Read turkana Mariko 14 Bible Online

Mariko 14 - turkana bible

Mariko 14

¹Edongit ngirwa ngiarei tanang akolongit na esukukuu alo anyaritae Adeparet ka lo a Ngamugati Anapadok. Apot ngimurok luapolok a akai a Akuj ka ngiketatamak a etal tasaka erot lo irumuneta Yesu peeyenio, sodi taara.

² Tamasi kesi, “Nyejoikinit kirumuni ngesi ngirwa lu a esukukuu, kainyo elomakinete ngitunga ekurikur.”

³Ayei Yesu Betania kai a Simon, itwaan ni adeaka sek enomokere. Ani eringa Yesu imuji, bu aberu etingit echupa lokooyen lo enyaritae alabasita lo eleleba akimiet nakaakunyon na enyaritae nardo.*g** Arai akimiet ngina na elalak ngaropiyae egielere. Tobwang ngesi echupa ngolo dio tobukok akimiet nakou a Yesu.

⁴Tongoa ngitunga ngiche lu ayakasi neni kingitanaros ebalasi, “Nyo enyasunere akimiet nakakukunyon naga?

⁵ Adikino akimiet naga peegielario a ngadinari[4] ana iporito ngamiae ngauni sodi nakinae ngikebootok ngaropiyae a?” Kisuburata kesi aberu ngina niaronon.

⁶Nakaneni tolim Yesu tama, “Kimiekisi ngesi. Nyo ichaneta esi ngesi? Kasubakinea ngesi ayong etich loajokon noi.

⁷Irukito esi ka ngikebootok jiik ipedorete akingarakin esaa daang lo cha isaketa. Nakaneni nyikiruki ayong ka esi ngirwa daang.

⁸Asubaki ngesi ngakiro na epedori. Abukokini ngesi akimiet nakakukunyon nakwaan kang sodi katonukere ayong.

⁹Tokona, kalimokinit iteni dir atamar, wadaang nicha itatamere Ngakiro Naajokak a Akuj anakwapea, elimorio aberu naga kotere ngakiro na asub ngesi nugu.”

¹⁰Sodi tolot Yuda Isikariote lo erai epei a ngirukitos alutomon ka ngiarei, lomurok luapolok a akai a Akuj, arikokin kesi Yesu.

¹¹Talakaros noi iirarete ngakiro keng, kichikakis ngesi atamar kiinakini ngaropiyae. Sodi tolomak Yuda akisak erot lo erikokinea kesi Yesu.

¹²Akolongit na ingareni akolongit na esukukuu a Ngamugati Anapadok, na engolere ngimesekin lu enyamio akolongit a Adeparet, kingita ngirukitos a Yesu ngesi tamasi, “Aliwae isaki iyong sua atoloto atosubakineta iyong akimuj a esukukuu a Adeparet?”

¹³Sodi tomea Yesu ngiarei kech ebala: “Kapesi lore, kisiriamuuni esi ekile lo edakit alupe a ngakipi. Kiwapakisi ngesi

¹⁴tanang kai na elomari ngesi. Tolimokis ilope a akai tamasi, ‘Ebala Eketataman kingitutu iyong keyei amaniyat na imujeta ngesi ka ngirukitos keng akimuj a esukukuu a Adeparet?’

¹⁵Kidodikini ngesi esi amaniyat naapolon na esubakinitae alokidiama akai, nabo iriamunete ngiboro daang esubakinitae.”

¹⁶ Torotokis ngirukitos keng toloto lore, toriamut ibore daang ikoni ni alimokinitor Yesu kesi. Tosubakis akimuj a esukukuu a Adeparet.

¹⁷Na anangea ebong, kirukut Yesu ka ngirukitos lutomon ka ngiarei.

¹⁸Ani eringa imujete, tolim Yesu tama, “Kalimokinit esi ngakiro na iteni dir atamar, karikokini epei kus ayong ngitunga, ngolo ngesi lo kimuji ka ayong aapei.”

¹⁹Tonoma ngirukitos keng ngakiro nguna ngitai tolomakis akingitanar ngesi a ngapeipei tamasi, “Kori erai robo ayong?”

²⁰Tatachak Yesu kesi tama, “Erai epei kus alutomon ka ngiarei, ngesi lo ilumokini amugati tooma natubwa ka ayong aapei.

²¹Etoani Lokookeng a Itwaan eger lo igiritere nagiran, nakaneni etioko nginyas lu eriamuni itwaan ngini erikokini Lokookeng a Itwaan ngitunga! Kejoikinit kolong itwaan ngini peidounitoe!”

