Read turkana Matayo 23 Bible Online

Matayo 23 - turkana bible

Matayo 23

¹Kisuruor Yesu asepich a ngitunga ka ngirukitos keng.

²Tolimok tama, “Ngiketatamak a etal ka Ngiparisayo kesi echamakinitae itatamete etal a Musa.

³Ejoikinit inupete nabo kiwapa ibore daang ni cha kilimokinete kesi esi atamar tosuba. Nakaneni nyiisisata ngakiro na esubete kesi, kainyo nyiwapito kesi ngakiro na itatamete.

⁴Ikote kesi ngitunga lu isiwokito luche ngiegosio luapotiok lu nyedakun tarai nyesakete kesi ngikulepek akingarakin kesi akiwok ngiegosio ngulu.

⁵Esubete kesi ngakiro daang esakete ngitunga kingolikis. Kingolikisi ngatoron naapolok na igiritae ngakiro a Akuj na enapito kesi aloreetin kech ka nakan! Kingolikisi tani eger lo isanisanitotor kesi kwap ngiworui kech.

⁶Eminasi akiboi aniajokon imujere, nabo esakete akiboi alokicholongo aluajokak anakais a Atuk.

⁷Esakete kimalae a arimatoi ani egielanareta ngitunga ngiboro nabo esakete kitanyarae, ‘Eketataman’.

⁸Nyechamit esi kinyarao: ‘Eketataman’, kainyo iraakasi esi daang ngikaitotoi lu eyei Eketataman epei bon.

⁹Nabo nyechamit esi inyaraate itwaan kane anakwap: ‘Apa’, kainyo eyei esi Apakus epei bon lo eyei nadis.

¹⁰Kori nabo nyechamit kinyarao: ‘Ekarikon’, kainyo epei bon Ekarikon kus ngesi Kiristo.

¹¹Lo epolot noi anikus ejoikinit eliwor ekasuban etich kus.

¹² Kainyo itwaan cha daang ni itopolouno, itiditeunio, ani ni itiditeuna, itopolounio.

¹³“Oitiakoi! Abe erokearosi nginyas ianyunete esi ngiketatamak a etal ka Ngiparisayo! Esi ngikamodeanak! Igolosi esi ngitunga anapolou a Akuj, nakaneni nyilomete esi dang kori nyingakinete tani lu esakete alomar! [

¹⁴Abe erokearosi ngakiro na ianyunete esi ngiketatamak a etal ka Ngiparisayo! Esi ngikamodeanak! Idemete esi ngapuseru ngiboro kech, ani erumor, kinisakinos ilipito nikooyen akiding pas. Kotere nguna, eroner eriras kus noi.]

¹⁵“Oitiakoi, Abe etioko nginyas eanyunete ngiketatamak a etal ka Ngiparisayo! Esi ngikamodeanak! Idokete esi nganamea pot anakwap anakalonan kitoro nakwapea nakaalak sodi taanyuneta itwaan ipei ni kiwapi esi. Ani kiwapi itwaan ngini esi, kitiliwosi ngesi nikaronon noi ni elosi nakim na nyedunge kidwang aronis keng tani nakus!

¹⁶“Oitiakoi! Abe etioko nginyas ianyunete esi ngikarikok lu ikwaan ka ngitunga lumuduk! Itatamete esi ibalasi, ‘Ani kikong itwaan akai a Akuj, mam ngakiro. Nakaneni ani kikong ngesi egolit lo eyei kai a Akuj, erono.’

¹⁷Esi ngikabangabangae lumuduk! Anibore epolot, egolit kori akai a Akuj na italeuni egolit?

¹⁸Nabo itatamete esi ibalasi: ‘Ani kikong itwaan ekeno lo ipeyonokinere Akuj, mam ngakiro. Nakaneni ani kikong itwaan ainakinet na eyei lokeno lo ipeyonokinere Akuj, erono.’

¹⁹Abe ikote esi ngimuduk dir! Anibore epolot, ainakinet kori ekeno lo ipeyonokinere Akuj lo erai ngesi italeunit ainakinet?

²⁰Aloger kangolo, ani kikong itwaan ekeno lo ipeyonokinere Akuj, ekong ngesi tani ngainakinet daang na eya nakipeyoet,

²¹kori ani kikong itwaan akai a Akuj, ekong ngesi tani Akuj na ibooyi kaneni.

