Read turkana Matayo 24 Bible Online

Matayo 24 - turkana bible

Matayo 24

¹Torotok Yesu alokai a Akuj, ani eringa elosi, pot ngirukitos keng ni ayei ngesi kidodikis ngesi eger lo edukitere akai a Akuj.

²Nakaneni tolim tama, “Iteete esi nugu daang, kori ai? Kalimokinit ngakiro na iteni atamar, emam tani amoru apei kane na idongi edukokina, eukorio ngamoru daang.”

³Na ebooyo Yesu alomoru a ngikito a akimiet, pot ngirukitos keng kingita ngesi anikech make tamasi, “Tolimokinae sua atamar ori esubakinotor nu daang, nabo nyoni esubakin toyenunere atamar anang abongun kon ka esal a akwap.”

⁴Tatachak Yesu tama, “Tochoikinos! Kuriasi itwaan nyikingal esi!

⁵Epote ngikaalak iruorosi a ekiro kang ebalasi, ‘Ayong arai Kiristo.’ Ingalaate kesi ngitunga lukaalak.

⁶Iirarete esi echale a ejie alodiye, nabo iirarete ngakiro a ejie anikalonan. Nakaneni kuriasi nyikibul, kainyo esubakinosi ngakiro na ikote nguna, nakaneni nyidodiunito kesi atamar anang esal.

⁷Ejikinosi ngitunga a akwap aapei kalu anache, ngitunga a ekapolon a epei eremete ngitunga a ekapolon aloche. Emini eron a akoro ka amaran a akwap lowaitin ngigelagelae.

⁸ Eliwor ngakiro nguna akisiakinet a aboliaro loger a ariaba ana ekingaren ana edolio ikoku akidouno.

⁹“Dio kirumun esi kitoboliare sodi kitaar. Kiremokinosi esi ngitunga a ngakwapea kadaang kotere ayong.

¹⁰Epalikinete ngikaalak anupit Akuj ngirwa ngulu. Elimonorosi ngitunga make sodi toremonokinos make.

¹¹Nabo epote ngikadwarak lukaalak lukaliokok kingalata ngitunga lukaalak.

¹²Kona ekeikinotor naaronok akwap daang, elilimiyorete lukaalak tapalikis amina.

¹³Nakaneni ngini enaikini tanang losal, eyuunio.

¹⁴ Ngakiro Naajokak a Apolou a Akuj nu itatamio anakwapea kadaang toyeneta ngitunga daang, ani erumor tanang esal.

¹⁵“Ingolikinete ‘Ekenyasunan Loaronon noi’ ewei ani italeunitoe, loger lokolong alimunitor ekadwaran a Akuj Daniel. (Toyen ekesoman atamar nyo eger a ngakiro kanu!)

¹⁶Ejoikinit lu eyakasi nakwap a Yudea ematarosi lomoru.

¹⁷Itwaan ni edokit kidiama akai keng nyeetiyaun alemar ibore ni eyei kai.

¹⁸Itwaan ni eyei mana nyejoikinit ebongori alemun eworu keng.

¹⁹Erokearosi noi ngakiro ngirwa ngulu ani a ngaberu ana epotiete ka na itanakete.

²⁰Kilipa Akuj nyimatarosi ngirwa lu akiporo kori akolongit na a Sabato.

²¹Kainyo erokearosi noi ngichan ngirwa ngulu kidwanga daang lu apean nakwap napei kolong anakisiakinet tanang tokona. Kori nyepete nabo jik ngichan lu ikote ngulu.

²² Nakaneni atub kolong Akuj ngirwa ngulu. Arai kolong nyiikok neni, kemam itwaan epuun. Nakaneni kotere ngitunga keng luseuna, atub kolong Akuj ngirwa ngulu.

²³“Ani kilimok esi itwaan tama, ‘Kingolikisi a! Kiristo lo!’ kori tama: ‘Nye ye’, nyiinupa ngakiro keng.

²⁴Kainyo epote ta Kiristo lukaliokok ka ngikadwarak lukaliokok. Esubete kesi ngakitoodikinet nakailiilok ka nakatalarak esakete akingalare tani ngitunga luseuna a Akuj, erai kepedorete akingalare.

²⁵ Kiirasi! Kalimok ayong esi nu eringa ngirwa ngulu nyenanga.

²⁶“Kori ani kilimokis esi ngitunga tamasi: ‘Ayoro, eyei ngesi ama nariet’, nyiilot inaa, kori ani ketamasi: ‘Ayoro, edukit kane.’ Kuriasi nyiinupa!

