Read turkana Matayo 27 Bible Online

Matayo 27 - turkana bible

Matayo 27

¹Nataparach elilim, apot ngimurok luapolok a akai a Akuj daang ka ngikasukou a Atuk totuko eger lo eareta Yesu.

²Toena ngesi a ngiriko, sodi torikosi nia Pilato alo arai ekapolon a Ngiroma.

³Na ayenea Yuda lo arikokini Yesu ngitunga atamar erirae Yesu, abu tokii kotere akisech keng sodi tobua ngaropiyae natomwon-uni lomurok luapolok a akai a Akuj ka ngikasukou a Atuk.

⁴ Tolim ngesi tama, “Asech ayong ani arikokinea itwaan ni nyesechit ngitunga taarae.” Tatachut kesi tamasi, “Eraakasi nguna ngaka akiding kon, emam sua itwaan ekachit nguna!”

⁵Kimasak Yuda ngaropiyae kwap tooma akai a Akuj, dio arotokin tolot tomied.

⁶Tolemut ngimurok luapolok a akai a Akuj ngaropiyae nguna tamasi, “Eraakasi nu ngaropiyae a ngaakot, nakaneni nyechamakinitae alotal yok ebuakinio kai a Akuj.”

⁷Tachamakin kesi atamar kigielea ngaropiyae nguna Amana a Ekayen Ngamoti, sodi tomuranakinae ngitunga lu nyerai ngikulepek a akwap kangina.

⁸Ngakiro nguna ngesi enyaritere amana ngina: “Amana a ngaakot” tani tokona.

⁹Nakaneni kiyookin na alimuni ekadwaran Yeremia ebala, “Tolemasi kesi ngaropiyae natomwon-uni (ekimar lo achamunito Ngisirael atachakin ngesi),

¹⁰ togieleta amana a ekayen ngamoti, loger lo kadungokinitor Ekapolon ayong.”

¹¹Towo Yesu alongaren ekapolon a Ngiroma lo engitanari ngesi ebala, “Iyong irai ekapolon a Ngiyaudi a?” Tatachak Yesu tama, “Ee, nyenguna ilimu iyong.”

¹²Nakaneni nyetachea Yesu ngakiro na etitaata ngesi ngimurok luapolok a akai a Akuj ka ngikasukou a Atuk.

¹³Sodi kingit Pilato ngesi tama, “Nyipupi iyong ngakiro nakititaare iyong nu a?”

¹⁴Nakaneni towou Yesu atachun tani akiroit apei, sodi tatalasi ekapolon a Ngiroma ngakiro nguna noi.

¹⁵Akolongit daang na esukukuu a Adeparet, alachanakini ekapolon a Ngiroma itwaan ipei alojela ni alimunete ngitunga atamar talachakinae.

¹⁶Ngirwa ngulu, ayei itwaan niaronon niyanat ni aenitae alojela, anyaritae ekiro keng Yesu Baraba.

¹⁷Na achunakinor asepich a ngitunga kingit Pilato kesi tama, “Ngae isakete esi atalachak, Yesu Baraba kori Yesu lo enyaritae Kiristo?”

¹⁸Ayeni ngesi dir atamar arikunito kesi Yesu nikeng ani erakaritor kesi etereku kotere Yesu Kiristo.

¹⁹Na ebooyo Pilato alokai keng ana eriras, tomeu aberu keng itwaan tama, “Kimiek itwaan ngini nyesechit, kainyo erujae ayong been nakwaare atoriab noi kotere ngesi.”

²⁰Apot Ngimurok Luapolok a akai a Akuj ka ngikasukou a Atuk kitutuko asepich a ngitunga tolimokis Pilato atamar talachakinae Baraba sodi taarae Yesu.

²¹Nakaneni kingit ekapolon a Ngiroma kesi tama, “Ngae aluarei kalu isakete esi atalachak ayong?” Tatachut tamasi, “Baraba!”

