Read turkana Mariko 16 Bible Online

Mariko 16 - turkana bible

Mariko 16

¹Adaunet a Sabato, apot Mariam Magadalene ka Mariam itiokeng a Yakobo ta Salome toloto akigiel akimiet nakakukunyon esakete alosit akiwasakin nakwaan a Yesu.

²Toloto kesi naliel Jumapili nataparach napei ipiripiruuni akolong.

³Ani eloose alorot kingitanaros make ebalasi, “Ngae kingarakini ngoni akikokoriyor amoru anakituk a aliel?” (Apolot amoru ngina noi).

⁴Ani ingoliarete kesi, taanyungasi amoru ngina kikokoriyor.

⁵Sodi tolomasi kesi naliel, taanyungasi edia lo anapit ngiworui luakwaak kea ibooyi alowae alo aloteten a aliel, tobul kesi noi.

⁶Tolimok kesi tama, “Kuriasi nyiiriangakinosi. Ayeni ayong atamar isakete esi Yesu lo a Nasaret, longoon aramakinio napir. Emam ngesi kane, eteyarun! Kingolikisi a, ningoon eteperikinitoe ngesi nege.

⁷ Kapesi tokona tolimokisi Petero ka ngirukitos luche ngakiro nugu tamasi: ‘Elosi ngesi Galilaya kingareni esi! Ianyungarete esi ngesi kaina loger lokolong kilimokinitor ngesi esi.’ ”

⁸Sodi topudosi kesi nikalapatan kipiirioto analiel emaranete, tobulite. Nyelimokina kesi itwaan tani ipei ngakiro nguna kainyo abulit kesi. [

⁹Na ayarunea Yesu Jumapili nataparach, kidodiun Yesu ani a Mariam Magadalene ana kolong epudori ngesi ngipean ngikan-kaarei.

¹⁰Tolot ngesi tolimok ngirukitos keng lu egorosi kialolongete,

¹¹ani iirarete kesi ngesi ebala eyari Yesu engolik ngesi, nyenupa kesi ngakiro keng.

¹²Ani erumor, tatakanu Yesu alorukitos keng a ngiarei a eger a eche. Aloose ngirukitos keng lowae lo a ngadakarin.

¹³Tobongosi kesi sodi tolimokis luche, nakaneni nyenupa kesi.

¹⁴Esal kanguna kadaang tatakanu Yesu ani a ngirukitos alutomon ka epei imujete. Kikilak kesi ani peanupeta ngakiro keng ka akichananu kech ani awouneta akinup ngakiro alu aanyunete ngesi eyari.

¹⁵Tolimok kesi tama, “Kapesi nakwapea daang kitatama ngitunga daang ngakiro naajokak.

¹⁶Itwaan cha daang ni enupi kibatisae eyuun. Nakaneni ngini nyenupi, irirao.

¹⁷Eanyunete ngikanupak agogongu na esubeta ngakitoodikinet nakailiilok ikote nugu, itwaranakinete ngipean a ekiro kang. Iruorosi ngabukui nakiteat,

¹⁸ ani kirumut kesi ngimunio kori kemat ekitoe lokangedaran, nyewanasi. Idokokinete kesi ngikadeakak ngakan, tangalekis.”

¹⁹Arumoret a ekiruor a Ekapolon Yesu ka kesi, yaarae ngesi kidiama nadis kiboikin lowae lo a aloteten a Akuj.

²⁰ Toloto ngirukitos keng akitatam wadaang. Tosub Ekapolon Yesu etich ka kesi aapei, sodi kisileereu atamar eraakasi ngakitatamet kech ngaka iteni kotere ngakitoodikinet nakailiilok asubete kesi.]