²² Kori ani kikong itwaan Adis, ekong ngesi ekicholong a Apolou a Akuj kangina ibooyi kaneni.

²³“Abe erokearosi noi ngakiro na ianyunete esi ngiketatamak a etal ka Ngiparisayo! Esi ngikamodeanak! Ilemanakinete esi Akuj tani alemikinet apei anatomon a ngikito alu itoboboote akimuj. Nakaneni nyirichakinito esi ngakitatamet naapolok a etal na ikote akitiriyan ngakiro ka akisienut ta ngakiro na iteni. Ejoikinit esi isubete nugu peijamuarito ngache.

²⁴Oitiakoi! Abe etioko nginyas ianyunete esi! Ngikarikok lu ikote ngitunga lumuduk! Igaalionorete esi eechut anakipi ana imaase, nakaneni kilikete bo ekaal!

²⁵“Oitiakoi! Abe etioko nginyas ianyunete esi ngiketatamak a etal ka Ngiparisayo! Esi ngikamodeanak! Ikote esi ngikopoi ka ngatubwae na ilasio nikalapatan bon nakaneni ileleba tooma kus ademanu ka aronis.

²⁶ Wae! Eparisayot lo ikoni itwaan nimuduk! Kilota mono ibore ni eyei tooma ekopo, sodi tosegeror nikalapatan dang!

²⁷“Oitiakoi! Abe etioko nginyas ianyunete esi ngiketatamak a etal ka Ngiparisayo! Esi ngikamodeanak! Ikote esi ngalielin na ipuchitae ekwang, etakanete kesi atamar ejok anikalapatan, nakaneni tooma ileleba ngakoyo a ngikatoak ta ekabose daang.

²⁸Aloger alopei kangolo, ejoikinito ngawat kus nikalapatan ngitunga, nakaneni ileleba amodeanut ka ngasechesea tooma kus.

²⁹“Oitiakoi! Abe etioko nginyas ianyunete esi ngiketatamak a etal ka Ngiparisayo! Esi ngikamodeanak! Ibokete esi ngalielin naajokak kotere ngikadwarak a Akuj nabo itisirete esi ngalielin kangulu kolong ebooyete eboyor loajokon,

³⁰tabaasi nabo: arai kolong atoyakas ngirwa lu kata apakosi pekisubit na asubete kesi ani aareta ngikadwarak a Akuj.

³¹Ichamut esi dir atamar iraakasi ngalesea kangulu aarete ngikadwarak a Akuj.

³²Tosuba tanai napei nguna torumosi nakolong esiakinete ta apaakus!

³³Etige esi luaronok lu ikote ngalesea a ngimunio ka ngarewa! Ikokinete esi ibucharosi aloriras alo a anam a akim ai?

³⁴Kaneni kalimokinit esi atamar ameuni ayong nikus ngikadwarak ka ngikoosok ta ngiketatamak. Iarete esi ngiche kech, iramakinete ngiche napirio, ibungaate ngiche anakais a Atuk kus nabo irimete esi ngirerea iboliatar kesi.

³⁵Kotere nguna, kirirao esi ani iareta ngitunga lu nyesechito, akisiakin anaaret ka Abel alo peasechit tanang naaret a Sekaria lokookeng a Barakia lokolong iarete esi alokiding Akai a Akuj ka ekeno lo ipeyonokinere Akuj.

³⁶ Kalimokinit ngakiro na iteni dir atamar, irirao ngitunga a ngirwa kalu kotere nguna daang!

³⁷“Wae! Ngitunga a Yerusalem! Ngitunga a Yerusalem lu iarete ngikadwarak a Akuj nabo kimasa ngimeanara lu ameuni Akuj nikus a ngamoru! Ngiai ngirwa asakea ayong akilogakin ngakan kang lotunga kus daang, loger lo iudanakinea akokoroit ngitak keng tooma ngabeben keng, nakaneni nyechamuna esi asubi ayong kongina!

³⁸Kemiekinea tokona ayong esi akai kus ibooyi kongin.

³⁹ Kalimokinit esi atamar, napei tokona jik, nyikingolikinete esi ayong nabo tanang akolongit na itamareta: ‘Epiarit Akuj ngolo ebunit a ekiro a Ekapolon.’ ”