Read turkana Matayo 20 Bible Online

Matayo 20 - turkana bible

Matayo 20

¹“Ikoni Apolou a Akuj ne. Eswakakini elope a amana nataparach elilim akigir ngikasubak etich alomana keng.

²Tocham akitach kesi ngaropiyae a akolongit a apei[1] eriyan. Sodi tolimok kesi atamar toloto akisub etich alomana.

³Tobong nabo ngisaae nguuni toten ni agielanareta ngitunga ngiboro sodi kingolik ngitunga ngiche ewaasi emam ibore esubete.

⁴Tolimok kesi tama: ‘Kapesi esi dang tosuba etich alomana, sodi katatach ayong esi ngaropiyae na eriyan’.

⁵Sodi toloto kesi. Na anangea ngisaae ngikan-kapei ka nabo ngikan-koomwon, tosub ngesi ngakiro napei nguna.

⁶Ani nabo ewari enangi ngisaae ngitomon ka epei, tobongo nabo ni egieleta ngitunga ngiboro, toriam ngitunga ngiche ewaasi kaneni. Kingit kesi tama, ‘Nyo ibooyoto esi apaaran juui emam ibore isubete?’

⁷ Tatachakis tamasi, ‘Emam robo itwaan kigir sua akisub etich’. Tolimok kesi tama: ‘Kapesi esi dang tosuba etich alomana’.

⁸“Naawaria, tolimok elope a amana itwaan ni aweikinit luche tama: ‘Tanyara ngikasubak etich kitanyam ngaropiyae a etich kech, kisiak alu esidiyete, tasal alu engarenete’.

⁹Nakinae ngitunga lu esiakinete etich ngisaae ngitomon ka epei ngaropiyae a akolongit a apei.

¹⁰Sodi ani epote ngitunga lu ekingaren, kitama ebaasi kori kiinakinio ngaropiyae nakaalak, nakaneni nakinae kesi dang ngaropiyae a akolongit a apei.

¹¹Tolooso kesi ngaropiyae ni eyei elope a amana kisuburata.

¹²Tolimokis tamasi: ‘Ngitunga lu esidiun lugu asubete etich esaa epei bon, tarai kisubi sua etich atoditasi akolong daang erirae, nyo bo itachea iyong kesi ngaropiyae na eriyan ka nakosi?’

¹³Tatachak elope a amana epei kech tama: ‘Topupok ekone. Nyekamodit ayong iyong. Ichamuni tete iyong akisub etich akolongit apei a ngaropiyae a akolongit a apei.

¹⁴Tolema tokona ngaropiyae a etich kon tolot nawi. Achamunit ayong ainakin itwaan ni ta esidiun en na etia nakainak iyong.

¹⁵Nyejoikinit ayong asubea ngaropiyae kang ngakiro na asaki a? Kori eyei iyong etereku kotere apatanu kang?’ ”

¹⁶ Tolim Yesu ngakiro narumoret tama, “Lu esidiyete kesi ingarenikinete, lu ingarenete, isidiyorosi.”

¹⁷Na alosio Yesu Yerusalem, toriko ngirukitos lutomon ka ngiarei tochada kisuruor anikech make eloose alorot tolimok tama,

¹⁸“Topupokisi! Kilosi tokona ngoni Yerusalem ni erikorere Lokookeng a Itwaan lomurok luapolok a akai a Akuj ka ngiketatamak a etal. Irirate kesi ngesi taara.

¹⁹Sodi erikorio ngesi lobukui lu nyerai Ngiyaudi, sodi tokienatar ngibukui ngulu ngesi kibungata nabo taramakis napir. Nakaneni ani enangi akolongit na a ngauni, kiteyarunae.”

²⁰Sodi bu aberu a Sebedayo nia Yesu ka talokookeng luarei, toriedik alongaren keng, sodi kilip ngesi ibore ni asaki.

²¹Kingit Yesu ngesi tama, “Nyo isaki iyong?” Tatachak ngesi tama, “Kichikakinae kare ayong atamar ani iliwor iyong Ekapolon, iboikinosi ngide lukang lu ka iyong, epei nakan na aloteten, loche nakan na alokedieny.”

²²Tatachak Yesu talokookeng a aberu kangina tama, “Nyiyenete esi na ilipasi. Ipedorete esi akimat ekopo lo aboliaro lo edikino ayong amasi a?” Tatachut tamasi, “Kipedori.”

²³ Tolimok Yesu kesi tama, “Iteni ipedorete esi akimat ekopo lo amasi ayong. Nakaneni meere ayong aseuni atamar ngae iboikin teten kori kedieny kang. Eraakasi ngiwaitin ngulu ngika ngulu eseunit Apakang.”

²⁴Ani iirarete ngirukitos luche lutomon ngakiro nguna, apot tongoikis ngikaitotoi luarei ngulu.

²⁵Sodi tanyarau Yesu kesi daang tochunak wapei tolimok tama, “Iyenete esi atamar epolokinito ngikapolok a ngibukui alu nyerai Ngiyaudi ngitunga kech. Nabo epolokinito ngikarikok kesi noi.

²⁶Nyejoikinit ngakiro ikokinete neni anikus. Ani kesaki ipei kus araun ekapolon, ejoikinit eliwor ekasuban etich aluche.

²⁷Kori ani kesaki ipei kus aliwor lo ingareni, ejoikinit eliwor ekasuban etich kus.

²⁸ Loger a Lokookeng a Itwaan alo peabunit asubakino etich nakaneni akisub etich nabo tajal akiyar keng sodi talachunea ngitunga lukaalak.”

²⁹Na arotokineto Yesu ka ngirukitos keng alo Yeriko, ewapit asepich a ngitunga kesi.

³⁰Ebooyete ngitunga ngiarei lumuduk alokwaas a erukudi. Naeirareta kesi atamar itorunit Yesu diye neni, kiremasi ebalasi, “Lokookeng a Daudi! Kisienoi sua Ekapolon!”

³¹Kikilakis ngitunga kesi esakete kililinga. Nakaneni kiremasi kesi lokojokon noi ebalasi, “Lokookeng a Daudi! Ekapolon! Kisienoi sua!”

³²Towo Yesu tanyara kesi. Kingit tama, “Nyo isakete esi katosubakinea ayong esi?”

³³Tatachakis tamasi, “Ekapolon, kisaki sua tangaar ngakonyen engolikisi akwap.”

³⁴Kisieni Yesu kesi, sodi tatap ngakonyen kech, kingolikis kesi akwap atipei, sodi kiwapakis ngesi.