Read turkana Matayo 22 Bible Online

Matayo 22 - turkana bible

Matayo 22

¹Kisuruor Yesu nabo ngitunga a ngakitadapet kona,

²“Ikoni Apolou a Akuj ne. Ayei ekapolon lo edorokini akimuj a akuuta alokookeng.

³Tomea ngikasubak etich keng tanyarata ngitunga lu anyaraunitae nakimuj, nakaneni towout daang aponere.

⁴Sodi tomea ngikasubak etich tolimok ngakiro na elimokinete ngipeyok ebalasi: ‘Akono akimuj kang tokona. Angol ngimongin kang ka ngaatuk nakatumak. Asubakin ibore daang eriyan. Potu nakimuj a akuuta’.

⁵Nakaneni ngitunga lu anyaraunitae ngulu nyemisikina ngakiro nguna, toloto lotichisio kech. Tolot iche mana keng, iche lodukan keng.

⁶Kirumut luche ngikasubak etich kideta sodi taara kesi.

⁷Tongo ekapolon noi, tomea ngajorei keng, taara ngitunga lu aarete ngikasubak etich keng, sodi kinoma ere kech.

⁸Tanyarau ngikasubak etich keng tolimok tama, ‘Anang esaa lo imujere akimuj a akuuta nakaneni peetemokino eboyor alu anyaraunitae nakuuta.

⁹Tokona, kapesi lorotin tanyarata ngitunga lu cha iriamunete esi daang’.

¹⁰Apot ngikasubak etich toloto lorotin tochunakis ngitunga lu cha ariamunete kesi daang, luajokak ka luaronok, kilelebun ngitunga kai na akuuta ngina.

¹¹“Kirimo ekapolon isemee ngipeyok ngulu sodi kingolik itwaan ipei ni peanapit ngiworui lu iutare.

¹²Kingit ekapolon ngesi tama, ‘Ekone, ikokini iyong ilomuni nege peinapit ngiworui lu iutare ai?’ Tachakin itwaan ngini chek.

¹³ Tolimok ekapolon ngikasubak etich tama, ‘Toena ngesi ngakan ka ngakejen, sodi tochakasi nikalapatan naribu. Kigor kaina tokirich ngikel keng.’ ”

¹⁴Tolim Yesu ngakiro narumoret tama, “Enyaritae lukaalak, nakaneni ekidioko lu eseunio.”

¹⁵Toloto Ngiparisayo atuko eger lo eloketa Yesu a ngakiro ana elimuni.

¹⁶Tomeasi ngirukitos kech ngiche ka ngitunga a atukuoru ka Erode nia Yesu. Tolimokis Yesu tamasi, “Eketataman, kiyeni sua atamar iruoro iyong ngakiro na iteni. Nabo itatami iyong ngakiro na iteni na echamit Akuj alotunga nyimisit iyong ngakiro na itamete ngitunga kainyo nyikachit iyong keyenikinitae itwaan kori kemam.

¹⁷Tolimokinae sua, esibit iyong ejoikinit alotal kosi kibukokini sua ekapolon a Ngiroma echur kori emam?”

¹⁸Kona ayenea Yesu atamar kalokitae a ngakiro anaaronok, tolim tama, “Esi ngikamodeanak! Nyo kilokitotor esi ayong?

¹⁹Kidodikinae chene aropiyat nabuket echur!” Inut ngesi aropiyat,

²⁰sodi kingit kesi tama, “Eka ngae ereet lo ka ekiro lo?”

²¹Tatachut tamasi, “Ngika a ekapolon a Ngiroma”. Sodi tolimok Yesu kesi tama, “Ani keraakasi, nakisi ekapolon a Ngiroma ibore ni erai ikeng, nakis Akuj ni erai ika Akuj.”

²²Tatalasi kesi ngakiro nguna na eirareta, toisikis Yesu kaneni torotokis.

²³Akolongit napei ngina, pot Ngisadukayo ngiche nia Yesu (ebaasi kesi nyeyarunete ngikatoak).

²⁴Tolimokis tamasi, “Eketataman, abala kolong Musa, ani ketoana itwaan ni emam ngide, ejoikinit lokaatokeng irumi aberu ngina, sodi touriut ngide lu eliwor ngika ngolo atoani.

²⁵Ayakasi kolong ngikaitotoi ngikan-kaarei lu alomito ne. Kuuta loapolon totoan nyeanyuna ngide, sodi kirum lokaatokeng aberu ngina.

²⁶Tosubakin ngakiro napei nguna ani eyei lokaatokeng lo a ngiarei, ka lo a nguuni, ta kesi daang lukan-kaarei.

²⁷Ani ekisidi totoan aberu ngina.

²⁸ Tokona, ani akolongit na eyaruneta ngikatoak, eliwor ngesi aberu a ngae? Kainyo arai ngesi aberu alukan-kaarei kangulu kadaang.”

²⁹Tatachak Yesu kesi tama, “Ichwangakinito esi nguna dir ani nyiyeneta esi ngagiran kori agogongu a Akuj!

³⁰Kainyo na eyaruneta ngikatoak, ikokinete kesi ngimalaikae lu eya nadis nakaneni nyiusio kori nyiutanarete.

³¹Nabo akiroit na ebeyo eyarunete ngikatoak, nyisoma esi na kolong kilimokini Akuj a? Alimuni tama,

³² ‘Arai ayong Akuj ka Aburaam ka Akuj a Isaka ta Akuj a Yakobo’. Erai ngesi Akuj alu eyarete, meere alu etoakito.”

³³Tatala asepich a ngitunga akitatamet keng na eirareta ngakiro nguna.

³⁴Na eirareta Ngiparisayo atamar esililing Yesu Ngisadukayo, tochunakin wapei,

³⁵sodi tasak epei kech lo arai eketataman a etal akilok Yesu a ngakiro.

³⁶ Kingit tama, “Eketataman, alital epolot noi alotalio kadaang?”

³⁷Tatachak Yesu ngesi tama, “Tominak Ekapolon Akuj kon a etau kon kadaang ka akiyar kon daang ta ngitamen kon daang.

³⁸Etal lo epolot noi ngesi lo.

³⁹Lo a ngiarei lo epolot lo ikwaan ka lo ekingaren ebala, ‘Tominak ekidunyet kon loger lo iminar iyong ilope akwaan kon.’

⁴⁰ Etal a Musa daang ka ngakitatamet a ngikadwarak a Akuj iwapap ka ngitalio luarei lugu.”

⁴¹Na achunakinotor Ngiparisayo wapei, kingit Yesu kesi tama,

⁴²“Esibit esi Kiristo ngesi ngae? Erai ngesi ales a ngae?” Tatachakis tamasi, “Erai ales a Daudi.”

⁴³Kingit Yesu tama, “Ani nyo bo edodikinea Etau a Akuj Daudi atamar tanyara ngesi, Ekapolon? Alimuni Daudi tama:

⁴⁴ ‘Alimokini Ekapolon Akuj Ekapolon kang tama, kiboikin ne lowae kang lo aloteten tanang ewaakini ngimoe kon kwap ngakejen kon.’

⁴⁵Ani kenyarit Daudi ngesi Ekapolon, ikokini nabo Kiristo eliwor ales a Daudi ai?”

⁴⁶Emam itwaan atachaki Yesu akiroit tani apei, akolongit napei ngina, emam itwaan asak akingit Yesu akiroit ache jik.