Read turkana Matayo 7 Bible Online

Matayo 7 - turkana bible

Matayo 7

¹“Nyiirirata luche sodi nyikirira esi Akuj,

²kainyo kirirae Akuj esi aloger alopei iriraata esi luche. Kirirae ngesi esi a ngitalio alupei iriraata esi luche.

³Nyo iteo iyong ekame anakongu a lokaatokon, tarai nyitee iyong atagoroit na eyei nakongu kon?

⁴Ikokini iyong ilimokini lokaatokon tama, ‘Kimiek kare atolema ekame anakongu kon’. Tarai eyei iyong ilope atagoroit nakongu kon ai?

⁵ Iyong ekamodeanan! Tolema mono ekingaren atagoroit na eyei nakongu kon, topedorea akingolikin ka alemar ekame lo eyei nakongu a lokaatokon.

⁶“Nyiinakis ngingokwo ibore niasegan, kori nyiichakakis ngiputiro ngamoru nakaalak a ngaropiyae enyaritae ngalului. Kainyo ipudaarete kesi sodi toreunos kitonyilinyilaasi.

⁷“Kilipas nakaneni ianyunete. Tasaka nakaneni iriamunete. Kidongodongo nakaneni kingaario esi.

⁸Kainyo itwaan daang ni ilipa einakinio, ani ngini esaki eanyuni, nakaneni engaario ekidor kotere ngini idongidongi.

⁹Eyei epei anikus, taapa, lo einakini ikoku keng amoru na ilipea ngesi amugati a?

¹⁰Kori einakini ngesi emun na ilipea ngesi ekolia a?

¹¹Tani iyenete esi luaronok ainakin ngide kus ibore niajokon, nyepedori Apakus lo eyei nadis ainakin esi ngiboro luajokak ngulu ilipasi a?

¹² Tosubeta luche nguna isakete esi kesi kitosubeta esi. Nguna kesi idodiunit etal a Musa ka ngakitatamet a ngikadwarak a Akuj.

¹³“Tolomasi kitoro lokidor lokaadingan, kainyo ebalany ekidor lo elosere lonyas, nabo elolom erot lo eteni inaa, elalak lu itorete neni.

¹⁴Nakaneni ediding ekidor lo a akiyar. Erot lo eteni inaa etieno nakaneni ekidioko ngitunga lu eanyunete.

¹⁵“Tochoikinos ani eya ngikadwarak lukaliokok. Epote kesi nikus epataka ikote ngamesekin nakaneni alotai ikote kesi ngipeei lukanyamak.

¹⁶Iyenete esi kesi kanguna esubete. Nyerayete ngitiira ngamusabib, kori nyekokete ngimomwa ngameyana.

¹⁷Ekoniuni ekitoe loajokon ageor naajokon nakaneni ekitoe loaronon ekoniuni ageor naaronon.

¹⁸Emam ekitoe loajokon lo ekoniuni ageor naaronon. Emam ekitoe loaronon lo ekoniuni naajokon.

¹⁹Ekitoe daang lo nyekoniuni ageor naajokon eyapario sodi tochakakinae nakim.

²⁰ Kongina, iyenunete esi ngikadwarak lukaliokok a ngakiro ana esubete kesi.

²¹“Meere itwaan daang ni kanyarit ayong ebala: ‘Ekapolon, Ekapolon’ epedori alomar Napolou a Akuj, nakaneni eraakasi ngulu make esubete nguna esaki Apakang ngolo eyei nadis atamar tosuba.

²²Na enangea Akolongit ngina, kalimokinete lukaalak tamasi: ‘Ekapolon, Ekapolon, kidwari sua akiroit a Akuj a Ekiro kon. Kitwaranakini sua ngipean sodi atosuba ngakitoodikinet nakailiilok nakaalak a Ekiro kon.’

²³ Nakaneni alimokini ayong kesi atama, ‘Nyakayeni ayong esi. Kotosi anikang esi ngitunga luaronok!’

²⁴“Kongina, itwaan daang ni iirari ngakiro nakang nu nabo kiwapak, ikoni itwaan nikooson ni aduki akai lokitela.

²⁵Taram akiru kilelebun ngangololin. Tokutak ekuwam akai ngina nakaneni nyeukoro kainyo adukokinitae lokitela.

²⁶Nakaneni itwaan daang ni iirari akiroit kang sodi nyiiwap, ikoni itwaan nikabangaanan ni aduki akai keng nasinyonoit.

²⁷Taram akiru kilelebun ngangololin. Tokutak ekuwam akai ngina sodi toukor. Nakaneni aukor akai ngina tarabokoikin niaronon noi.”

²⁸Na arumorea Yesu ekiruor ngakiro nugu, tatalasi ngitunga daang ngakiro a ekitatame keng.

²⁹ Peekoni ngesi ngiketatamak a etal, nakaneni etatami ngesi a apolou anatikationon.