Read turkana Mariko 10 Bible Online

Mariko 10 - turkana bible

Mariko 10

¹Torotok Yesu kaneni toten nakwap a Yudea, todoka ekwakaye angolol a Yorudan. Apot nabo ngasepicho a ngitunga tochunun ni ayei ngesi, sodi kitatam kesi kona palem sek.

²Pot Ngiparisayo ngiche esakete akining ngesi kingita tamasi, “Tolimokinae sua, echamakinitae alotal ekile elaki aberu keng a?”

³Tatachak Yesu ingisit tama, “Alital kolong kilimokinit esi Musa?”

⁴ Tatachut kesi ebalasi, “Alimunit kolong Musa atamar epedori itwaan akigir abarua a elakit sodi totiakas ka aberu keng.”

⁵Tolimok Yesu kesi tama, “Kigirakinit Musa esi etal logo kainyo egogong esi ngakies emam kona kitatamio.

⁶Nakaneni kolong anakisiakinet, ngirwa lu asubere akwap, ‘Asubakini Akuj ekile ka aberu.

⁷Kotere ngakiro nguna, eisikini ekile apakeng ka itiokeng sodi kiruko ka aberu keng,

⁸sodi taraut kesi luarei ngipei!’ Nakaneni nyeringa kesi nabo eraakasi ngitunga ngiarei, pearai itwaan ipei.

⁹ Nyejoikinit itwaan etiaki ngini kolong emorik Akuj.”

¹⁰Na abongoreta kesi tolomasi kai, kingita ngirukitos a Yesu ngesi akiroit ngina.

¹¹Tolimok kesi tama, “Itwaan cha daang ni elaki aberu keng kuut aberu ache, aliwor ekaloman asechaki aberu keng.

¹² Kongina pei, ani kenger aberu ekile keng tacham ekile eche, alom ngesi asechaki ekile keng.”

¹³Torikut ngitunga ngiche ngide nia Yesu esakete ngesi kidokok ngakan keng kidiama ngakies kech. Nakaneni kikilakis ngirukitos keng ngitunga.

¹⁴Na engolikinea Yesu kesi ikote neni, tongo noi tolimok ngirukitos keng tama, “Kimiekisi ngide pot ne! Nyiiratakis kesi kainyo erai Apolou a Akuj aka ngulu ikote lugu.

¹⁵Kalimokinit ngakiro na iteni atamar, itwaan cha daang ni nyechamuni Apolou a Akuj loger lo echamunitor ikoku niichi, nyelomari jik Napolou ngina.”

¹⁶ Sodi tadaku ngesi ngide kidokonok ngakan keng kidiama kech, topia.

¹⁷Na anyounio Yesu torotok, tomotun itwaan toriedik alongaren keng kingit tama, “Eketataman loajokon, ekokini ayong abili aanyun akiyar na nyedaun ai?”

¹⁸Kingit Yesu ngesi tama, “Nyo kinyaritor iyong ayong ekajokon? Emam itwaan ejok mati Akuj bon.

¹⁹ Iyeni iyong ngitalio lugu: ‘Nyiiar, nyiilom, nyiikoko, nyiiruor ngakiro na eraakasi alioko, nyiingala, toker Apa kon ka itiokon.’ ”

²⁰Tolim ekile ngolo tama, “Eketataman, napei kolong a ekiditeu kang, erichunit ayong ngitalio lu daang.”

²¹Tokienyik Yesu ngesi a amina tama, “Eroko ibore ipei bon. Kape togiela ibore daang ni itingit iyong tokoranak ngikebootok ngaropiyae sodi min ebarit kon nadis, ani erumor bu kiwapak ayong.”

²²Na eirarea ekile ngolo nguna, torotok esiliyorit kainyo abarit ngesi noi.

²³Tokienyik Yesu ngirukitos keng kisemok tolimok kesi tama, “Egogong noi ngikabarak alomar Napolou a Akuj!”

²⁴Toililikis ngirukitos keng ngakiro nugu, nakaneni torubak Yesu iruoro ebala, “Ngide kang, egogong noi ngikabarak alomar Napolou a Akuj!

²⁵Ebeben ekaal akitor napedot a emutu idwangit eger lo elomarea ekabaran Napolou a Akuj.”

²⁶Toililikis ngirukitos keng ngakiro nguna kingitanaros make tamasi, “Ani ngae epedori ayuun?”

²⁷Tokienyik Yesu kesi tatachak tama, “Nyepedorosi nguna alotunga, nakaneni ani a Akuj, epedorosi ngakiro daang.”

²⁸Sodi tolim Petero ngakiro na ekeunit tama, “Tokona, abe kiisik bo kolong sua ibore daang kiwapak iyong.”