²²Ani eringa imujete, tolem Yesu amugati kilipak ebuakinit Akuj alakara. Tonyilinyili sodi nak ngirukitos keng ebala, “Totinga tanyama, akwaan kang ngesi naga.”

²³Sodi tolem ekopo, kilip ebuakinit Akuj alakara, nak kesi dio tamata daang.

²⁴Tolim Yesu tama, “Ngaakot kang nugu na abukor kotere ngitunga lukaalak, erai kesi iyookinete achamunet a Akuj.

²⁵ Kalimokinit esi ngakiro na iteni dir atamar nyamasi nabo jik emuna lo epuritoe lo tanang akolongit na amasea emuna lo epuritoe lokitetet Anapolou a Akuj.”

²⁶Sodi toeokis kesi eos ani erumor, toloto moru a ngikito a akimiet.

²⁷Tolimok Yesu kesi tama, “Irotokinete esi daang kotere ayong, kainyo igiritae nagiran atamar, ‘Eari Akuj ekeyokon, sodi kialaros ngamesekin daang.’

²⁸ Nakaneni naketeyarunea ayong Akuj, kengarenikini ayong esi atolot Galilaya.”

²⁹Tolimok Petero Yesu tama, “Nyakaisikini ayong iyong jik, tani kiisikis luche daang!”

³⁰Tolimok Yesu Petero tama, “Kalimokinit ngakiro na iteni dir atamar, takae nakwaare eringa ekokoroit nyerukino ngarukinet ngaarei, ilimuni iyong ngalimunet ngauni atamar nyikiyeni ayong.”

³¹Tatachak Petero iricha tama, “Nyalimuni ayong atamar nyakayeni iyong jik, tani ketamar kaario ayong ka iyong!” Tolimut ngirukitos luche daang ngakiro napei nguna.

³²Tanangut kesi nakwap na anyaritae Getisemane, sodi tolimok Yesu ngirukitos keng tama, “Kiboikinos nege eringa ayong elipit.”

³³Toriko ngesi Petero ka Yakobo ta Yoana. Toriaba ngakiro etau keng kisialolongo noi,

³⁴sodi tolimok kesi tama, “Kanomito ayong ngakiro etau edikino tani kaarete. Kiboikinos nege tokienya.”

³⁵Torotok ngesi ngaren wadio, tadakakin kwap sodi kilip atamar ani kepedor, nyeanyun ngesi ka aboliaro naaronon ngina.

³⁶Kilip ngesi tama, “Apa, Apakang! Epedorosi ngakiro daang anikon. Tolema ekopo lo aboliaro lo anikang. Nakaneni meere loger lo asaki ayong, pearai lo isaki iyong.”

³⁷Sodi tobong Yesu torukau ngirukitos luuni ejotoote. Tolimok ngesi Petero tama, “Simon, ijotoe iyong a? Nyikienyete esi tani esaa epei a?”

³⁸Tolimok kesi tama, “Tokienya, kilipa sodi nyianyunosi ka akiningo. Echamit etau nakaneni nyechamit akwaan.”

³⁹Tolot ngesi nabo inaa kilip elimuununi ngakiro napei nguna.

⁴⁰Sodi tobong lorukitos keng toriam ejotoote, tokuruwo kesi akikieny. Nakaneni tongopikis kesi ngakiro na elimokinete ngesi.

⁴¹Na abongunio na a ngauni, abu tolimok kesi tama, “Eringa esi natete ijotoote, iangarito a? Arumor! Anang esaa! Kingolikisi a! Erikio tokona Lokookeng a Itwaan napolou a ngikasechak.

⁴²Tonyoutu atoloto. Kingolikisi a, lokarikokinit ayong ngitunga ngesi lo!”

⁴³Ani eringa Yesu iruoro, todolu Yuda lo erai epei a ngirukitos alutomon ka ngiarei. Arukito ngesi ka ajore naatingit ngilengea ka ngiseboe. Ameunito kesi Ngimurok Luapolok a Akai a Akuj ka ngiketatamak a etal ta ngikasukou a Atuk.

⁴⁴Alimokini sek lo arikokini ngesi ajore tama, “Itwaan ngini emalae ayong atonuak, ngesi ngolo, kirumutu ngesi, torikosi ichoikinito lokojokon.”

⁴⁵Napei adolunio Yuda, tolot nia Yesu tama, “Eketataman!” Sodi tonuak ngesi.

⁴⁶Sodi kirumut kesi Yesu totinga lokojokon.

⁴⁷Nakaneni tout epei kangulu awaasi kaneni ekileng totubo akit a akedalan a Emuron a Loapolon a akai a Akuj.

⁴⁸Sodi Yesu kingit kesi tama, “Nyo tokona iponitotor esi itingito ngilengea ka ngiseboe akirumun ayong ikwa ibore esibit arai ayong erukoot?

