Read turkana Matayo 6 Bible Online

Matayo 6 - turkana bible

Matayo 6

¹ “Warasi nyiiwap ngitalio a Akuj alotunga sodi kipuruunere esi. Ani kiwap esi kitaanyungareta ngitunga, nyianyunete esi ebachit ani ka Apakus alo eyei nadis.

²“Nakaneni na iinakinea iyong ngikebootok ibore kon, nyiipetak ngakiro nguna lotunga loger lo esubete ngikamodeanak anakais a Atuk ka ngirotin. Esubete kesi nguna sodi kipuruunioto ngitunga. Kalimokinit esi ngakiro na iteni atamar, aanyut kesi ebachit kech lo itemokino.

³Nakaneni na iinakinea iyong ngikebootok ibore kon, tochoik nyeeyen akan na alokedieny ibore ni esubi na aloteten.

⁴Ejoikinit erai akiroit kon bon a ilope. Nakaneni Apa kon ngolo itee ibore ngini isubi iyong idait, kiinakini iyong ebachit.

⁵“Ani ilipete esi, warasi nyiikokis ngikamodeanak. Eminasi kesi anyounun akilip anakais a Atuk ka lowaitin a ngirotin, ni epedoreta ngitunga daang aanyungar kesi. Kitamutu nugu, aanyut kesi ebachit kech lo itemokino.

⁶ Nakaneni na ilipea iyong, toloma namaniyat a akai kon togolok ekidor, kilip Apakon ngolo nyiteo. Nakaneni Apakon ngolo itee ibore ngini isubi iyong idait, kiinakini iyong ebachit.

⁷“Anakilip kon, wara nyiilimu ngakiro nakaalak napasiek loger lo esubete Ngibukui lu nyerai Ngiyaudi. Itamito kesi atamar kori iirari Akuj ngakiro nakaalak ilipitotor kesi.

⁸Nyiikwaanikinosi ka kesi. Eyeni Apakus nguna isakete esi tani eringa esi nyilipa ngesi.

⁹Ejoikinit esi ilipete kona: ‘Apa kosi lo eyei nadis: Ekiro kon kipuroe.

¹⁰Apolou kon bu. Echami kon tosubakin kanege anakwap kona esubar anadis.

¹¹Nakinae akolongit na akimuj kosi na itemokino.

¹²Torimakinae ngasechesea kosi kona kirimanakinea sua lu kisechanakinete sua.

¹³Nyikilomak sua nakiningo nakaagongon, nakaneni toyuunae a Lokipe.’

¹⁴“Ani kirimanakis esi luche ngasechesea na kisechanakinete esi, kirimakini esi dang Apakus lo eyei nadis.

¹⁵ Nakaneni ani pekirimakis esi luche ngasechesea kech, nyikirimakini esi Apakus lo eyei nadis ngasechesea kus.

¹⁶“Ani kiron esi, nyiitasionokinosi loger lo itasionotor ngikamodeanak. Eloose kesi ebilakinito ngireetin sodi toyenunea itwaan daang atamar eronito kesi. Kalimokinit esi dir atamar, aanyut kesi ebachit kech lo itemokino.

¹⁷Ani ironete esi, kilotasi ngireetin kus sodi kikiarasi ngitim kus.

¹⁸Sodi nyeyeneta luche atamar ironito esi. Apakus ngolo nyiteo ngesi bon eyeni. Nakaneni Apakus ngolo itee ibore ni isubi iyong idait, kiinakini iyong ebachit.

¹⁹“Nyiiwaa ebari kus kanege anakwap ani epedoreta ngakimam ka ekut akinyasun. Epedorete ngikokolak dang aemakin tokokoa.

²⁰Ejoikinit iweyete ebari kus anadis ani nyinyasuneta ngakimam ka ekut. Nyepedorete ngikokolak dang aemakin tokokoa.

²¹ Kainyo epete ngitai kus ni eyei ebari kus.

²²“Ikote ngakonyen kus ataa a akwaan. Ani kejokak ngakonyen kus, eyei akicha nakwaan daang.

²³Ani keroko ngakonyen kus, eyei aribu nakwaan daang. Ani kerai akicha na eyei nikus aribu, etia akirionut eyei naribu ngina ai?

²⁴“Emam itwaan eliwor ekasuban etich a ngikapolok a ngiarei, eremokin epei sodi tominak loche, kori epupi ngakiro a epei dio kimenya loche. Nyipedorete esi akiwap Akuj ta ebari kus.

²⁵“Ngakiro nugu kesi kalimokinitor esi atamar, kuriasi nyiiriabasi kotere akimuj na isakete esi ka ibore ni imaase esi toyareta. Nyiiriabasi tani kotere ngiworui lu inapete esi. Ani ikoni dang, nyejok akiyar nyidwangit akimuj a? Ani nabo dang, nyejok akwaan nyidwangit ngiworui a?

²⁶Kingolikisi ngikieny lu eporito. Nyitaate kesi, kori nyelemete, kori nyikachete ngalemet lokerui. Nakaneni itani kesi Apakus lo eyei nadis! Nyikichoikinit esi Akuj noi nyidwangito ngikieny a?

²⁷Ngae anikus ani keriabakin epedori akiatakin ngirwa ngiche loboyor keng?

²⁸“Nabo, nyo iriabatar esi kotere ngiworui? Kingolikisi eger lo epolooto ngatur na amoni, emam etich esubete kesi kori nyedonyonokinosi ngiworui kech.

²⁹Nakaneni kalimokinit ayong esi atamar, tani Solomon dang, lo arai ekabaran noi, peayakasi ngiworui lukesuparak lu ekote tani aturot apei.

³⁰ Akuj alope isubusi nginyia lu a amoni, nginyia lu elibito akolongit na ani moi tongopiasi kinomae alokeno. Ikoni eger lo epedori ngesi akitanap esi ai? Etige esi ngitunga lu inupito wadiochichi!

³¹“Tokona, nyiiriabasi ibaasi ekoe nyo kinyami, kori nyo kimasi, kori nyo kinapi.

³²Kainyo esakete ngibukui lu nyerai Ngiyaudi ngiboro lu daang. Eyeni Apakus lo eyei nadis atamar isakete esi ngiboro lugu daang.

³³Nakaneni tasaka mono ekingaren Apolou keng ka ngakiro na esaki ngesi anikus, sodi kiinakini ngesi esi ngiboro luche lu daang.

³⁴Nyiiriabasi kotere ngakiro na ka moi, kainyo nyikiyeni ngichan luka moi. Ejoikinit ngichan lu a akolongit a apei itemokinosi.