Read turkana Matayo 3 Bible Online

Matayo 3 - turkana bible

Matayo 3

¹Ngirwa ngulu bu Yoana Ekebatisan tolomak akitatam anariet a akwap a Yudea

²ebala, “Tolunga ngasechesea kus kainyo aapuu apolou a Akuj.”

³ Yoana ngesi lokolong eruoro ekadwaran a Akuj Isaya ngakiro keng nakolong abalar: “Etoil a itwaan ani echala anariet ebala: ‘Tosubakisi erot a Ekapolon. Kitenikisi erot lo itori ngesi!’ ”

⁴Anapit Yoana aruba ka ngiworui lu adonyunitoe angajul a ngikaala. Ainikinit aruba namuny naabor. Anyameene ngimases ka akimiet a ao.

⁵Aloseenete ngitunga a Yerusalem nikeng ka lu apote alowaitin kadaang a akwap a Yudea ta ngalupio daang na aya diyete angolol a Yorudan.

⁶ Tolimosi ngasechesea kech kibatisae anangolol a Yorudan.

⁷Na engolikinea Yoana Ngiparisayo ka Ngisadukayo lukaalak epote nikeng esakete akibatiso a ngakipi, tolim ngesi tama, “Esi lu ikote ngarewa, ngae kichikichiki esi atamar ipedorete abuchar aloriras alo ebunit?

⁸Tosuba ngitichisio lu itodiunete atamar ilunga esi dir ngasechesea kus.

⁹Nyiitamasi kori ipuunosi aloriras ani iraakatar ngalesea a Aburaam, kainyo kalimokinit esi dir atamar epedori Akuj asubakin Aburaam ngide anamoru kanu.

¹⁰ Edikino aep iteli ngikito alokwap anaten, ekitoe daang lo nyekoniuni ageor naajokon itelio tachakakinae nakim.

¹¹Kebatisae ayong esi a ngakipi idodiunit akibatiso ngina atamar ilunga esi ngasechesea kus. Nakaneni ngolo ebuni ekisidi kang, epolot noi kedwangit ayong. Nyitemokino ayong tani akodi ngamuk keng. Kibatisae ngesi esi a Etau a Akuj ka akim.

¹²Etingit ngesi adaet esaki adaun ngichok a ngakanoi. Iwaakini ngesi ngakanoi lokeru keng nakaneni kinom ngatunyeny a akim ana nyedunge jik.”

¹³Torotok Yesu alo Galilaya tanang Yorudan esaki Yoana kibatisa ngesi.

¹⁴Nakaneni asaki Yoana akiratakin ngesi tolim tama, “Ejoikinit iyong kibatisae ayong. Nyo ibunitor iyong nikang?”

¹⁵Tatachak Yesu ngesi tama, “Kimiek atosuba kona tokona, kainyo aloger kalo kisubakini ngoni daang na esaki Akuj.” Tacham Yoana nguna.

¹⁶Napei arumoror akibatisare Yesu, topud ngesi anakipi. Sodi tangaar adis kingolik ngesi Etau a Akuj lo ikoni akuuri etiyaun todo kidiama keng.

¹⁷ Kiirarae etoil anadis ebala, “Lokookang lominat ngesi lo, ketalakarit ngesi ayong.”