⁴⁹ Kirukit ayong ka esi ngirwa daang etatami alokai a Akuj, ipot esi nyikirumut ayong. Nakaneni ejoikinit ngagiran iyookin.”

⁵⁰Sodi toisikis ngirukitos daang ngesi, tamataros.

⁵¹Ayei esorokit epei lo anapit eworu epei, kiwapite Yesu. Tasaka ngitunga akirumun ngesi,

⁵²nakaneni abu toisik eworu keng kipiiri emuner.

⁵³Sodi torikoroe Yesu kai a Emuron a loapolon a akai a Akuj, ni ayakasi ngimurok luche daang luapolok a akai a Akuj ka ngiketatamak a etal ta ngikasukou a Atuk.

⁵⁴Kiwap Petero Yesu echadakina toloma tooma nalaar a Emuron a Loapolon a akai a Akuj kiboikinos ngesi ka ngasigerea kipiera akim.

⁵⁵Toripa Ngimurok Luapolok a akai a Akuj ka ngitunga daang a Atuk ngakiro naaronok ani a Yesu, sodi taareta ngesi, nakaneni emam na aanyut kesi.

⁵⁶Kisudo ngikaanyunak lukaalak ngakiro kotere Yesu, nakaneni nyikwaanikina ngakiro kech.

⁵⁷Sodi tonyout ngitunga ngiche kisudokineta ngesi ngakiro ebalasi:

⁵⁸“Kiira sua ebala, ‘Abwangi Akai na a Akuj na adukete ngitunga naga sodi atodukok ache a ngirwa a nguuni na nyepedorete ngitunga akiduk.’ ”

⁵⁹ Nakaneni emam ngakiro kangulu na apot kikwaanikin.

⁶⁰Tonyou Emuron Loapolon a akai a Akuj alokiding kech kadaang, kingit Yesu tama, “Eya ngakiro isakit iyong atachun alotitas alo kititakinitere iyong kalo a?”

⁶¹Nakaneni kililing Yesu chek, emam akiroit atachu. Kingit nabo Emuron Loapolon a akai a Akuj tama, “Iyong irai Kiristo, Lokookeng a Akuj ana epuruunitoe a?”

⁶² Tatachak Yesu tama, “Ayong ngolo, nabo ingolikinete Lokookeng a Itwaan ibooyi alowae alo aloteten a Akuj Anaapolon noi nabo irukunete ka ngidowon a adis!”

⁶³Tochilichili Emuron Loapolon a akai a Akuj ngiworui tama, “Nyeringa nabo kisaki ngikaanyunak ngiche!

⁶⁴ Iirasi esi ngimeny keng. Ibalasi tokona esi ai?” Tolimut daang engerito ebalasi: esechit ngesi ejoikinit eario.

⁶⁵Tolomakis epewae kech akimaanakin Yesu, kimukoe ngesi ereet taramae, sodi tolimokinae tamarae, “Toyen itwaan ni kirami iyong!” Sodi torikosi ngesi ngasigerea sodi kibapanasi.

⁶⁶Ani eringa Petero eyei tooma nalaar, kitoru apese neni naarai akasuban etich a Emuron a Loapolon a akai a Akuj.

⁶⁷Ani ingolikini ngesi Petero ipiara, abu tokienyik ngesi tolim tama, “Irukito iyong dang ka Yesu lo a Nasaret.”

⁶⁸Nakaneni topeg ngesi tama, “Nyayeni ayong . . . kori nyetamunit tani ngakiro na iruoro iyong.” Sodi topudo Petero nikalapatan. Toruk ekokoroit esaa lopei ngolo.

⁶⁹Kingolik apese na arai akasuban etich ngesi kaneni tolimok nabo lu awaasi kaneni tama, “Erai lo epei kech!”

⁷⁰Nakaneni topeg Petero nabo. Adaunet a esaa alodiochichi, pot ngitunga lu awaasi kaneni kititakis Petero nabo ebalasi, “Irai iyong dang epei kech dir, kainyo ibunit iyong dang alo Galilaya.”

⁷¹Sodi tolim Petero tama, “Ekong jik kataar ibore, eruoro ayong ngakiro na iteni dir! Nyayeni ayong itwaan ni ilimito esi!”

⁷²Sodi esaa lopei ngolo, toruk ekokoroit na a ngaarei. Sodi kitam Petero ngakiro na alimokini Yesu ngesi ebala, “Ani eringa ekokoroit nyerukino na a ngaarei, ilimuni iyong ngalimunet ngauni atamar nyikiyeni ayong.” Sodi kikalou ngesi lokojokon.