Read turkana Matayo 26 Bible Online

Matayo 26 - turkana bible

Matayo 26

¹Na arumorea Yesu akitatam ngakiro nugu daang, tolimok ngirukitos keng tama,

² “Iyenete esi atamar edong ngirwa ngiarei tanang akolongit na esukukuu alo enyaritae Adeparet, sodi torikoe Lokookeng a Itwaan taramakinae napir.”

³Sodi apot ngimurok luapolok a akai a Akuj ka ngikasukou a Atuk kiriamariama aapei kai a Emuron a Loapolon enyaritae Kayapa,

⁴totuko eger lo irumuneta Yesu peeyenio sodi taareta.

⁵Tamasi kesi, “Nyejoikinit kirumuni ngesi ngirwa lu esukukuu kainyo elomakinete ngitunga ekurikur.”

⁶Ayei Yesu Betania kai a Simon, a itwaan ani adeaka sek enomokere.

⁷Ani eringa Yesu imuji, bu aberu nikeng etingit echupa lokooyen enyaritae alabasita lo ileleba akimiet nakaakunyon na egielio a ngaropiyae anakaalak noi, dio tobukok akimiet nakou a Yesu.

⁸Nakaneni tongoa ngirukitos keng na engolikineta nguna. Kingitas ebaasi, “Nyo inyasunitere akimiet nakaakunyon naga kona?

⁹ Adikino akimiet na peegielario a ngaropiyae anakaalak sodi nakinae ngikebootok ngaropiyae a?”

¹⁰Kona ayenea Yesu na eruorosi kesi, kingit kesi tama, “Nyo ichaneta esi aberu na? Kasubakinea ngesi ayong etich loajokon noi.

¹¹Irukito esi ka ngikebootok jiik, nakaneni nyikiruki ayong ka esi jiik.

¹²Abukokini ngesi akimiet nakaakunyon nakwaan kang sodi katonukere ayong.

¹³ Kalimokinit esi ngakiro na iteni atamar, wadaang ni cha itatamere Ngakiro Naajokak a Akuj anakwapea, elimorio aberu na kotere ngakiro na asub ngesi nu.”

¹⁴Tolot Yuda Isikariote lo erai epei a ngirukitos alutomon ka ngiarei lomurok luapolok a akai a Akuj,

¹⁵kingit kesi tama, “Kiinakinete esi ayong nyo karikok ayong esi Yesu?” Kimarut kesi ngaropiyae ngatomwon-uni sodi nakis ngesi.

¹⁶ Akolongit ngina tasak Yuda jik erot lo erikokinea kesi Yesu.

¹⁷Akolongit na ingareni akolongit na esukukuu a Ngamugati Anapadok, pot ngirukitos a Yesu kingita ngesi tamasi, “Aliwae isaki iyong sua atoloto atosubakineta akimuj a esukukuu a Adeparet?”

¹⁸Tatachak kesi tama, “Kapesi nitwaan idio a ere, tolimokis ngesi tamasi, ‘Ebala Eketataman anang esaa lokimuja ngesi ka ngirukitos keng akimuj a esukukuu a Adeparet alokai kon.’ ”

¹⁹Tosuba ngirukitos loger lo alimokinitor Yesu, tosubakis akimuj a esukukuu a Adeparet.

²⁰Na anangea ebong, kiboikinos Yesu ka ngirukitos lutomon ka ngiarei kimuja.

²¹Ani eringa imujete, tolim Yesu tama, “Kalimokinit esi ngakiro na iteni atamar, karikokini epei kus ayong ngitunga.”

²²Apot ngakiro nguna tonoma ngirukitos keng na eirareta tolomakis akingitanar ngesi a ngapeipei ebalasi, “Ekapolon! Kori erai robo ayong?”

²³Tatachak Yesu kesi tama, “Lo ilumokinit amugati tooma natubwa ka ayong aapei ngesi karikokini ayong ngitunga.

²⁴ Etoani Lokookeng a Itwaan loger lo igiritere nagiran, nakaneni etioko nginyas lu eriamuni itwaan ni erikokini Lokookeng a Itwaan ngitunga! Kejoikinit kolong itwaan ngini peidounitoe!”

²⁵Sodi abu Yuda lokarikokinan Yesu ngitunga tolim tama, “Eketataman, kori robo ayong?” Tatachak Yesu ngesi tama, “Ilim iyong.”

²⁶Ani eringa imujete, tolem Yesu amugati kilip ebuakinit Akuj alakara, sodi tonyilinyili, nak ngirukitos keng tama, “Totinga tanyama, akwaan kang ngesi na.”

²⁷Sodi tolem ngesi ekopo, kilip ebuakinit Akuj alakara, nak kesi. Tolim tama, “Tamata esi daang.

