Read turkana Matayo 5 Bible Online

Matayo 5 - turkana bible

Matayo 5

¹Na engolikinea Yesu asepich a ngitunga, todoka kidiama emoru kiboikin. Tochunun ngirukitos keng nikeng

²sodi tolomak ngesi akitatam kesi ebala:

³“Epiarit Akuj ngulu eyenete atamar eringa kesi nyenupa ngakiro a Akuj. Kainyo erai Apolou a Akuj akech.

⁴ Epiarit Akuj ngulu ialolongete. Kainyo isililingi Akuj kesi.

⁵ Epiarit Akuj ngulu epalaaka anikeng. Kainyo eanyunete kesi nguna ichikakinit Akuj.

⁶ Epiarit Akuj ngulu iitanito akiwap ngakiro na echamit Akuj, loger a itwaan ani enyamit akoro ka akure. Kainyo isimwonio kesi noi.

⁷Epiarit Akuj ngulu isieniyenete luche. Kainyo isienio kesi.

⁸ Epiarit Akuj ngulu ikiuna ngitai. Kainyo eanyungarete kesi Akuj.

⁹Epiarit Akuj ngulu esakete akisisil ngitunga. Kainyo enyarae Akuj kesi ngide keng.

¹⁰ Epiarit Akuj ngulu eboliare ani iwapitotor ngakiro na echamit Akuj. Kainyo erai Apolou a Akuj akech.

¹¹ “Kipiarit Akuj esi lu kingeritoe, kitoboliare nabo kitingakin ngakiro naaronok kotere ayong.

¹² Talakaros kichuro, kainyo eyei ebachit loapolon nadis kidaritere esi. Aboliatar kolong ngitunga ngikadwarak a Akuj lungorok loger lopei ngolo.

¹³ “Ikwaan esi ka amakat alotunga a akwap. Nakaneni ani kepener amakat, emam kona itababaruunio nabo. Eliwor ngesi ibore pasit, echakario kipudata ngitunga.

¹⁴ “Ikwaan esi ka akicha alotunga a akwap. Ere ngolo edukokinitae kidiama emoru, ileere.

¹⁵ Emam itwaan inokakini ataa sodi tobuburik atubwa. Iwaakinio ni ikeuna kinwakunea ngitunga daang alokai.

¹⁶ Aloger alopei kangolo, ejoikinit akicha kus ekwanguni alotunga sodi taanyungareta kesi ngitichisio kus luajokak, kipuruut Apakus lo eyei nadis.

¹⁷“Nyiitamasi kori abunit ayong akikisar etal a Musa ka ngakitatamet a ngikadwarak a Akuj. Peabunit akikisar pearai akitemokin kesi toriyana.

¹⁸ Kalimokinit ngakiro na iteni atamar, ani eringa adis ka akwap eya, emam ibore kori akiroit tani nadiochichi a etal na ikisario eringa nyitemokino kona esakitere.

¹⁹Kaneni, itwaan cha daang ni esechi akiroit tani nadiochichi a etal, kitatam luche atamar tosuba kongina, enyarao ngesi itwaan niichi Anapolou a Akuj. Nakaneni itwaan cha daang ni irichakini etal kitatam luche atamar tosuba kongina, enyarao ngesi niapolon Anapolou a Akuj.

²⁰Kalimokinit esi atamar ani pekidwang ngakiro kus na a ateneanut nguna a ngiketatamak a etal ka Ngiparisayo, nyipedorete esi alomar Napolou a Akuj.

²¹ “Iirasi esi ebeyo alimokinitae kolong ngitunga atamar, ‘Nyiiar. Itwaan daang ni eari niche irirao’.

²²Nakaneni kalimokinit tokona atamar, itwaan cha daang ni engoikini lokaatokeng irirao. Itwaan cha daang ni emori lokaatokeng erikunio nitubet ngakiro. Itwaan cha daang ni elimokini lokaatokeng atamar erai ekabangabangat, ejoikinit echakakinio nakim ngina nyedunge.

²³Nakaneni ani kiyaa iyong ainakinet kon nia Akuj kiwaak lokeno lo ipeyonokinere Akuj, sodi kitam iyong atamar kingoikinit iyong lokaatokon kotere ichebore,

²⁴kimiek ainakinet kon alongaren ekeno lo ipeyonokinere Akuj. Tolot atipei kisila ka lokaatokon ani erumor tobong tolemik Akuj ainakinet kon.

