Read turkana Mariko 15 Bible Online

Mariko 15 - turkana bible

Mariko 15

¹Kiriamariama Ngimurok Luapolok a akai a Akuj ka ngikasukou a Atuk ka ngiketatamak a etal ta ngitunga a Atuk daang atipei totuko. Toena kesi Yesu a ngiriko, sodi torikosi nia Pilato.

²Kingit Pilato ngesi tama, “Iyong irai ekapolon a Ngiyaudi a?” Tatachak Yesu tama, “Ee, nyenguna ilimu iyong.”

³Kititakis Ngimurok Luapolok a akai a Akuj Yesu a ngakiro anakaalak,

⁴sodi kingit Pilato ngesi nabo tama, “Emam ngakiro itachuni iyong a? Topupok robo ngakiro daang nakititakinitere iyong!”

⁵Towou Yesu nabo atachun akiroit tani apei, tatalasi Pilato ngakiro nguna.

⁶Akolongit daang na esukukuu alo Adeparet, alachanakini Pilato itwaan ipei ni alimunete ngitunga atamar talachakinae alojela.

⁷Ngirwa ngulu aenitae itwaan ni anyaritae Baraba aapei ka ngirukooi lu aarete ngitunga ngirwa lu ekurikur.

⁸Na achunakinotor ngitunga alimokin Pilato tosub ngakiro napalem sek esubi,

⁹kingit Pilato kesi tama, “Isakete esi atalachak ngolo erai ekapolon a Ngiyaudi a?”

¹⁰Ayeni ngesi dir atamar arikunito Ngimurok Luapolok a Akai a Akuj Yesu nikeng ani ayakar kesi etereku ani a Yesu.

¹¹Nakaneni apot Ngimurok Luapolok a akai a Akuj kichuchukis ngitunga atamar tolimokis Pilato atamar talachak Baraba.

¹²Kingit nabo Pilato ngitunga tama, “Tokona, isakete esi ekokinea ayong ngolo inyarito esi ekapolon a Ngiyaudi ai?”

¹³Tachalut tamasi, “Taramakisi napir!”

¹⁴Kingit Pilato tama, “Nyo niaronon esechit ngesi?” Tachalakis kesi noi ebalasi, “Taramakisi ngesi napir!”

¹⁵Aloger alo asakea Pilato akitalakar ngitunga, abu ngesi talachak Baraba. Sodi atamar kidetae Yesu ani erumor torikoroe aramakin napir.

¹⁶Torikosi ngasigerea Yesu tanang tooma akai naapolon a ekapolon a Ngiroma sodi tanyaraut luche arukito ka kesi tochunun neni.

¹⁷Kitanapae Yesu eworu lopus-arengan. Kidanyakinae apukot a ngiikwa, kitanapae ngesi anakou.

¹⁸Sodi tolomakis kesi akimalare ngesi ebalasi, “Kimiekisi Ekapolon a Ngiyaudi kipuruunoe.”

¹⁹Tarama ngesi nakou a aburo, kimaanakis, toriediko alongaren keng ipuruunito.

²⁰Na arumoreta akianar ngesi, talachasi eworu lopus-arengan ngolo sodi kitanapa ngesi ngiworui lukeng. Sodi torikosi ngesi nikalapatan aramakin napir.

²¹Kiriamun ka itwaan ni anyaritae Simon lorot. Abunit ngesi anariet alosi lore. Sodi kitingakis ngasigerea ngesi akiwok apir a Yesu. (Arai Simon eka a akwap a Kurene, tarai nabo apakeng ka Alekisanda ta Rupus).

²²Torikosi Yesu ni anyaritae Gologota, eger keng atamar, “Nia Akulului a Akou.”

²³Tasaka kesi kaneni ainakin ngesi emuna lo epuritoe lo emorikinitae ka ekinyaate lo ekukuny todwar, nakaneni towou Yesu akimat.

²⁴Sodi taramakis ngesi napir, tokora ngiworui keng emariate tobolos esaki itwaan daang aanyun eworu lo elemari.