²⁸Ngaakot kang nu na iyookinete achamunet a Akuj, eraakasi kesi ebukorosi kotere arimakino a ngasechesea a ngitunga alukaalak.

²⁹ Kalimokinit esi ngakiro na iteni atamar, nyamasi nabo jik emuna lo epuritoe lo tanang akolongit ngina amasea emuna lo epuritoe lokitetet ka esi aapei Anapolou ka Apakang.”

³⁰Sodi toeokis eos ani erumor, torotokis toloto moru lo a ngikito a akimiet.

³¹ Tolimok Yesu kesi tama, “Nakwaare a akolongit kana, kikadakinete esi daang ngakiro kang, kitoisikis ayong bon, kainyo igiritae nagiran kona, ‘Eari Akuj ekeyokon, sodi topetar esipanit a ngamesekin.’

³² Nakaneni naketeyarunea Akuj ayong, kengarenikini ayong esi atolot Galilaya.”

³³Tolimok Petero Yesu tama, “Nyekaisikini ayong iyong jik, tani kiisikis luche daang!”

³⁴Tolimok Yesu Petero tama, “Kalimokinit ngakiro na iteni atamar, takae nakwaare, eringa ekokoroit nyerukino, ilimuni iyong ngalimunet ngauni atamar nyikiyeni ayong.”

³⁵Tatachak Petero tama, “Nyalimuni ayong atamar nyakayeni iyong jik, tani ketamar kaario ayong ka iyong aapei!” Apot ngirukitos luche daang tolimut ngakiro napei nguna.

³⁶Apot Yesu ka ngirukitos keng toloto ni anyaritae Getisemane, tolimok kesi tama, “Kiboikinos esi nege atolot ayong ama elip.”

³⁷Toriko ngesi Petero ka talokookeng a Sebedayo luarei. Toriaba ngakiro etau keng nabo kisialolongo noi.

³⁸Sodi tolimok kesi tama, “Kanomito ayong ngakiro nu etau edikino tani kaarete! Kiboikinos nege atokienya ka ayong aapei.”

³⁹Torotok ngesi ngaren wadio, tadakakin kwap kijuuru, sodi kilip tama, “Apa, ani kepedor, tolema kare ekopo lo aboliaro lo anikang, nakaneni meere loger lo asaki ayong, pearai lo isaki iyong.”

⁴⁰Sodi tobongu toriam ngirukitos luuni ejotoote, kingit Yesu Petero tama, “Nyo peikienyeta esi luuni ka ayong tani a esaa a epei bon?

⁴¹Tokienya, kilipa sodi nyianyunosi ka akiningo. Echamit etau nakaneni nyechamit akwaan.”

⁴²Tolot Yesu nabo inaa kilip ebala, “Apa, ani pekelemar ekopo lo anikang, tosubakin na ichamit iyong.”

⁴³Tobongu Yesu nabo toriam ngirukitos ejotoote. Apot kesi tokuruwo akikieny.

⁴⁴Toisik Yesu kesi nabo, tolot kilip na a ngauni, elimuununi ngakiro napei nguna.

⁴⁵Sodi tobongu lorukitos keng kingit tama, “Eringa esi natete ijotoote iangarito a? Kingolikisi a! Anang esaa lo erikorere tokona Lokookeng a Itwaan napolou a ngikasechak.

⁴⁶Tonyoutu atoloto. Kingolikisi a! Lokarikokini ayong ngitunga ngesi lo adolu.”

⁴⁷Ani eringa Yesu iruoro, todol Yuda lo erai epei a ngirukitos alutomon ka ngiarei. Arukito ngesi ka ajore a ngitunga alu atingito ngilengea ka ngiseboe. Ameunito kesi ngimurok luapolok a akai a Akuj ka ngikasukou a Atuk.

⁴⁸Alimokinit lo arikokinit ngesi ngitunga ebala, “Itwaan ngini emalae ayong atonuak, ngesi ngolo, kirumutu ngesi!”

⁴⁹Kidira Yuda jik nia Yesu tolim tama, “Eketataman, min ekisil nikon, dio tonuak ngesi.”

⁵⁰Tatachak Yesu tama, “Kiburuburak mono iyong nguna ekone!” Pot kesi kirumut Yesu totinga lokojokon.

⁵¹Tout epei kangulu arukito ka Yesu ekileng totubo akit a ekedalan a Emuron a Loapolon a akai a Akuj.

⁵²Tolimok Yesu ngesi tama, “Kirepak ekileng kon nakiroru, kainyo daang lu elemunete ekileng etoanikinete lokileng.

⁵³Nyiyeni iyong atamar apedori ayong alimokin Apakang atamar kingarakinae sodi tomeu ngesi atipei ngajoresio a ngimalaikae ngatomon ka ngaarei a?

