nia Yesu esakete ngesi kidokok ngakan keng kidiama kech sodi kilipak. Nakaneni kikilakis ngirukitos keng ngitunga.

¹⁴Tama Yesu, “Kimiekisi ngide luuchik pot nikang. Nyiiratakis kesi kainyo erai Apolou a Akuj aka ngulu ikote lu.”

¹⁵Kidokok ngakan keng nakies kech, ani erumor torotok kaneni.

¹⁶Abuni kolong itwaan nia Yesu kingit tama, “Eketataman, nyo niajokon ejoikinit ayong asubi ataanyunea akiyar na nyedaun?”

¹⁷Tatachak Yesu tama, “Nyo kingisitor iyong ayong atamar nyoni ejok? Eyei epei bon lo ejok. Kiwap ngitalio a Akuj kisaki aanyun akiyar.”

¹⁸Tatachu tama, “Alutalio?” Tatachak Yesu tama, “Nyiiar, nyiilom, nyiikoko, nyiiruor ngakiro na eraakasi alioko.

¹⁹ Toker apakon ka itiokon, sodi tominak ekidunyet kon loger lo iminar iyong elope akwaan kon.”

²⁰Tatachu ekile ngolo tama, “Erichunit ayong ngitalio ngulu daang. Nyo iche echamit ayong asubi?”

²¹Tolimok Yesu ngesi tama, “Ani kisaki iyong araun itwaan ni ikiuna noi, kape togiela ibore daang ni itingit iyong, tokoranak ngikebootok ngaropiyae, sodi min ebari kon kidiama nadis. Ani erumor bu kiwapak ayong.”

²²Na eirarea ekile ngolo nguna, torotok esinyit kainyo abarit ngesi noi.

²³Tolimok Yesu nabo ngirukitos keng tama, “Kalimokinit ayong esi ngakiro na iteni dir abala: egogong noi ngikabarak alomar Napolou a Akuj.

²⁴Alimunit nabo na abala, ebeben ekaal akitor napedot a emutu idwangit eger lo elomarea ekabaran Napolou a Akuj.”

²⁵Na eirareta ngirukitos keng nguna, toiliilikis noi kingita tamasi, “Ani ngae epedori ayuun?”

²⁶Tokienyik Yesu kesi tatachak tama, “Nyepedorosi nguna alotunga, nakaneni ani a Akuj, epedorosi ngakiro daang.”

²⁷ Tolim Petero ngakiro na ekeunit tama, “Tokona abe kiisik bo kolong sua ibore daang kiwapak iyong. Nyoni kianyuni sua?”

²⁸Tolimok Yesu kesi tama, “Toyena atamar akolongit na iboikinor Lokookeng a Itwaan Napolou keng, kilochoi ibore daang toliwor ikitetet, tani esi dang lutomon ka ngiarei lu iraakasi ngirukitos kang, iboikinosi lokicholongo ngitomon ka ngiarei a Napolou, kirirata ngitela lutomon ka ngiarei a Isirael.

²⁹Itwaan daang ni aisiki awi keng, kori ngikaitotoi ka ngakaitotoi keng, kori apa ka itiokeng, kori ngide, kori ngamanat keng kotere ayong, einakinio ngainakinet nakaalak na idwangito amiat apei taanyunite akiyar na nyedaun.

³⁰ Nakaneni ngikaalak lu ingarenete tokona, isidiyorosi, ngikaalak lu isidiyete tokona, ingarenikinete.