²⁵Aramakinio ngesi napir ngisaae nguuni a ataparach.

²⁶Egiritae ngakiro na etitakinitere ngesi kona: “Ekapolon a Ngiyaudi.”

²⁷Taramakis ngirukooi ngiarei ka Yesu napirio aapei, epei lowae lo aloteten keng, epei lowae lo a alokedieny keng. [

²⁸ Aloger kangolo, kiyookin ngagiran na igiritae kona, “Emorikinitae ngesi ka ngirukooi aapei.”]

²⁹Kimungumunga ngitunga lu etorunete neni ngakies kech iyenyete ngesi ebalasi: “Goe! Be ibala ngoon iyong ibwangi Akai a Akuj sodi todukok ache nabo a ngirwa a nguuni a?

³⁰Toyuun pan totiyaun anapir!”

³¹Tokianatar Ngimurok Luapolok a akai a Akuj ka ngiketatamak a etal Yesu loger lopei ngolo ebalasi, “Ayuuni ngoon luche nakaneni nyeyuun ngesi elope!

³²Ataanyutu pan Kiristo lo erai Ekapolon a Ngiyaudi etiyaun anapir tokona sodi atonupa ngoni ngakiro keng!” Sodi kiyenya tani luarei Yesu, lu aramakinitae ka ngesi napirio.

³³Na anangea naparan lotingilan toribok akwap daang chuch tanang adaunet a ngisaae a nguuni.

³⁴ Na anangea ngisaae ngikan-koomwon, kikalou Yesu kirema tama, “Eloi, Eloi, lema sabakisani?” Eger keng atamar, “Akuj kang, Akuj kang, nyo kiisikinea?”

³⁵Kiirasi ngitunga ngiche lu awaasi kaneni tamasi, “Topupokisi, enyarit ngesi Elija!”

³⁶ Topeunea ipei kech ibore niyebuk kirepak lomuna loadwaran apuritoe ngolo, todupak ngaren akitoe sodi kikea ngesi kiwaak lopon a Yesu ebala, “Ataanyutu panite kebuni Elija atiyaun ngesi anapir!”

³⁷ Kirurumak Yesu totoan.

³⁸Toberes aworu nakooyen eneno alokai a Akuj ngaarei napei alokidiama tanang kwap.

³⁹Na anyungarea ekarikon a ngasigerea lo awei alongaren apir eger lo atoani Yesu, tolim ngesi tama, “Kerai itwaan en Lokookeng a Akuj dir!”

⁴⁰Eteete ngaberu ngache na achadakina kaneni Yesu. Arai kesi ta Mariam Magadalene, Salome ka Mariam itiokeng a Yosep ka Yakobo loochi.

⁴¹ Ewapuunete kesi Yesu alo Galilaya ingaranakinete ngesi. Ayakasi ngaberu nakaalak neni nasek apote ka ngesi alo Yerusalem.

⁴²Na anangea ebong a akolongit ana Asubakin, (ngesi akolongit na ingareni Sabato),

⁴³todolu Yosep lo a Arimatea. Arai ngesi itwaan ni ayenikinitae Anatuk nabo edarit ngesi abunere a apolou a Akuj. Tolot Yosep nia Pilato peemit dio atamar asaki akwaan a Yesu.

⁴⁴Toriangakin Pilato noi na eirarea atamar ketoana Yesu. Tanyara ekarikon a ngasigerea kingit keberakina Yesu akitu.

⁴⁵Na eirarea Pilato ngakiro a ekapolon kangolo, tolimok Yosep atamar tolema akwaan a Yesu.

⁴⁶Togielu Yosep eworu lodapal lokooyen totiyau akwaan a Yesu toinik loworu ngolo, sodi kitoperik naliel naabokakinitae nataaba. Kikokorik ngesi amoru naapolon nakituk a aliel.

⁴⁷Taanyungasi Mariam Magadalene ka Mariam itiokeng a Yakobo ni eteperikinio akwaan a Yesu.