²²Kingit Pilato kesi tama, “Tokona, ekokini ayong Yesu lo enyaritae Kiristo ai?” Tatachut daang tamasi, “Taramakisi ngesi napir!”

²³Nakaneni kingit Pilato tama, “Nyo niaronon esubit ngesi?” Sodi tochalut kesi noi kiremasi tamasi, “Taramakisi ngesi napir!”

²⁴ Na engolikinea Pilato atamar nyejoikinit nabo eruoro ani edikino ngitunga elomakineta ekurikur, abu tolem ngakipi kilotarea ngakan keng alongaren ajore ebala, “Nyakapaikinio ayong akitu a itwaan ka en! Esi isubakis nu!”

²⁵Tatachu asepich a ngitunga tama, “Kimiek eriras a akitu keng toliwor ekosi ka ngide kosi!”

²⁶Sodi talachak Pilato Baraba, dio alimun atamar kidetae Yesu a ngamunyororoi, ani erumor, kipotoroe taramakinere napir.

²⁷Torikosi ngasigerea a Pilato Yesu tanang kai a ekapolon a Ngiroma, tochunun asepich a ngitunga daang kiriam ngesi.

²⁸Tobutosi ngiworui keng sodi kitanapa ngesi eworu loarengan puu.

²⁹Kidanyakis apukot a ngiikwa kitanapa ngesi anakou, sodi kipeakis aburo nakan keng na aloteten, ani erumor toriediko alongaren keng tokienatar ngesi ebaasi, “Kimiekisi Ekapolon a Ngiyaudi kipuruunoe!”

³⁰Kimaakis ngesi ngakimul, tolemut aburo tarama ngesi nakou.

³¹Na arumoreta akianar ngesi, talachasi eworu ngolo sodi kitanapa ngesi ngiworui lukeng. Dio torikosi ngesi nikalapatan aramakin napir.

³²Ani eringa kesi eloose, kiriamunos ka itwaan ni abuni alo Kurene ni enyaritae ekiro keng Simon, sodi kitingakis ngasigerea ngesi akiwok apir a Yesu.

³³Tanangut ni enyaritae Gologota, eger keng atamar, “Nia Akulului a Akou.”

³⁴ Nakis kesi Yesu kaneni emuna lo epuritoe lo imorikina ka apid. Nakaneni na eirea ngesi, towou akimat.

³⁵Taramakis ngesi napir, dio tokora ngiworui keng emoriate tobolos.

³⁶Ani erumorosi nguna, kiboikinos kesi neni kiteto ngesi.

³⁷Egiritae ngakiro na etitakinitere ngesi tatapakinae kidiama akou keng igiritae kona: “Yesu ngesi lo, ekapolon a Ngiyaudi.”

³⁸ Sodi taramakis ngirukooi ngiarei ka ngesi napirio, epei lowae lo aloteten keng, epei lowae lo alokedieny keng.

³⁹Kimungumunga lu etorununete neni ngakies kech, iyenyete Yesu

⁴⁰ ebaasi, “Ibala ngoon iyong ibwangi akai a Akuj sodi todukok nabo ache a ngirwa a nguuni! Toyuun chene kirai iyong Lokookeng a Akuj! Totiyaun tokona anapir!”

⁴¹Tokienatar ngimurok luapolok a akai a Akuj ka ngiketatamak a etal ta ngikasukou a Atuk, apot tokienatar Yesu loger lopei ngolo ebalasi,

⁴²“Ayuuni ngoon luche, nakaneni nyeyuun ngesi elope! Nyerai ngesi ekapolon a Ngisirael a? Ani ketiyaun ngesi anapir tokona, kinupi ngoni ngakiro keng.

⁴³ Enupit ngesi Akuj, nabo ebala arai ngesi Lokookeng a Akuj. Ataanyutu chene kesaki Akuj ayuun ngesi tokona!”

