Read turkana Matayo 25 Bible Online

Matayo 25 - turkana bible

Matayo 25

¹“Akolongit ngina, ikokini Apolou a Akuj ne. Ayakasi kolong ngapesur ngatomon na alemunete ngataae kech, toloto akisiriamiar ekeutan.

²Abangaaka ngakan, toosok nache nakan.

³Tolemasi nakan nabaang ngataae kech nakaneni emam akimiet apot totinga.

⁴Totinga nakoosok ngataae kech ka ngiboro lu eleleba akimiet.

⁵ Totinenik ekeutan abunere, kisiakis ngapesur akilura, tojotooros.

⁶“Nakaneni ani enangi kiding akwaar, tochalu echale ebala: ‘Ekeutan lo! Potu kisiriama!’

⁷Tonyout ngapesur natomon nguna tosubanakis ngataae kech.

⁸Sodi tolimokis nabaang nakoosok tamasi: ‘Nakinae sua akimiet nakus epewae kainyo ekot ngataae kosi adungere.’

⁹Tatachut nakoosok tamasi, ‘Mam jik! Mam na itemokino esi ka sua. Kapesi lodukan togielut nakus.’

¹⁰Toloto ngapesur nabaang akigiel akimiet. Ani arotokinet kech, todolu ekeutan. Ngapesur nakan na edarito esubakina eriyan, tolomasi ka ngesi kai na eutare sodi togoloi ekidor.

¹¹“Ani ekisidi, todolut ngapesur nache tanyaras ebaasi, ‘Ekapolon! Ekapolon! Tangaarae sua atolomutu’.

¹² Tatachak ekile lo euta tama: ‘Iteni dir, nyakayeni ayong esi jik.’ ”

¹³Sodi torumo Yesu ebala, “Kiboikinos robo irichuna, kainyo nyiyenete akolongit kori esaa.

¹⁴“Akolongit ngina ikokini Apolou a Akuj ne. Ayei kolong itwaan ipei ni anyouni alosit. Tanyara ngesi ngikasubak etich keng tolimok atamar toweikis ebari keng.

¹⁵Tokorak ngesi ipei kech daang itemit ka aosou keng. Tokorak epei ngaropiyae ngabunge ngakan, loche ngabunge ngaarei, ta loche abunget apei. Ani erumor, tonyou ngesi tolot.

¹⁶Tolot ekasuban etich lo ainakinitae ngaropiyae ngabunge ngakan tosubea ngaropiyae keng emuchuruseenu taanyu nabo ngaropiyae ngabunge ngakan ngache.

¹⁷Konginapei, ekasuban etich lo ainakinitae ngaropiyae ngabunge ngaarei, toriam nabo ngaropiyae ngabunge ngaarei.

¹⁸Nakaneni tolot ekasuban etich lo ainakinitae ngaropiyae abunget apei, tobokak akipany nalup, sodi kiwaa ngaropiyae a ekapolon keng.

¹⁹“Adaunet a ngirwa alukaalak, tobong ekapolon a ngikasubak etich kangulu sodi tolomak akimar ngaropiyae ka kesi aapei.

²⁰Bu ekasuban etich lo ainakinitae ngaropiyae ngabunge ngakan kipoto ngaropiyae ngabunge ngakan nache. Tolim tama: ‘Ekapolon, kiinakini iyong ayong ngaropiyae ngabunge ngakan. Kingolik a! Ariam ayong ngaropiyae ngache ngabunge ngakan nyenu.’

²¹Tolim ekapolon keng tama, ‘Ejok noi ekasuban etich lo kimunoi. Kona iliworor iyong lo kimunoi kitalala ibore niichi, kewaakini iyong topolok nikaalan. Bua atalakaros ka ayong aapei’.

²²Bu ekasuban etich lo ainakinitae ngaropiyae ngabunge ngaarei tama, ‘Ekapolon, kiinakini iyong ayong ngaropiyae ngabunge ngaarei. Kingolik a! Ariam ayong ngaropiyae ngabunge ngaarei ngache nyenu.’

²³Tolim ekapolon keng tama: ‘Ejok noi ekasuban etich loajokon nabo lo kimunoi. Iliwor iyong lo kimunoi italala ibore niichi, kewaakini iyong topolok nikaalan. Bua atalakaros ka ayong aapei.’

