Read turkana Matayo 9 Bible Online

Matayo 9 - turkana bible

Matayo 9

¹Todoka Yesu natubwa kiwaar ananam tobongo lore keng.

²Sodi kilepulepuut ngitunga ngiche nia Yesu itwaan niangwalan ni aperi alojemu. Na ayenea Yesu atamar enupito kesi lokojokon, tolimok ekile loangwalan tama, “Totitinyer lokooku, arimakin ngasechesea kon.”

³Tolimokinos ngiketatamak a etal make tamasi, “Imenyi itwaan en Akuj.”

⁴Kona ayenea Yesu na etamete kesi tolimok tama, “Nyo itameta esi ngakiro naaronok na ikote nguna?

⁵Nyoni etieno, alimokin ekangwalan atamar, ‘Arimakin ngasechesea kon’ kori atamar ‘Tonyou, torotok’?

⁶Asaki ayong esi toyena atamar eyei Lokookeng a Itwaan agogongu anakwap na erimakinea ngasechesea.” Tolimok ekangwalan ngolo tama, “Tonyou, tolema ejemu kon, tolot nawi.”

⁷Tonyou itwaan ngini, tolot nawi keng.

⁸Tobul asepich a ngitunga na engolikineta nguna. Kipuruut Akuj ani ainakinea ngitunga agogongu na ikoni ngina.

⁹ Torotok Yesu kaneni ani eringa elosi alorot, taanyunga eketubukon echur lo anyaritae Matayo, ibooyi alokai ana etubukio ngesi ngitunga echur. Tolimok Yesu ngesi tama, “Kiwapakinae ayong.” Tonyou Matayo kiwapak ngesi.

¹⁰Ani imuji Yesu alokai a Matayo, pot ngiketubukok echur lukaalak ka ngikasechak kiboikinos ka Yesu ta ngirukitos keng kimuja aapei.

¹¹Na engolikineta Ngiparisayo ngiche ngakiro nguna, kingita ngirukitos a Yesu tamasi, “Nyo imujeta eketataman kus ka ngiketubukok echur ta ngikasechak?”

¹²Sodi ani iirari Yesu ngakiro kech tatachak tama, “Ngitunga lu nyedeakasi nyesakete eketedeakan. Lu edeakasi kesi esakete.

¹³ Kapesi tongichitu na itatamete ngagiran na ebalasi: ‘Apatanu ngesi asaki ayong, meere ngakipeyos a ibarasit’. Nyebuno ayong anyarare luajokak. Abuni anyarare lukasechak.”

¹⁴Pot ngirukitos a Yoana Ekebatisan nia Yesu kingita tamasi, “Abe kironeene sua ka Ngiparisayo akimuj a ngirwa. Nyo peeroneeneto ngirukitos kon?”

¹⁵Tatachak Yesu tama, “Itamito esi atamar ialolongete ngitunga lu enyaraunitae nakuuta eringa erukito ka ekeutan a? Mam jik! Nakaneni enangi akolongit na erikorere ekeutan anikech sodi toroneeneto kesi ngirwa ngulu.

¹⁶“Emam itwaan edapi eworu longorot a aworu anakitetet kainyo echikin aworu ngina aloworu alongorot kangolo kitabalanyany apedot a eworu.

¹⁷Kori emam itwaan tani ipei ni epedori akiturakin emuna lo aringa epurio lotuo longorot. Ani kiturak, ebwangabwangaar etuo sodi tobukor emuna, nabo kinyasun etuo. Nakaneni iturakinio emuna lo eringa epurio lotuo lokitetet nyiinyasunotor etuo ka emuna aapei.”

¹⁸Ani eringa Yesu iruoro ngakiro nguna, bu ekapolon a akai a Atuk nikeng toriedik alongaren keng tama, “Atoana nakookang, nakaneni bua kare kidokok akan nakou keng sodi toyar ngesi.”

¹⁹Tonyou Yesu kirukosi ka ngesi ta ngirukitos keng daang.

²⁰Ayei neni aberu na echanito ngaakot na aropiyete a ngikaru a ngitomon ka ngiarei, toropun alokaku a Yesu tatap echilet a eworu keng.

²¹Etami ngesi ebala, “Ani cha katap eworu keng, ajoker jik.”

²²Toreeun Yesu kingolik ngesi tama, “Nyiem nakooku, kiteyar iyong anupit kon.” Tojoker aberu ngina esaa lopei ngolo.

²³Na anangunea Yesu nawi a ekapolon a akai a Atuk kangolo, kingolik ngesi ngikaeok lu aponito akinuk ikoku ka ngitunga lu achalasi.

²⁴Tolim ngesi tama, “Topudosi esi daang nikalapatan. Nyetoanit ikoku nipese en, ejotoe ngesi!” Tokianatar kesi daang ngesi.

²⁵Napei epudorere ngitunga nikalapatan, toloma Yesu namaniyat na ayei ikoku nipese, toting ngesi akan keng sodi kitonyou.

²⁶Tokeikin ngakiro nguna lowaitin daang a akwap.

²⁷Torotok Yesu kaneni. Ani elosi alorot kiwapakis ngesi ngimuduk ngiarei. Kiremasi ebalasi, “Kisienoi sua Lokookeng a Daudi.”

²⁸Na alomarea Yesu kai, pot ngimuduk luarei ngulu nikeng. Kingit ngesi kesi tama, “Inupito esi atamar apedori ayong akitangalekin esi a?” Tatachut kesi tamasi, “Ee, Ekapolon!”

²⁹Dio tatap Yesu ngakonyen kech tama, “Tosubakin kona inupitotor esi.”

³⁰Tojoketa ngakonyen kech kingolikis akwap. Kichikichikak Yesu kesi lokojokon tama, “Warasi nyiilimokis nugu itwaan iche.”

³¹Nakaneni torotokis kesi tokeikis ngakiro a Yesu lowaitin daang a akwap kangina.

³²Na arotokinioto ngitunga, yaut ngitunga ngiche itwaan nia Yesu ni peeruoro ani akoporitotor ngikerep.

³³Nakaneni napei etwarakinere ngipean, kiruorik itwaan ngini, tatalasi ngitunga daang ngakiro nguna tamasi, “Nyeanyuna sua nakanuan ngakiro na ikote nugu alo Isirael!”

³⁴ Nakaneni tamasi Ngiparisayo, “Erai lokapolon a ngipean eanyunitor ngesi agogongu na itwaranakinea ngipean.”

³⁵Erimit Yesu ngirerea daang ka ngadakarin. Etatami anakais a Atuk kech Ngakiro Naajokak a Apolou a Akuj. Nakaneni etangalenokini ngidekesinei ka ngilekesinei daang alotunga.

³⁶Na engolikinea ngesi asepich a ngitunga, kisienoto kesi ngesi noi ani echanatar tamam kona ingarakinotor, loger a ngamesekin ana emam ekeyokon.

³⁷Sodi tolimok ngesi ngirukitos keng tama, “Elalak ngalemet, nakaneni ekidioko ngulu esubete etich.

³⁸ Kilipa robo elope a ngalemet tomea ngikalemak lukaalak lu echunakinete ngalemet keng.”