Read turkana Matayo 28 Bible Online

Matayo 28 - turkana bible

Matayo 28

¹Adaunet a Sabato, akiwalaret a akolongit ana a Jumapili, apot Mariam Magadalene ka Mariam nache toloto akingolikin aliel.

²Tamaranik akwap atipei bu emalaikat a Ekapolon anadis kikokoriyo amoru lokwaas sodi kiboikin kidiama keng.

³Akwang ngesi ekoni akimileaunet, nabo ngiworui keng akwangak kea.

⁴Tobul ngitunga lu eyokiyete aliel tamaranikis, kikokis ngitunga lu etoakito.

⁵Kisuruorik emalaikat ngaberu tolimok tama, “Kuriasi nyieam, ayeni ayong atamar isakete esi Yesu lo ngoon aramakinio napir.

⁶Emam ngesi kane, ayaru ngesi loger lokolong alimunitor. Potu kingolikisi ni ngoon aperio ngesi ne.

⁷Kapesi tokona atipei sodi tolimokis ngirukitos keng tamasi: ‘Ayaru ngesi.’ Elosi tokona Galilaya ingareni esi. Ingolikinete esi ngesi kaina. Kitamutu nakalimok ayong esi.”

⁸Sodi torotokis kesi analiel atipei eemito, talakara noi. Tamataros alimokin ngirukitos a Yesu ngakiro nguna.

⁹Kiriamun Yesu ka kesi atipei tolimok tama, “Ekisil min nikus.” Sodi pot nikeng toriediko, tatapa ngakejen keng kilipa.

¹⁰Tolimok Yesu kesi tama, “Kuriasi nyieam. Kapesi tolimokisi ngikaitotoi kang atamar toloto Galilaya, kaanyungarete kesi ayong kaina.”

¹¹Na arotokinioto ngaberu, tobongo ngasigerea ngache nakeyokok aliel lore tolimokis ngimurok luapolok a akai a Akuj ngakiro daang na asubakinosi.

¹²Kiriamariama ngimurok luapolok a akai a Akuj ka ngikasukou a Atuk, totuko. Tolemut ngaropiyae nakaalak nakis ngasigerea.

¹³Sodi tamasi, “Itamarete esi apote ngirukitos keng been nakwaare ijotoote esi tokokoiasi akwaan keng.

¹⁴Kainyo ani kiira ekapolon a Ngiroma nguna, kitunupi sua ngesi atamar nyisechito esi, nakaneni emam ngache kichanete esi.”

¹⁵Tolemasi ngasigerea ngaropiyae kiwapa ngakiro na alimokinitae. Eraakasi ngakiro nguna kesi ekeikinito Ngiyaudi wadaang tanang akolongit na.

¹⁶Toloto ngirukitos lutomon ka epei moru a akwap a Galilaya nisek alimokinit Yesu kesi atamar toloto.

¹⁷Kilipa kesi ngesi na engolikineta, tani ikote neni, ayakasi ngiche angayakinito.

¹⁸Taapu Yesu diye kech tolimok tama, “Kainakin ayong apolou daang anadis ka akwap.

¹⁹Kapesi lotunga daang lu eya nakwapea daang kitaraut kesi ngirukitos kang, kibatisata kesi alokiro ka Apa ka Lokoku ta Etau a Akuj.

²⁰ Nabo kitatama kesi akiwap ngakiro daang nakadungok ayong esi kitatama. Nakaneni toyena atamar kiruki ayong ka esi ngirwa daang tanang esal a akwap.”