Read turkana Mariko 13 Bible Online

Mariko 13 - turkana bible

Mariko 13

¹Na apudorea Yesu alokai a Akuj, abu epei a ngirukitos keng tolimok tama, “Eketataman, kingolik a! Abe kitalakarete ngamoru nugu ka ngakais nugu!”

²Tatachak Yesu tama, “Itee iyong ngakais naapolok nugu a? Emam tani amoru apei kane na idongi edukokina, eukorio ngamoru daang.”

³Ebooyi Yesu alomoru a ngikito a akimiet ibakito ka akai a Akuj. Pot Petero ka Yakobo ka Yoana ta Andirea neni kingita ngesi tamasi,

⁴“Tolimokinae sua atamar ori esubakinotor nugu daang, nyo esubakin toyenere atamar anang akolongit na esubatar ngakiro nugu?”

⁵Tolimok Yesu kesi tama, “Tochoikinos warasi itwaan nyikingal esi.

⁶Epote ngikaalak iruorosi a ekiro kang ebalasi, ‘Ayong ngesi ngolo!’ Ingalaate kesi ngitunga ngikaalak.

⁷Warasi nyikibul na iirareta esi echale a ejie alodiye nabo kiirasi ngakiro a ejie anikalonan. Esubakinosi ngakiro na ikote nguna nakaneni nyidodiunito kesi atamar anang esal.

⁸ Ejikinosi ngitunga a akwap aapei ka lu anache, ngitunga a ekapolon a epei, eremete ngitunga a ekapolon aloche. Emaranikini akwap alowaitin alugelagelae nabo emini eron a akoro. Eliwor ngakiro nguna akisiakin a aboliaro, loger a ariaba ana ekingaren edolokini ikoku akidouno.

⁹“Tochoikinos esi kainyo eya ngitunga lu kirumunete esi kiterikosi nikititaare. Kibungaate kesi esi anakais a Atuk nabo kitoweyo alongaren ngikatukok ka ngikapolok kotere ayong, sodi tolimokineta kesi Ngakiro Naajokak a Akuj.

¹⁰Nakaneni ani mono ekingaren, ejoikinit Ngakiro Naajokak itatamio ngitunga daang.

¹¹Ani nakirumunere esi kitorikor akititare ani kititaare, warasi ngakiro nyeeriab ngitai kus atamar anukiro ilimunete. Na enangea esaa ngolo, tolimutu nakidodikinio. Kainyo ngakiro na ilimunete esi meere ngakus, eraakasi ngaka a Etau a Akuj.

¹²Ipotorete ngitunga talokaato kech taarae nabo taapa ipotorete ngide kech loger ngolo. Enyoikinete ngide ngikauriak kech kipotosi sodi taarae.

¹³ Kiremokinosi esi ngitunga daang kotere ayong. Nakaneni ngini enaikini tanang losal, eyuunio.

¹⁴“Ingolikinete ‘Ekenyasunan Loaronon noi’ ewei ani nyejoikinit ngesi emini.” (Toyen ekesoman atamar: nyo eger a ngakiro kanu!) “Ejoikinit lu eyakasi nakwap a Yudea ematarosi lomor.

¹⁵Itwaan ni edokit kidiama akai keng, nyeetiyaun esakit alomar tooma kai alemun idiobore ni etingi.

¹⁶Itwaan ni eyei mana nyejoikinit ebongori alemun eworu keng.

¹⁷Erokearosi ngakiro noi ngirwa ngulu ani a ngaberu ana epotiete ka na itanakete!

¹⁸Kilipa Akuj nyeesubakin ngakiro nguna ngirwa lu a akiporo!

¹⁹Kainyo erokearosi noi ngichan a ngirwa kangulu kidwanga daang lu apean nakwap napei kolong asubakinea Akuj akwap tanang tokona. Kori nyepete nabo jik ngichan lu ikote ngulu.

²⁰ Nakaneni atub kolong Akuj ngirwa ngulu. Arai kolong nyiikok neni, kemam itwaan epuun. Nakaneni kotere ngitunga keng luseuna, atub kolong Akuj ngirwa ngulu.

²¹“Ani kilimok esi itwaan tama, ‘Kingolikisi a, Kiristo ngesi lo!’ Kori tama, ‘Kingolikisi a, nyeye!’ Nyinupa ngakiro keng.

²²Kainyo epote ta Kiristo lukaliokok ta ngikadwarak a alioko, tosuba ngakitoodikinet nakailiilok ta nakatalarak esakete akingalare tani ngitunga luseuna a Akuj, erai kepedorete akingalare.

²³Tochoikinos! Kalimok ngakiro daang eringa ngirwa ngulu nyenanga.

²⁴“Ngirwa lu edaunotor ngichan ngulu, eribokini akolong, tojongo elap akicha.

²⁵Echakunosi ngikanyer anadis nabo emaranikini agogongu daang nakaninikan na eyei kidiama.

²⁶Sodi tatakanu Lokookeng a Itwaan etiyaun eyei lodowon, etiyaun ngesi a agogongu anaationon noi ka apolou.

²⁷ Emeari ngesi ngimalaikae keng lowaitin daang a akwap, sodi tochunut ngitunga luseuna a Akuj alowae a epei a akwap tanang lowae loche.

²⁸“Kimiekisi ngakiro a emeyen kitatam esi. Na epuseakuuneta ngaten keng tokilikiluut sodi tolibut ngakui, iyenunete atamar aapuu akiporo.

²⁹Aloger alopei kangolo, na ingolikineta ngakiro nguna daang esubakinosi, toyena atamar aapiki ngesi adolun.

³⁰Kalimokinit ngakiro na iteni dir atamar esubakinosi ngakiro nguna daang eringa epewae a ngitunga alu tokona eyarete nyetoaka.

³¹Edaun adis ka akwap nakaneni nyedaunosi ngakiro kang jik.

³²“Nakaneni emam itwaan eyeni akolongit ngina kori esaa atamar enangi ori, nyeyenete tani ngimalaikae anadis, kori nyeyeni tani Lokookeng a Akuj, Akuj Apa bon ngesi eyeni.

³³Kiboikinos irichuna sodi tokienya kainyo nyiyenete akolongit na enangea esaa ngolo.

³⁴Ikokini itwaan ni anyouni alosit anawi keng kimiek ngikasubak etich keng toweikis ngakiro anawi keng daang, kidodik ipei kech daang etich lo esubi. Ani erumor tolimok ekeyokon a ekidor atamar kitee awi lokojokon.

³⁵Tochoikinos robo irichuna, kainyo nyiyenete akolongit na ebunio elope a awi, kerai ebong kori kedil akwaar kori na ebayiarea kori na ipiripiruunea akolong.

³⁶Tokienya robo ani kebu atipei nyikiriam esi ijotoote.

³⁷ Nakalimokinit ayong esi, alimokinit ngitunga daang: Kiboikinos irichuna!”