Read turkana Mariko 12 Bible Online

Mariko 12 - turkana bible

Mariko 12

¹Sodi kisuruor Yesu kesi a ngakitadapet tama: “Etae kolong itwaan amana a ngikito alu enyaritae ngimusabib, todukok awas kisiriam. Toboka ngesi akipany kiwaak iborosit nichiet emuna a ngamusabib a ngikito kangulu, sodi todukok epem. Toesikinea ngesi ngiketak ngulu amana ngina, tonyou ngesi anawi tolot nakwap ache.

²Na anangea ngirwa lulemet ngamusabib, tomea ngesi ekedalan keng tolot loketak ngulu esaki kidiakis ngesi epewae a ngalemet.

³Apot ngiketak kirumut ekedalan ngolo, kibungata, kitwarakis tobongo a ngakan anikirion.

⁴Sodi tomea elope a amana ekedalan eche. Kibungata ngolo akou sodi toboliatar niaronon noi.

⁵Tomea elope a amana ekedalan eche, sodi taara ngolo. Tosubeta nabo luche lukaalak ngakiro napei nguna, kibungata ngiche ka akiar ngiche.

⁶Lo edongit nyemeara ngesi lokookeng lominat bon. Ekisidi kadaang, abu tomea lokookeng ni ayakasi ngiketak ebala, ‘Ekerete kesi dir lokookang.’

⁷Nakaneni tolimokin ngiketak make tamasi, ‘Lokookeng lo, potu ataara toliworor amana ayok!’

⁸ Apot kirumut lokookeng a elope a amana taara, kipudosi akwaan keng nikalapatan a amana a ngimusabib.”

⁹Kingit Yesu tama, “Anukiro esubakini elope a amana? Ebonguni ngesi taar ngitunga ngulu, nak amana ngiketak ngiche.

¹⁰Isomata esi dir ngagiran nugu a? ‘Amoru nakolong angerete ngikadukok ebalasi erono ngesi tokona ajoker noi edwang daang.

¹¹ Ekapolon ngesi asubi nugu. Eraakasi ngakiro nakatalarak na kitee ngoni!’ ”

¹²Tasaka ngikapolok a Ngiyaudi akirumun Yesu kainyo ayenete atamar alimunit ngesi ngakitadapet nguna kotere kesi. Nakaneni tokera kesi asepich a ngitunga, torotokis toisikis ngesi.

¹³Tomearae Ngiparisayo ngiche ka ngitunga ngiche a atukuor ka Erode akilok Yesu a ngakiro ana elimuni.

¹⁴Pot nikeng tamasi, “Eketataman, kiyeni sua atamar iruoro iyong ngakiro na a iteni peimisit ngakiro na itamete ngitunga. Nyikachit iyong keyenikinitae itwaan kori kemam, nabo itatami iyong ngakiro na iteni na echamit Akuj alotunga. Tolimokinae sua, echamakinitae alotal kibukokini ngoni ekapolon a Ngiroma echur kori emam? Kibuki ngoni echur kori emam?”

¹⁵Toyen Yesu atamar kalokitae ngesi tolim tama, “Nyo kilokitotor esi ayong? Yautu pan aropiyat engolik.”

¹⁶Inunae ngesi aropiyat. Kingis ngesi tama, “Eka ngae ereet lo ka ekiro lo?” Tatachut tamasi, “Ngika a ekapolon a Ngiroma.”

¹⁷Tolimok Yesu tama, “Ani kikote neni, nakisi ekapolon a Ngiroma ibore ni erai ikeng, nakis Akuj ni erai ika Akuj.” Tatalasi kesi ngakiro nguna.

¹⁸Sodi Ngisadukayo lu ebaasi nyeyarunete ngikatoak pot nia Yesu tamasi,

¹⁹“Eketataman, igirakinit kolong Musa lotal ebala: ‘Ani ketoana itwaan toisik aberu emam ngide, ejoikinit lokaatokeng irumi aberu ngina sodi touriu ngide lu eliwor ngika ngolo atoani.’

²⁰Ayakasi kolong ngikaitotoi ngikan-kaarei, kuuta loapolon totoan nyeanyuna ngide.

²¹Kirum lo a ngiarei aberu ngina, totoan ngesi dang nyeanyuna ngide. Tosubakin ngakiro napei nguna ani eyei lokaatokeng lo a nguuni dang,

²²abu ngesi toliwor aberu a ngikaitotoi alukan-kaarei kangulu kadaang, dio totoaka nyeanyuna ngide. Ani ekisidi totoan aberu ngina.

²³ Tokona a, akolongit na eyaruneta ngikatoak, eliwor ngesi aberu a ngae? Kainyo arai ngesi aberu alukan-kaarei kangulu kadaang.”