²⁵“Ani esaki itwaan akititakin iyong kiteriko nitubet ngakiro, topupokinos ka ngesi alorot eringa nyenanga nitubet ngakiro. Ani kinanga esi nitubet ngakiro, kimiekinea ngesi iyong ekatubon ngakiro lo elimokini ngasigerea atamar kitoinikis iyong lojela.

²⁶Kalimokinit ayong iyong atamar, nyipuduni iyong kaneni jik, mati kitach amicha kon kisunyak daang pil.

²⁷ “Iirasi atamar abeyo, ‘Nyiilom’.

²⁸Nakaneni kalimokinit esi tokona atamar, itwaan daang ni ingolikini aberu tasak akiper ka ngesi, aliwor ngesi ekaloman alotau keng.

²⁹ Ani kitosech iyong akongu kon na aloteten, tout tochaka. Ejoikinit ekinier kon epei engwali, akidwang akwaan kon daang echakakinio nanam na a akim.

³⁰ Ani kitosech iyong akan kon na aloteten, totub tochaka. Ejoikinit ekinier kon epei engwali akidwang akwaan kon daang echakakinio nanam na a akim.

³¹ “Alimunitoe nabo atamar, ‘Itwaan daang ni elaki aberu keng ejoikinit einakini ngesi abarua a elakit.’

³² Nakaneni kalimokinit tokona atamar, ani kelak itwaan aberu keng, peelomit aberu, asech ngesi ani etiliworea aberu ngina akaloman erai kiuut ekile eche. Ekile lo iuusi aberu ngina, dang eliwor ekaloman.

³³ “Iirasi esi atamar alimokinitae kolong ngitunga atamar ebeyo, ‘Nyiikong pas, nakaneni tosubak nguna ikong iyong ani a Ekapolon Akuj atamar isubakini’.

³⁴ Nakaneni kalimokinit esi tokona atamar, nyiikongo jik. Nyiikongo tani adis, kainyo erai ekicholong lo Apolou a Akuj.

³⁵ Nyiikongo tani ngalup, kainyo erai neni ichiekit Akuj. Nyiikongo tani Yerusalem, kainyo erai ere a Ekapolon a loapolon.

³⁶Nyiikongo tani akou kon, kainyo nyipedori iyong akitokwang kori akisirion etimat tani epei.

³⁷Tolim atamar: ‘Kongina’ kori ‘Meere kongina’. Ngakiro ngache na iatakini iyong eponito ani a Ekipe.

³⁸ “Iirasi atamar abeyo: ‘Etachakin akongu nakongu nache, sodi totachakin ekelae lokelae loche’.

³⁹Nakaneni kalimokinit tokona esi atamar, nyiitachak ngakiro naaronok na kisubakinea iyong itwaan. Ani kibap iyong itwaan namatengen na aloteten, toreik na alokedieny dang kibap.

⁴⁰Ani kititak iyong itwaan kitoriko nitubet ngakiro kotere eworu kon lo alotooma, nak ngesi tani lo alokidiama.

⁴¹Ani kitingak iyong itwaan akiwok eegos keng a akilomitait a apei, kiwok a ngakilomitae a ngaarei.

⁴²Ani kilip iyong itwaan ibore, nak ngesi. Ani kesaki itwaan akiar amicha anikon, nyiimik ibore ni esaki.

⁴³ “Iirasi esi atamar abeyo, ‘Tominakisi ngipaalon kus toremokinos ngimoe kus’.

⁴⁴Kalimokinit esi tokona atamar: tominakisi ngimoe kus kilipakisi Akuj ngulu kiboliatar esi.

⁴⁵Sodi toliworotor esi ngide ka Apakus alo eyei nadis. Kainyo itachai ngesi akolong kotere ngitunga daang, luajokak ka luaronok. Itetepi ngesi akiru kotere lu esubete naajokak ka lu esubete naaronok.

⁴⁶Ikokini Akuj kiinakini esi ebachit kiminasi esi ngitunga lukiminasi esi make ai? Esubete tani ngiketubukok echur kongina.

⁴⁷Ani kimalaate esi ngipaalon kus make, anijokis idwangitotor esi luche? Esubete tani ngulu nyerai Ngiyaudi nguna.

⁴⁸ Ejoikinit esi ikiuna loger lo ikiunakar Apakus anadis!