Read turkana Matayo 8 Bible Online

Matayo 8 - turkana bible

Matayo 8

¹Na atiyaunor Yesu alomoru, kiwapu ngesi asepich a ngitunga.

²Sodi bu itwaan ni adeaka enomokere toriedik alongaren keng tama, “Ekapolon, ani kisaki iyong akitangalekin ayong, ipedori.”

³Kitorwaa Yesu akan keng tatap ngesi. Tolimok ngesi tama, “Asaki akitangalekin iyong, tojoker.” Atipei tangalek enomokere a itwaan kangini.

⁴ Tolimok Yesu ngesi tama, “Ayoro, wara nyiilimok itwaan tani ipei nakaneni kape lomuron a akai a Akuj kiseme ngesi iyong, sodi tolem akipeyos loger lokolong alimunitor Musa, toyenea itwaan daang atamar ijoker iyong.”

⁵Na alomunea Yesu lore a Kaperinaum, kisiriamia ekarikon a ngasigerea a Ngiroma kimaima

⁶tama, “Ekapolon, edeaka ekasuban etich kang eperi anawi, eriab noi nyepedori tani anyoun.”

⁷Tolim Yesu tama, “Alosi ayong etangalek ngesi.”

⁸Tolim ekarikon a ngasigerea tama, “Meere kongina Ekapolon. Nyitemokino iyong ibuni toloma kai kang. Tolim tokona iyong akiroit, sodi tojoker ekasuban etich kang.

⁹Ayong dang, arai ekarikon loochi lo kapolokinito luche nabo eya ngasigerea na aweikinit ayong. Na alimokinea epei atama, ‘Kape!’ tolot. Kori na alimokinea loche atamar: ‘Bua’, bu. Nabo na alimokinea ekasuban etich kang atama, ‘Tosubak kona’, sodi tosubak loger ngolo.”

¹⁰Tatalasi Yesu ngakiro nguna na eirarea, sodi tolimok ngitunga lu ewapito ngesi tama, “Kalimokinit ayong esi atamar, nyaanyuna nakanuan itwaan tani alo Isirael ni enupit noi loger lo.

¹¹Kalimokinit ngakiro na iteni dir atamar epote ngikaalak alo kide ka too kiboikinos ka Aburaam ka Isaka ta Yakobo kimuja Anapolou a Akuj.

¹²Nakaneni lu ejoikinit eya napolou, echakakinio kesi naribu, kigoro tokiricha ngikel kaneni.”

¹³ Tolimok Yesu ekarikon a ngasigerea tama, “Kape nawi, esubakin na inupit iyong anikon.” Sodi tojoker ekasuban etich a ekapolon kangolo esaa ngolo.

¹⁴Sodi tolot Yesu nawi a Petero toriam nakamuran a Petero eperi irakarit arukum.

¹⁵Toting Yesu akan keng, tangalek arukum keng. Sodi tonyou kisiak akisimuj ngesi.

¹⁶Na awaria, apot ngitunga yaut nia Yesu ngitunga lukaalak lu akoporito ngikerep, sodi kitwarak Yesu ngipean ngulu a akiroit ana alimuni, nabo kitangalek daang lu adeakasi.

¹⁷ Asubi ngesi kona sodi kiyookinotor nakolong alimuni ekadwaran a Akuj Isaya ebala: “Ngesi elope etwaranakini ngilekesinei yok nabo tolema ngidekesinei daang.”

¹⁸Na engolikinea Yesu asepich a ngitunga na eriamit ngesi, tolimok ngesi ngirukitos keng atamar toloto ekwakaye anam.

¹⁹Bu eketataman a etal nikeng tolim tama, “Eketataman, kewapi ayong iyong awadaang ani iteni.”

²⁰Tatachak Yesu ngesi tama, “Eya takwee ngatabab na eduketa, tani ngikieny lu eporito eya ngakais, nakaneni Lokookeng a Itwaan bon ngesi emam ni icholongi kiangarea.”

²¹Tolim eche a ngirukitos keng tama, “Ekapolon, kimiekinae mono atolot atonuk apakang.”

²²Tatachak Yesu ngesi tama, “Kiwapakinae ayong. Kimiek ngulu ikote ngikatoak tonuka ngikatoak kech.”

²³Todoka Yesu natubwa kirukosi ka ngirukitos keng.

²⁴Atipei tokut ekuwam loapolon ananam, tokuut ngitoroi kilapanakinos natubwa, tonyou atubwa abukor. Nakaneni ajotoe Yesu.

²⁵Toloto ngirukitos a Yesu nikeng kitokienyut ngesi tamasi, “Ekapolon, toyuunae kare sua dikino kitoaki.”

²⁶Tatachak Yesu kesi tama, “Nyo kibulitor esi kona? Abe edit anupit kus.” Tonyou ngesi kikilak ekuwam ka ngitoroi lu akuunito kisililing. Kililing wadaang tachakin chek.

²⁷Tatalasi ngitunga daang ngakiro nguna kingitas tamasi, “Ani itwaan ikoni ne en? Epupete ngesi tani ekuwam ka ngitoroi a?”

²⁸Na anangea ngesi ekwakaye anam nakwap a Ngigerasi, kiriamun ngesi ka ngitunga ngiarei lu akoporito ngikerep, eponito analielin. Adedeng ngitunga ngulu noi. Kotere adedengu kech, amam itwaan etoreene lorot ngolo.

²⁹Atipei kiremasi kesi lokojokon tamasi, “Eya iyong ngakiro ka sua Lokookeng a Akuj a? Ibu iyong aboliar sua eringa esaa nyenanga a?”

³⁰Nipei neni ayei atwom nakaalan a ngiputiro na adaka.

³¹Kimaimaa ngipean Yesu tamasi, “Ani kisaki iyong akitwarakin sua, kimiekinae atolomasi natwom a ngiputiro ngin.”

³²Tolimok Yesu kesi tama, “Kapesi.” Sodi topudosi kesi tolomasi loputiro. Kipiiri atwom daang tochakun anakope toloma tooma nanam, tanyam daang anam.

³³Kipiirioto ngikeyokok a ngiputiro lore. Kisisata kesi ngakiro daang, tani na asubakinosi alotunga aluarei akoporito ngikerep.

³⁴Toloto ngitunga daang a ere aanyun Yesu. Na anyungareta ngesi, kimaimaa ebaasi torotok anakwap kech.