⁴⁴Tani ngirukooi lu aramakinio ka Yesu napirio, kiyenya ngesi loger ngolo.

⁴⁵Na anangea naparan lotingilan, toribok akwap daang chuch tanang adaunet a ngisaae a nguuni.

⁴⁶ Na anangea ngisaae ngikan-koomwon, kikalou Yesu kirema tama, “Eloi, Eloi, lema sabakisani.” Eger keng atamar, “Akuj kang, Akuj kang, nyo kiisikinea?”

⁴⁷Kiirasi ngitunga ngiche lu awaasi kaneni tamasi, “Enyarit ngesi Elija!”

⁴⁸ Tamatar ipei kech tolem ibore niyebuk kirepak tooma lomuna loadwaran lo epuritoe todupak ngaren akitoe, sodi tasak atamar tamat ngesi.

⁴⁹Nakaneni tamasi luche, “Ataanyutu chene kebuni Elija ayuun ngesi!”

⁵⁰Kirema Yesu kirurumak totoan.

⁵¹Toberes awaru nakooyen na eneno alokai a Akuj ngaarei napei alokidiama tanang kwap. Tamaranik akwap sodi tapakas ngatabab.

⁵²Tangaar ngalielin kiteyarunae ngitunga a Akuj lukaalak lu atoakito.

⁵³ Torotokis kesi analielin, ani na ayarunea Yesu anakitu, toloto ngitunga ngulu Lore Lo italeunitoe, kingolikis ngitunga lukaalak kesi kaneni.

⁵⁴Na anyungareta ekarikon a ngasigerea ka ngasigerea na arukito ka ngesi iyokiyete Yesu eger lo amaranikinea akwap, ka ngakiro nache daang asubasi, tobul kesi noi tamasi, “Kerai itwaan en Lokookeng a Akuj dir!”

⁵⁵Eteete ngaberu nakaalak na achadakina kaneni Yesu. Ewapuunete kesi Yesu alo Galilaya ingaranakinete ngesi.

⁵⁶ Araakasi kesi Mariam Magadalene, ka Mariam itiokeng a Yakobo ka Yosep ta itiokech a ngide a Sebedayo.

⁵⁷Na anangea ebong, todol itwaan nikabaran a akwap a Arimatea enyaritae ekiro keng Yosep, arai ngesi dang erukitos a Yesu.

⁵⁸Tolot ngesi nia Pilato dio atamar asaki akwaan a Yesu. Todung Pilato atamar nakinae Yosep akwaan a Yesu.

⁵⁹Sodi tolema Yosep akwaan a Yesu, toenik loworu lodapal lokitetet loajokon.

⁶⁰Kitoperik tooma naliel nakeng a elope, na aringa ngesi ebokakini nataaba. Sodi kikokorik amoru naapolon nakituk a aliel, torotok ngesi.

⁶¹Ebooyete Mariam Magadalene ka Mariam nache kaneni, iteete aliel.

⁶²Na ewalarea akolongit nache, na erai Sabato kiriama ngimurok luapolok a akai a Akuj ka Ngiparisayo ta Pilato

⁶³tamasi, “Ekapolon, kitamunit atamar ngoon eringa ekaliokon ngolo eyari, eruoro ebala keteyarunio ngesi ekisidi a ngirwa a nguuni.

⁶⁴ Todung iyong atamar kiyokoi aliel keng lokojokon tanang akolongit na a ngauni, sodi nyepedoreta ngirukitos keng alosit akokoyar akwaan keng, ani erumor tolimokis ngitunga atamar eteyarun ngesi. Eroner alioko na esal idwangi tani na ekingaren.”

⁶⁵Tolimok Pilato kesi tama, “Torikosi ngasigerea kiteto aliel lokojokon.”

⁶⁶Sodi torotokis kesi togolo aliel kimuleleasi, kimiekis ngasigerea iteete.