²⁴Tatachak Yesu kesi tama, “Ichwangakinito esi nguna dir! Iyenete esi ibore nikisichwangakinit esi a? Erai ni nyiyeneta esi ngagiran kori agogongu a Akuj.

²⁵Kainyo na eyaruneta ngikatoak. Ikokinete kesi ngimalaikae lu eya nadis, nyiutanarete.

²⁶Nabo akiroit ngina ebeyo eyarunete ngikatoak, nyisoma esi anakitab ana igirit Musa ngakiro a amoni anaarirae a? Igiritae neni atamar alimokini Akuj Musa tama, ‘Arai ayong Akuj ka Aburaam ka Isaka ta Yakobo.’

²⁷ Erai ngesi Akuj alu eyarete meere Akuj alu etoakito. Ichwangakinito esi dir!”

²⁸ Bu eketataman a etal neni kiira kesi ebolosi. Toyen ngesi atamar atachaki Yesu Ngisadukayo niajokon, sodi bu kingit ngesi tama, “Alital epolot noi alotalio kadaang?”

²⁹Tatachak Yesu tama, “Lo epolot noi ngesi lo: ‘Topupokisi Ngisirael! Ekapolon Akuj yok ngesi bon erai Ekapolon.

³⁰Tominak Ekapolon Akuj kon a etau kon kadaang, a akiyar kon kadaang, a ngitamen kon kadaang ta ngikilinga kon daang.’

³¹ Lo a ngiarei loapolon ngesi lo: ‘Tominak ekidunyet kon loger lo iminar iyong ilope akwaan kon.’ Emam etal eche epolot noi idwangit luarei lu.”

³²Tolimok eketataman lo etal ngolo Yesu tama, “Ejok noi Eketataman! Iyook iyong ngakiro na ibala Ekapolon bon ngesi erai Akuj, nakaneni emam Akuj ache pearai ngesi bon.

³³Nabo ejoikinit itwaan eminakini Akuj a Etau keng kadaang ka ngitamen keng daang ta ngikilinga keng daang, nabo ejoikinit eminakini ekidunyet keng loger lo eminar ngesi eboyor keng a ilope. Ejok akiwap ngakiro naarei nugu idwangit tani alemikin Akuj ngakipeyos a ngibaren ka ngainakinet nache.”

³⁴Na ayenea Yesu atamar atachu ngesi nguna a aosou, tolimok tama, “Nyilona iyong Anapolou a Akuj.” Arumoret kanguna, emam nabo itwaan asak akingit ngesi ngakiro ngache.

³⁵Na etatamea Yesu alotooma akai a Akuj kingit tama, “Nyo ebaatar ngiketatamak a etal erai Kiristo ales a Daudi?

³⁶ Edodikini Etau a Akuj Daudi alimun tama: ‘Alimokini Ekapolon Akuj Ekapolon kang tama, kiboikin nege lowae lo aloteten kang, tanang eewaakini ngimoe kon kwap ngakejen kon!’

³⁷Ani kenyarit Daudi elope ngesi ‘Ekapolon’, ikokini nabo Kiristo eliwor ales a Daudi ai?” Apupokinit asepich a ngitunga ngakiro a Yesu a alakara.

³⁸Na etatamea Yesu kesi tolimok tama, “Tochoikinos aloketatamak a etal, eminasi kesi akirimit akwap enapito ngiworui lukooyak, nabo kimalae a arimatoi ani egieleta ngitunga ngiboro.

³⁹Eseunete kesi niajokon ni iboikinosi anakais a Atuk ka ni imujere.

⁴⁰Edemete kesi ngapuseru ngiboro kech, ani erumor, kinisakinos ilipito nikooyen akiding pas. Eroner eriras kech noi!”

⁴¹Na ebooyo Yesu alodiyete asaduku a ngaropiyae, etee ngitunga iwaanakinete ngaropiyae nasaduku. Kiwaakis ngikabarak ngaropiyae nakaalak noi.

⁴²Sodi bu apuserut nakebootonit kiwaak ngadururio ngaarei na eraakasi ekimar kech atongkol.

⁴³Tochunak Yesu ngirukitos keng wapei tolimok tama, “Kalimokinit ayong esi atamar ewaak apuserut nakebootonit naga ngaropiyae nakaalak noi nasaduku na idwangito na a ngitunga aluche kadaang.

⁴⁴Kainyo ngitunga ngulu daang ewaanakinete ngaropiyae analalau a ebari kech. Nakaneni ngesi, aloboot keng, ewaak daang na atingit, ajal tani napalem eyaritor.”