Read turkana Matayo 2 Bible Online

Matayo 2 - turkana bible

Matayo 2

¹Edounio Yesu alore a Betleem anakwap a Yudea, arai Erode ekapolon. Napei edounere ngesi, pot ngikoosok alo kide lu aosokinito akisemere ngikanyer tanangut lore a Yerusalem.

²Kingitas tamasi, “Nyaani ikoku ni edoun toliwor Ekapolon a Ngiyaudi? Kingolikini sua etop keng ejupuni alo kide, apotu akilip ngesi.”

³Na eirarea ekapolon Erode ngakiro nguna abu ngesi kialolongo ka ngitunga a Yerusalem daang.

⁴Tochunak ngesi ngimurok luapolok ta ngiketatamak a etal wapei kingit kesi tama, “Aliwae idounere Kiristo?”

⁵Tatachakis ngesi tamasi, “Idounio ngesi alore a Betleem anakwap a Yudea. Egirit ekadwaran a Akuj kona:

⁶ ‘Esi ngitunga a Betleem, lu iyakasi nakwap a Yuda, nyemenitae ere kus alorerea aluapolok a Yuda. Kainyo ebuni ekarikon anikus. Ngolo epolokini Ngisirael lu eraakasi ngitunga kang.’ ”

⁷Tanyara Erode ngipeyok lukoosok kipaka nikech make sodi tongichu anikech esaa ngolo ajupunea etop.

⁸Tomea kesi Betleem kichikak tama, “Kapesi tongichutu ngakiro daang a ikoku. Ani ianyunete ngesi kitolimokis ayong dang sodi atolot akilip ngesi.”

⁹Torotokis kesi na arumoreta ekiruor ka Erode. Toeka etop ngolo sek engolikinete kesi ejupuni ngaren kech tanang nawi na ayei ikoku.

¹⁰Talakaros kesi lokojokon noi na engolikineta etop ngolo.

¹¹Tolomasi kesi kai kingolikis ikoku ka itiokeng Mariam. Toriediko kilipa ngesi. Ani erumor, tangaasi ngichuei kech tolemikis ngesi ngainakinet nugu, egolit ka ekinyaate lokakukunyon ta eche lo ekukuny todwar.

¹²Kichikichikak Akuj kesi kisuraja atamar nyeebongosi ni eyei Erode. Apot kesi kinachasi ebongete nakwap kech.

¹³Arotokinet kech, bu emalaikat a Akuj nia Yosep kisuruja tama, “Tonyou toriko ikoku ka itiokeng towot Misiri, kiboi kaina tanang akolongit nakalimokinea ayong iyong atamar torotok, kainyo esaki Erode akiar ikoku.”

¹⁴Tonyou Yosep toriko ikoku ka itiokeng tolot Misiri nakwaare.

¹⁵ Kiboikin ngesi inaa tanang ngirwa lu atoanea Erode. Asubasi nugu daang sodi kiyookinotor nguna kolong alimuni Ekapolon alokadwaran keng ebala: “Anyarauni Lokookang alo Misiri.”

¹⁶Na ayenunea Erode atamar kengalata ngipeyok lusek apote alo kide, abu tongo lokojokon. Tolim ngesi atamar taarae ngide daang lusapa lu araakasi ngikaru ngiarei ta lu aringa nyeliworo ngikaru ngiarei, alo Betleem ka ngirerea lu kidunyet keng. Tosub ngesi nguna itemem ka ngakiro naalimokinete ngesi ngipeyok iwapap ka esaa ngolo ajupunea etop.

¹⁷Aloger kalo kiyookinos ngakiro nakolong alimuni ekadwaran a Akuj Yeremia ebala:

¹⁸ “Eirario echale alore a Rama, etoil a itwaan igoro, kisutusuta noi. Igoro Rael kotere ngide keng. Tonger ngesi akisililingo. Kainyo amunyar ngide keng muny.”

¹⁹Ekisidi a akitu a Erode, bu emalaikat a Akuj nia Yosep kisuruja alo Misiri

²⁰tolimok tama, “Tonyou toriko ikoku ka itiokeng tobong nakwap a Isirael kainyo atoaka ngulu kolong asakete akiar ikoku.”

²¹Tonyou Yosep toriko ikoku ka itiokeng a ikoku tobongio nakwap a Isirael.

²²Na eirarea ngesi atamar elunyokin Arikelau nados ka apa keng aliwor ekapolon a Yudea, toker Yosep akilom neni. Naechikakinea Akuj Yosep ngakiro nakaalak isurujae, abu ngesi tolot Galilaya.

²³ Tolom ngesi lore lo anyaritae Nasaret, sodi kiyookinotor ngakiro nakolong alimunete ngikadwarak a Akuj atamar: “Enyarao ngesi itwaan a Nasaret.”