²⁹Tolimok Yesu kesi tama, “Kalimokinit esi atamar itwaan daang ni aisiki awi keng, kori ngikaitotoi ka ngakaitotoi keng, kori apa ka itiokeng, kori ngide keng kori ngamanat keng kotere ayong ka Ngakiro Naajokak a Akuj,

³⁰einakinio ngainakinet nakaalak tokona na eraakasi ngainakinet amiat apei a ngakais, ngikaitotoi, ngakaitotoi, taito ka ngide ta ngamanat imorikina ka aboliaro, nabo ani ngirwa lu esal eanyuni akiyar na nyedaun.

³¹ Nakaneni ngikaalak lu ingarenete tokona, isidiyorosi, nabo lu isidiyete tokona, ingarenikinete.”

³²Ani eloose Yesu ka ngirukitos alorot etenete Yerusalem, kingarenik Yesu. Abulit ngirukitos keng toemito tani ngitunga lu ewapito ngesi. Tachada Yesu nabo ngirukitos lutomon ka ngiarei tolimok ngakiro na esubakinere ngesi.

³³Tolimok Yesu kesi tama, “Topupokisi, kilosi tokona ngoni Yerusalem ni erikere Lokookeng a Itwaan Lomurok luapolok a Akai a Akuj ka ngiketatamak a etal. Irirate kesi ngesi taara. Sodi torikoroe lobukui lu nyerai Ngiyaudi.

³⁴Ekianatar ngesi ngitunga ngulu kimaanakis ngakimul, kideta sodi taara, nakaneni ani enangi akolongit na a ngauni, toyaru.”

³⁵Sodi pot Yakobo ka Yoana lu eraakasi ngide a Sebedayo nia Yesu tamasi, “Eketataman, eyei ibore kilipit iyong kitosubakinea.”

³⁶Kingit Yesu kesi tama, “Nyo ngini?”

³⁷Tatachut tamasi, “Na iboikinor iyong lokicholong lo a Apolou kon, kimiek sua eboikinos ka iyong aapei, epei nakan kon na aloteten, loche nakan na alokedieny.”

³⁸ Tolimok Yesu kesi tama, “Nyiyenete esi na ilipasi. Ipedorete esi akimat ekopo lo aboliaro lo amasi ayong a? Ipedorete esi akibatiso loger lo ejoikinit kebatisaare ayong a?”

³⁹Tatachakis tamasi, “Kipedori.” Tolimok Yesu kesi tama, “Iteni ipedorete esi akimat ekopo lo aboliaro lo amasi ayong nabo kibatisae loger lo kebatisaare ayong.

⁴⁰ Nakaneni meere ayong aseuni atamar ngae iboikin teten kori kedieny kang. Eraakasi ngiwaitin ngulu ngika ngulu eseunit Akuj.”

⁴¹Na eirareta ngirukitos luche tomon ngakiro nguna, apot tongoikis Yakobo ka Yoana.

⁴²Nakaneni tanyarau Yesu kesi daang tochunak wapei tolimok tama, “Iyenete esi atamar epolokinito ngulu ejoikinit eraakasi ngikapolok a ngibukui alu nyerai Ngiyaudi ngitunga kech nabo epolokinito ngikarikok kesi noi.

⁴³Nyejoikinit ngakiro ikokinete neni anikus. Ani kesaki ipei kus araun ekapolon, ejoikinit eliwor ekasuban etich aluche kadaang,

⁴⁴kori ani kesaki ipei kus aliwor ni ingareni, ejoikinit eliwor ekasuban etich kadaang.

⁴⁵ Kainyo peabuni kolong Lokookeng a Itwaan asubakino etich, pearai akisub etich nabo, tajal akiyar keng sodi talakunea ngitunga lukaalak.”

⁴⁶Tanangut Yeriko. Torotokis Yesu ka ngirukitos keng ta asepich a ngitunga. Ebooyi itwaan ipei nimuduk nianyaritae Baritimayo lokookeng a Timayo alorukudi ilipanar.

⁴⁷Na eirarea ngesi atamar Yesu lo a Nasaret ngesi ngolo, tolomak akirema ebala, “Yesu Lokookeng a Daudi, kisienoi ayong!”

⁴⁸Apot ngitunga ngikaalak kikilakis ngesi tolimokis atamar kililing. Nakaneni kirema ngesi lokojokon noi tama, “Lokookeng a Daudi, kisienoi ayong!”

⁴⁹Towo Yesu sodi tama, “Tanyarautu!” Tanyaraut kesi ekile lomuduk ngolo tamasi, “Talakar, tonyou kinyarit ngesi iyong.”

⁵⁰Tachaka ngesi eworu keng, tokuraun atipei tolot nia Yesu.

⁵¹Kingit Yesu ngesi tama, “Nyoni isaki iyong katosubakinea?” Tatachak emuduk ngolo tama, “Eketataman, asaki tojoketa ngakonyen engolik akwap.”

⁵²Tolimok Yesu ngesi tama, “Kape kitojok iyong anupit kon.” Kingolik ngesi akwap atipei kiwapak Yesu alorot.