²⁴Sodi bu ekasuban etich lo ainakinitae ngaropiyae abunget apei tama: ‘Ekapolon, ayeni ayong atamar irai iyong itwaan nikaadengan. Ilemi iyong ngalemet ani nyitakinit iyong, nabo ichuni ngimomwa ani nyitakina iyong ngikinyam.

²⁵Aemi ayong, sodi atolot ewaa ngaropiyae kon analup. Kingolik a! Nakon kesi nu.’

²⁶Tolim ekapolon keng tama, ‘Irai iyong ekasuban etich loaronon lokalany! Iyeni iyong atamar alemi ayong ani nyitakina nabo achuni ngimomwa ani nyialakina ngikinyam a?

²⁷Ani kikote neni a, nyo peiwaakinea iyong ngaropiyae kang nabengki ani abonguni ayong atoriam kiatakin?

²⁸Tokona a, tolemasi ngaropiyae anikeng sodi nakis ngolo eya ngaropiyae ngabunge ngatomon.

²⁹Kainyo itwaan daang ni eyei ibore, einakinio ni elal ni idwangi ibore ni esakit ngesi. Nakaneni itwaan ni emam ibore eyei, edemario tani nidiochichi ni etingi.

³⁰ Ani eliwor ekasuban etich lo erai pas lo, tochakasi ngesi nikalapatan naribu, kigor kaina tokirich ngikel.’

³¹“Naebunio Lokookeng a Itwaan erai Ekapolon kirukut ka ngimalaikae daang, iboikin ngesi lokicholong keng a Apolou.

³²Echununosi ngitunga a ngakwapea kadaang ngaren keng. Sodi totiak ngesi kesi ngatiaket ngaarei loger lo etiakea ekeyokon ngamesekin ka ngakinei.

³³Isibaki ngamesekin aloteten sodi kisibak ngakinei alokedieny keng.

³⁴Sodi tolimok Ekapolon ngitunga lu eya teten keng tama, ‘Potu esi lukipiarit Apakang! Potu Napolou na itegeliaritae kotere esi napei kolong anasubakinet a akwap.

³⁵Kainyo kanyamit ayong akoro, sodi kisimuja esi ayong. Kanyamit akure, kitamat esi ayong. Arai epeyonon, kitepeyon esi anawiyei kus.

³⁶ Amam ibore anapit kitanap esi ayong ngiworui. Adeaka ayong sodi kitochoikis esi ayong, nabo ayei lojela pot esi aanyun ayong.’

³⁷“Sodi etachakinete lu etenoono eboyor ngesi tamasi, ‘Ori Ekapolon kiteo sua iyong kinyamit akoro esumuja, kori kinyamit akure ainakisi ngakipi?

³⁸Ori kiriamunea sua iyong irai epeyonon etepeyono anawiyei kosi, kori emam ibore inapit etanapa ngiworui?

³⁹Ori kingolikinea sua iyong ideaka kori kienitae alojela apotu aanyun?’

⁴⁰Etachuni Ekapolon tama, ‘Kalimokinit ngakiro na iteni atamar na isubeta esi nugu epei a ngikaitotoi kang a luuchik kalu, kisubeta esi ayong!’

⁴¹Sodi elimokini lu alokedieny keng tama: ‘Kapesi anikang, esi lu kilamit Akuj. Kapesi nakim na nyedunge na esubakinitae kotere Ekipe ka ngimalaikae keng!

⁴²Kanyamit ayong akoro, nakaneni nyisimuja esi ayong. Kanyamit akure nabo nyitamata esi ayong.

⁴³Arai ayong epeyonon nakaneni nyitepeyono esi ayong anawiyei kus, nabo amam ibore anapit nakaneni nyitanapa esi ayong ngiworui. Adeaka nabo kaenitae alojela, nakaneni nyechoikina esi ayong.’

⁴⁴Etachakinete ngesi tamasi, ‘Ori Ekapolon kiteo sua iyong kinyamit akoro kori kinyamit akure kori irai epeyonon kori emam ibore inapit kori ideaka kori kienitae alojela, nakaneni atowoutu sua akingarakin iyong?’

⁴⁵Etachakini Ekapolon kesi tama, ‘Kalimokinit ngakiro na iteni atamar, na iwouneta esi akingarakin epei a ngikaitotoi kang a luuchik kalu, iwounito akingarakin ayong.’

⁴⁶ Eyaario ngulu loriras lokajik. Nakaneni eloose lu etenoono eboyor nakiyar nakajik.”