Read turkana Matayo 4 Bible Online

Matayo 4 - turkana bible

Matayo 4

¹ Sodi toreea Etau a Akuj Yesu nariet kiningio ngesi Ekipe kaina.

²Na aronitor Yesu ngakwaarisea ka ngapaaranisea ngatomwon-omwon, tanyam akoro.

³Bu Ekipe nikeng tolimok ngesi tama, “Ani kirai iyong Lokookeng a Akuj, kitiliwo chene ngamoru nugu akimuj.”

⁴ Tatachak Yesu ngesi tama, “Igiritae nakitab a Akuj kona: ‘Nyeyari itwaan a akimuj bon pearai eyari kotere akiroit daang na itoruni nakituk a Akuj.’ ”

⁵Sodi toriko Ekipe ngesi Lore a Yerusalem, lo italeunitoe, kitowo ngesi analem a akai a Akuj,

⁶ tolimok tama, “Ani kirai iyong Lokookeng a Akuj kimasar chene kwap, kainyo igiritae kona: ‘Elimokini Akuj ngimalaikae keng kikamut kesi iyong a ngakan kech, nyeenang amoru akeju kon.’ ”

⁷ Tatachak Yesu tama, “Igiritae nabo kona: ‘Nyiining Ekapolon Akuj kon.’ ”

⁸Toriko Ekipe Yesu moru lokooyen noi kidodik ngesi ngapolosio daang a ngakwapea ka apolou kech.

⁹Tolim Ekipe tama, “Kainakini ayong iyong nugu daang kiriedik iyong kilip ayong.”

¹⁰ Sodi tatachak Yesu tama, “Kape iyong Esiitan. Igiritae kona: ‘Kilip Ekapolon lo erai Akuj kon, sodi tosub etich keng bon!’ ”

¹¹Sodi toisik Ekipe Yesu, pot ngimalaikae kingarakis ngesi.

¹² Ani iirari Yesu atamar aen Yoana alojela, tolot ngesi Galilaya.

¹³ Abu ngesi nyiiboikin Nasaret, nakaneni tolot akiboi alore a Kaperinaum alo eyei diyete anam a Galilaya. Erai neni akwap a Sebulun ka Naputal.

¹⁴Asubasi nugu sodi kiyookinitor nguna kolong alimuni ekadwaran a Akuj Isaya ebala:

¹⁵“Ngitunga a akwap a Sebulun ka akwap a Naputal, lowae lo a anam, ekwakaye a Yorudan, ka Galilaya, akwap na ibooyoto ngibukui lu nyerai Ngiyaudi.

¹⁶ Ngitunga ngulu eyakasi naribu, ingolikinete akicha naapolon. Ngulu eyakasi nakwap na aribu ana erai akitu, ekwangikini akicha.”

¹⁷ Napei ngina jik, tolomak Yesu akitatam ebala, “Tolunga ngasechesea kus, kainyo aapuu Apolou a Akuj.”

¹⁸Na alosio Yesu alokwaas a anam a Galilaya, abu kingolik ngikaitotoi ngiarei lu araakasi ngikechiemak a ngikolia, Simon (lo enyaritae Petero) ka lokaatokeng lo anyaritae Andirea, echakete epuute nanam.

¹⁹Tolimok Yesu kesi tama, “Kiwapakinae ayong sodi ketatam esi akirum ngitunga loger lo irumeta ngikolia.”

²⁰Kimiekis kesi ngipuutei kech atipei sodi kiwapakis ngesi.

²¹Na arotokinio ngesi ngaren kaneni, kingolik ngikaitotoi ngiche ngiarei, Yakobo ka Yoana lu eraakasi talokookeng a Sebedayo. Ayakasi kesi ka apakech Sebedayo natubwa edonyete ngipuutei kech. Tanyara Yesu kesi.

²²Tonyout kesi atipei kimiekis apakech anatubwa sodi kiwapakis Yesu.

²³ Erimit Yesu ngiwaitin daang a akwap a Galilaya itatami anakais a Atuk. Alimonori ngesi Ngakiro Naajokak a Apolou a Akuj, nakaneni etojokeene ngidekesinei ka ngilekesinei alotunga.

²⁴Tokeikin ekipur keng nakwap daang a Siria. Sodi inunae ngesi ngitunga ngulu adeakasi ngidekesinei lugelagelae kangulu echanasi, ta lu ariabasi. Kitojok Yesu ngulu daang ekerepikinit, kangulu erakanarosi, ta ngulu angwalito.

²⁵Kiwapak asepich a ngitunga ngina abuni alo Galilaya ka ngirerea Lutomon, Yesu. Apote ngiche alore a Yerusalem, ka akwap a Yudea ta lu aponito a ekwakaye angolol a Yorudan.