⁵⁴Ani kikokis neni, ikokinete ngagiran iyookin na ebalasi, ejoikinit nu esubakin ai?”

⁵⁵Tolimok Yesu ajore ngina tama, “Nyo tokona iponitotor esi itingito ngilengea ta ngiseboe akirumun ayong ikwa ibore esibit arai ayong erukoot? Ngirwa daang eboyeene ayong alokai a Akuj etatami nakaneni nyirumuna esi ayong.

⁵⁶ Nakaneni asubakin nugu daang kiyookinotor na egirete ngikadwarak a Akuj nagiran.” Sodi tamataros ngirukitos daang toisikis ngesi.

⁵⁷Apot ngitunga lu erumunete Yesu torikosi ngesi kai a Kayapa alo arai Emuron Loapolon a akai a Akuj. Achunakina ngiketatamak a etal ka ngikasukou a Atuk neni.

⁵⁸Kiwap Petero Yesu echadakina tanang nalaar a akai a Emuron a Loapolon a akai a Akuj. Toloma ngesi tooma nalaar kiboikinos ka ngasigerea, idarunit na esubakinosi.

⁵⁹Toripa ngimurok luapolok a akai a Akuj ka ngikasukou a Atuk daang ngakiro na alioko na itinganakinete Yesu, sodi taareta ngesi.

⁶⁰Nakaneni emam na aanyut kesi, tarai bo anyounete lukaalak kisudioto ngesi ngakiro. Ekisidi tonyout ngitunga ngiarei

⁶¹ tamasi, “Abala itwaan en, apedori akibwang akai a Akuj atodukok nabo a ngirwa nguuni atorumo.”

⁶²Tonyou Emuron Loapolon a akai a Akuj kingit Yesu tama, “Eya ngakiro isaki iyong atachun alotitas alo kititakinitere iyong kalo a?”

⁶³Nakaneni kililing Yesu chek. Kisuruorik nabo Emuron Loapolon a akai a Akuj ngesi tama, “Kotere ekiro a Akuj ana eyari, kesikongi ayong iyong, tolimokinae sua kirai iyong Kiristo, Lokookeng a Akuj.”

⁶⁴ Tatachak Yesu ngesi tama, “Kesi nguna ilimu iyong. Nakaneni kalimokinit ayong esi daang atamar, napei tokona jik, ingolikinete esi Lokookeng a Itwaan ibooyi alowae alo aloteten a Akuj Anaapolon Noi, nabo ebuni alotooma ngidowon a Adis.”

⁶⁵Na eirarea Emuron Loapolon a akai a Akuj ngakiro nu, tochilichili ngiworui keng tama, “Kiirasi ngimeny keng! Nyeringa nabo kisaki ngikaanyunak ngiche! Iirasi tokona esi ngimeny keng.

⁶⁶ Ibalasi tokona esi ai?” Tatachut tamasi, “Esechit ngesi, ejoikinit eario.”

⁶⁷Sodi kimaanakis ngakimul loreet keng, nabo kideta ngesi. Kingita lu ebapanarete ngesi tamasi,

⁶⁸“Todwar chene Kiristo! Tolimokinae sua itwaan ni kirami iyong!”

⁶⁹Na ebooyo Petero alotooma alaar, kitoru apese neni na arai akasuban etich a Emuron a Loapolon a akai a Akuj, tolimok ngesi tama, “Irukito iyong dang ka Yesu lo a Galilaya?”

⁷⁰Nakaneni topeg ngesi alongaren kech kadaang. Tatachak tama, “Nyayeni ayong ngakiro na iruoro iyong.”

⁷¹Tolot ngesi lokidor a alaar. Kingolik nabo apese ache nakasuban etich ngesi sodi tolimok ngitunga luka neni tama, “Awaasi ngesi ka Yesu lo a Nasaret.”

⁷²Topeg nabo Petero tama, “Ekong jik, nyayeni ayong itwaan ngini!”

⁷³Adaunet a esaa alodiochichi, pot ngitunga lu awaasi kaneni nia Petero tamasi, “Irai iyong dang epei kech dir, kainyo idodiunit tani ekiruor kon.”

⁷⁴Sodi tama Petero, “Ekong jik kataar ibore, eruoro ayong ngakiro na iteni! Nyayeni ayong itwaan ngini.” Toruk ekokoroit esaa lopei ngolo.

⁷⁵Dio kitam Petero ngakiro nasek alimokinit ngesi Yesu Abala: “Ani eringa ekokoroit nyerukino, ilimuni iyong ngalimunet ngauni atamar nyikiyeni ayong.” Topudo ngesi nikalapatan, kikalou lokojokon.