Read turkana Mariko 1 Bible Online

Mariko 1 - turkana bible

Mariko 1

¹Eraakasi nugu Ngakiro Naajokak a Yesu Kiristo a Lokookeng a Akuj.

² Esiakinete loger lokolong egiritere nakitab a ekadwaran a Akuj Isaya atamar, “Ebala Akuj kona, ‘Ameari ayong emeanara kang kingarenik iyong kitosubak iyong erot!’

³ Etoil a itwaan ani echala anariet ebala, ‘Tosubakisi erot Ekapolon, kitenikisi erot lo itori ngesi!’ ”

⁴Abuni Yoana anariet ibatisae ngitunga kitatami[1] ebala, “Tolunga ngasechesea kus kibatisae sodi kitorimakinea Akuj esi ngasechesea kus.”

⁵ Aloseenete ngitunga a akwap a Yudea nikeng ka ngitunga daang a ere a Yerusalem. Tolimosi ngasechesea kech kibatisae anangolol a Yorudan.

⁶Anapit Yoana ngiworui lu adonyunitoe a ngajul a ngikaala. Anapit aruba namuny anaabor. Anyameene ngimases ka akimiet a ao.

⁷Kitatam ngesi ngitunga ebala, “Itwaan ngini ebuni ekisidi kang epolot noi kedwangit ayong, nyitemokino ayong tani akudokin atalachak ngarukanes a ngamuk keng.

⁸Kebatisae ayong esi a ngakipi, nakaneni kibatisae ngesi esi a Etau a Akuj.”

⁹Ngirwa ngulu, torotok Yesu alore a Nasaret a akwap a Galilaya, sodi kibatisa Yoana ngesi alo Yorudan.

¹⁰Napei apudunio Yesu anakipi, kingolik ngesi adis engaar, sodi totiyaun Etau a Akuj ikoni akuuri todo kidiama keng.

¹¹ Abu etoil anadis tama, “Irai iyong Lokookang lominat. Kitalakarit iyong ayong.”

¹²Sodi toreea Etau a Akuj Yesu atipei nariet,

¹³kiboi kaina ngirwa ngitomwon-omwon iningit Esiitan. Ayakasi neni tani ngitieng a amoni, nakaneni engaranakinete ngimalaikae ngesi.

¹⁴Ekisidi a aenet a Yoana alojela, tolot Yesu Galilaya, itatami Ngakiro Naajokak a Akuj ebala,

¹⁵ “Anang esaa, aapuu Apolou a Akuj! Tolunga ngasechesea kus sodi tonupa Ngakiro Naajokak a Akuj!”

¹⁶Na alosio Yesu alokwaas a anam a Galilaya, kingolik ngikechiemak a ngikolia ngiarei, Simon ka Andirea lo arai lokaatokeng, echakete epuute nanam.

¹⁷Tolimok Yesu kesi tama, “Kiwapakinae ayong sodi ketatam esi akirum ngitunga loger lo irumeta ngikolia.”

¹⁸Kimiekis kesi ngipuutei kech atipei sodi kiwapakis ngesi.

¹⁹Na arotokinio ngesi ngaren wadio, kingolik nabo ngikaitotoi ngiarei, Yakobo ka Yoana lu eraakasi talokookeng a Sebedayo. Ayakasi kesi tooma natubwa edonyete ngipuutei kech.

²⁰Tanyara Yesu kesi napei aanyungarea. Kimiekis kesi apa kech anatubwa ka ngikasubak etich, sodi kiwapakis kesi Yesu.

²¹Tananga Yesu ka ngirukitos keng lore lo anyaritae Kaperinaum. Na anangea akolongit a Sabato, toloma Yesu kai a Atuk tolomak akitatam.

²² Toiliilik ngitunga daang eger lo etatamea ngesi, kainyo peekoni ngesi ngiketatamak a etal, nakaneni etatami ngesi a Apolou anakaagongon.

²³Tolom itwaan ni akoporito ngikerep atipei tooma kai a Atuk kikalou tama,

²⁴“Wae! Eya iyong ngakiro ka sua Yesu lo a Nasaret a? Ibu iyong amunyar sua a? Ayeni atamar iyong ngesi ngae, irai iyong emeuna a Akuj lo italeuno!”

²⁵Todungok Yesu Ekipe tama, “Kililing sodi tolom anitwaan kaen!”

²⁶Kitamaranik Ekipe itwaan ngini noi kirakar. Sodi kirema kikalou lokojokon, sodi topudo.

²⁷Toiliilikis ngitunga daang ngakiro nguna tolimonokinos make tamasi, “Anukiro nugu? Ekoe, eraakasi ngakitatamet kiteat a? Edungonokini itwaan en ngipean ngakiro nakaneni epupete ngesi tani ngipean!”

²⁸Tokeikin ekipur a Yesu atipei lowaitin daang a akwap a Galilaya.

²⁹Topudut Yesu ka ngirukitos keng alokai a Atuk toloto kidirasi jik nawi a Simon ka Andirea. Arukito kesi ka Yakobo ta Yoana.

³⁰Napei adolunio Yesu tolimokinae atamar eperi nakamuran a Simon irakarit arukum noi.

³¹Tolot Yesu aanyun aberu ngina, toting akan kitonyou. Tangalek arukum keng. Sodi tonyou tolomak akisimuj kesi.

³²Awariet na adoyorea akolong, apot ngitunga yaut nia Yesu daang lu adeakasi ka ngulu akoporito ngikerep.

³³Tochunakinos ngitunga daang a ere kangolo ngaren ekidor.

³⁴Nabo kitangalek Yesu ngitunga ngikaalak lu adeakasi ngidekesinei ngigelagelae. Kitwarak Yesu ngipean ngikaalak. Nakaneni nyechamakina elimunete akiroit kainyo ayenete kesi ngesi.

³⁵Nataparach elilim, eringa nyipiripiruna, tonyou Yesu topudo sodi tolot niasilon akilip.

³⁶Nakaneni toloto Simon ka ngirukitos luche akisak ngesi,

³⁷ani na anyuneta ngesi, tolimokis tamasi, “Kisakete iyong ngitunga daang.”

³⁸Nakaneni tatachak Yesu tama, “Potu apana lorerea luche dang lukidunyet etatama kaina, kainyo nguna ngesi abunitor ayong.”

³⁹ Erimit Yesu ngiwaitin daang a akwap a Galilaya itatami anakais a Atuk, kitwaranakini ngipean.

⁴⁰Sodi bu itwaan ni adeaka enomokere toriedik alongaren Yesu kimaima lokojokon tama, “Ani kisaki iyong akitangalekin ayong, ipedori.”

⁴¹Kisieni Yesu itwaan ngini kitorwaa akan keng tatap ngesi. Tolimok tama, “Asaki ayong akitangalekin iyong, tojoker!”

⁴²Tangalek enomokere a itwaan kangini atipei, tojoker ngesi.

⁴³Todungok Yesu ngesi atamar tolot atipei. Kichikichik tama,

⁴⁴ “Ayoro, wara nyiilimok itwaan tani ipei, nakaneni kape lomuron a akai a Akuj kiseme ngesi iyong. Sodi tolem akipeyoet loger lokolong alimunitor Musa, toyenea itwaan daang atamar ijoker iyong.”

⁴⁵Nakaneni tolot itwaan ngini tokeik akiroit ngina wadaang. Kiruor ngesi ngakiro nakaalak noi tokuruwo Yesu kona elomuni lore iteete ngitunga, pearai ebooyi ngesi aniasilon, sodi pot ngitunga neni alowaitin kadaang.