²⁷Kainyo ikoni abunere a Lokookeng a Itwaan eger lo imiliaunea napei alo kide tanang too.

²⁸ “Nicha eyei ibore nikatoan, ngesi ni iudakina ngataruk.

²⁹“Atipei na edaunotor ngichan a ngirwa kangulu, eribokini akolong, tojongo elap akicha. Echakunosi ngikanyer anadis, nabo emaranikini agogongu daang nakaninikan eyei kidiama.

³⁰Nakaneni etakanuni akitoodikinet a Lokookeng a Itwaan anadis. Ikalounete ngibukui daang anakwapea na ingolikineta Lokookeng a Itwaan etiyaun eyei lodowon a adis, etiyaun ngesi a agogongu ka apolou naapolon noi.

³¹ Ekutakinio aburuch sodi tomea ngesi ngimalaikae keng lowaitin daang a akwap sodi tochunut ngitunga luseuna a Akuj alowae a epei a akwap tanang lowae loche.

³²“Kimiekisi ngakiro a emeyen kitatama esi. Na epuseakuuneta ngaten keng tokilikiluut sodi kiniapasi ngakui, iyenunete atamar aapuu akamu.

³³Aloger alopei kangolo, na ingolikineta esi ngakiro nu daang toyena atamar aapiki ngesi adolun.

³⁴Kalimokinit ngakiro na iteni dir atamar esubakinosi ngakiro nu daang eringa epewae a ngitunga alu tokona eyarete nyetoaka.

³⁵Edaun adis ka akwap, nakaneni nyedaunosi ngakiro kang jik.

³⁶“Nakaneni emam itwaan eyeni akolongit ngina kori esaa atamar enangi ori, nyeyenete tani ngimalaikae anadis kori nyeyeni Lokookeng a Akuj. Apa bon ngesi eyeni.

³⁷Ikwaanikin abunere a Lokookeng a Itwaan ka ngirwa lu kolong a Noa.

³⁸Kolong eringa nyenanga ngirwa lu aburuchiareta ngakipi akwap, emujete ngitunga, tamaase. Eutanarete ngikiliok nabo epotonorio ngapesur kuutae tanang akolongit na alomarea Noa tooma natubwa.

³⁹Nyeyenuna kesi jik na asubasi tanang epote ngakipi tomunyasi kesi daang. Ikokinete ngakiro neni na ebunio Lokookeng a Itwaan.

⁴⁰Esaa ngolo, esubete ngitunga ngiarei etich alomana. Elemario ipei kimiekinae niche.

⁴¹ Eriamunio ngaberu ngaarei iriete, elemario apei, kimiekinae nache.

⁴²“Kiboikinos robo irichuna kainyo nyiyenete esi akolongit na ebunio Ekapolon kus.

⁴³Nakaneni kalimokinit ngakiro na iteni atamar arai toyeni elope a awi akwaar na ebunio ekokolan, kekieny ngesi kiteu ekokolan nyeelom nawi keng.

⁴⁴ Kotere nguna, ejoikinit tani esi dang iboikinosi isubakina eriyan, kainyo ebuni Lokookeng a Itwaan esaa lo nyitamitotor esi atamar ebuni ngesi.

⁴⁵“Ngae tokona erai ekasuban etich lokooson lo emunoi? Ngesi ngolo alimoki ekapolon keng atamar topolok ngikasubak etich luche, nanak kesi akimuj na enangea esaa.

⁴⁶Elakar noi ekasuban etich ngolo na ebongunio ekapolon nawi toriam ngesi iwapit nguna!

⁴⁷Kalimokinit ngakiro na iteni dir atamar, elimokini ekapolon ngolo ekasuban etich ngolo atamar topolok ebari keng daang.

⁴⁸Nakaneni ani kerai ngesi ekasuban etich loaronon, etamari ngesi kori nyebonguni ekapolon keng atipei.

⁴⁹Elomakini ngesi akibungare ngikasubak etich luche, nabo kimuja ngesi ka akimat aapei kalu ilewat.

⁵⁰Ebonguni ekapolon a ekasuban etich kangolo akolongit ache a esaa alo nyeyenea ngesi atamar ebuni.

⁵¹Iteli ekapolon ngolo ngesi tapak ngaarei, kikwaanikinos ngesi ka ngikamodeanak. Min ngesi ni igoror sodi tokirich ngikel.