Read turkana Mariko 11 Bible Online

Mariko 11 - turkana bible

Mariko 11

¹Na apikineta kesi Yerusalem, eya diyete ngirerea a Betipage ka Betania, apot tananga ni ayei emoru a ngikito a akimiet. Tomea Yesu ngirukitos keng ngiarei kingarenikis.

²Tolimok tama, “Kapesi nadakar na eyei ngaren kus, na inangeta neni, iriamunete itasikiria ni eringa nyedoka a ache eenikinitae neni. Talachutu taramut nege.

³Ani kingit esi itwaan idio atamar nyo isubeta kongina, tolimokisi atamar Ekapolon ngesi esaki itasikiria nakaneni ebuuni atipei.”

⁴Sodi toloto toriamut itasikiria einikinitae lokidor diyete erot loapolon. Ani eroko elachete,

⁵kingita ngitunga lu awaasi kaneni tamasi, “Nyo ilacheta esi itasikiria?”

⁶Tatachut kona alimokinitor kesi Yesu, sodi kimiekis ngitunga ngulu kesi toloto.

⁷Taramut itasikiria nia Yesu, sodi topetakis ngiworui kech kidiama itasikiria sodi todoka Yesu kiboikin.

⁸Topetakis ngitunga lukaalak ngiworui kech lorot toyeput luche ngakui a ngikito alu ayakasi namanat topetakis lorot.

⁹Kiremasi ngitunga lu engarenete ka lu atupito Yesu ebalasi, “Kipuruunoe Akuj! Topia Akuj ngolo ebunit a ekiro a Ekapolon!

¹⁰ Topia Akuj apolou ka apayok Daudi alo erai ekapolon! Kipuroe Akuj!”

¹¹Na alomarea Yesu Yerusalem toloma kai a Akuj kiseme wadaang. Kona awaritor, topudo Yesu toloto ka ngirukitos keng lutomon ka ngiarei Betania.

¹²Na abongunioto kesi alo Betania akolongit nache, tanyam Yesu akoro.

¹³Kingolik emeyen anialonan eya ngakui, tolot akiro keya ngameyena. Ani enangi lokitoe ngolo, toriam ngakui make kainyo pearai ngirwa ngulu lu ekonio ageor.

¹⁴Tolimok Yesu emeyen ngolo tama, “Emam itwaan enyami ageor kon nabo jik!” Sodi kiirasi ngirukitos keng ngakiro na alimuni ngesi nguna.

¹⁵Na ananguneta Yerusalem toloma Yesu kai a Akuj kitwarak ngitunga daang lu agialanarete ka lu agielete ngiboro kaneni. Kibelukwaa ngimeesae alu abwangeenete ngaropiyae ka ngikicholongo alu agialanarete ngakurio.

¹⁶Nyechamakina kesi tani itwaan ipei epudorea ibore nikalapatan a akai a Akuj.

¹⁷ Sodi kitatam ngesi ngitunga ebala, “Igiritae nagiran atamar ebala Akuj, ‘Enyarao Akai kang akai na ilipeta ngitunga a ngibukui kadaang.’ Itaraut esi aburibur na eduketa ngikokolak!”

¹⁸Na eirareta Ngimurok Luapolok a akai a Akuj ka ngiketatamak a etal ngakiro nguna, tolomakis akisak erot lo eareta Yesu. Akerito kesi ngesi kainyo atalarito asepich a ngitunga ngakitatamet keng.

¹⁹Na awaria, torotokis Yesu ka ngirukitos keng alore kangolo.

²⁰Na etorunioto lorot ngolo nataparach, kingolikis emeyen ngolo keono deu napei anaten.

²¹ Na etamunea Petero ngakiro nasek asubasi, tolimok Yesu tama, “Eketataman, kingolik emeyen lobeen ilami iyong lo keoniyo!”

²²Tatachak Yesu kesi tama, “Tonupa Akuj.

²³Kalimokinit ngakiro na iteni dir atamar, epedori itwaan cha daang alimokin emoru atamar toditun tachakakin nanam erai pekengayat ngesi alotau keng. Ani kenup ngesi atamar esubakinio, iteni esubakin.

²⁴Kotere nguna kalimokinit atamar, na ilipeta esi isakete ibore, tonupa atamar ianyut, nakaneni kiinakinio esi ibore daang ni ilipasi.

²⁵Ani na inyouneto esi sodi kilipa, torimakisi itwaan daang ni eyei ibore kisechakinit esi, sodi kitorimakinea esi Apakus lo eyei nadis ngasechesea daang na isubito esi. [

²⁶ Ani pekirimakis esi luche ngasechesea kech, nyikirimakini esi Apakus lo eyei nadis ngasechesea kus.”]

²⁷Todolut kesi nabo Yerusalem. Na alosio Yesu alokai a Akuj, pot Ngimurok Luapolok a akai a Akuj ka ngiketatamak a etal ta ngikasukou a Atuk ni ayei ngesi,

²⁸kingita tamasi, “Anipolou isubea iyong ngakiro nugu? Ngae kitaanyuni iyong apolou naga?”

²⁹Tolimok Yesu kesi tama, “Kengisi ayong esi akiroit apei bon, ani kitachut esi, kalimokini ayong esi apolou na asubea ayong ngakiro nugu.

³⁰Tolimokinae ayong nianyunea Yoana apolou na ibatisaa ngitunga a ngakipi, nia Akuj kori lotunga?”

³¹Kingitanaros make ebalasi: “Ekoe, kitamari ai? Ani kitama ngoni aanyuni ani a Akuj, kingisi ngesi ngoni tama, ‘Ani nyo bo peinupeta esi ngakiro a Yoana?’

³²Nakaneni ani kitama ngoni, ‘Aanyuni alotunga ...’” (Aemito kesi ngitunga peapedorete atamar aanyuni alotunga, kainyo ayenete ngitunga daang dir atamar arai Yoana ekadwaran a Akuj.)

³³Sodi tolimut kesi tamasi, “Nyikiyeni sua.” Tolimok Yesu kesi tama, “Nyakalimokini ayong dang esi atamar anipolou asubea ayong ngakiro nugu.”