Read turkana Mariko 2 Bible Online

Mariko 2 - turkana bible

Mariko 2

¹Tobongo Yesu lore a Kaperinaum ekisidi a ngirwa a ngidikidio. Sodi kiirasi ngitunga atamar eyei ngesi nawi.

²Nakaneni tochununos ngitunga lukaalak noi kilelebunos akai tanang nikalapatan a ekidor. Na etatamea Yesu kesi ngakiro a Akuj,

³kilepulepuut ngitunga nguomwon itwaan niangwalan nia Yesu.

⁴Nakaneni kotere asepich a ngitunga na alal, apot nyeriamut nikaaloman ni eyaareta ngesi nikeng. Nakaneni todokasi topedo kidiama a akai ana ayei Yesu. Na apedunioto epuke, kiyoliut itwaan ngini iteperikinitoe lojemu keng.

⁵Na ayenea Yesu atamar enupito kesi lokojokon, tolimok ekile loangwalan tama, “Lokoku, arimakin ngasechesea kon.”

⁶Epewae a ngiketatamak a etal lu ebooyete kaneni kitama ebalasi,

⁷“Nyo iruoror itwaan en kona? Imenyarit ngesi Akuj! Emam itwaan epedori arimakin ngasechesea mati Akuj bon!”

⁸Toyen Yesu atipei nguna etamete kesi tolimok tama, “Nyo itameta esi nguna?

⁹Nyoni etieno, alimokin ekangwalan atamar, ‘Arimakin ngasechesea kon,’ kori atamar, ‘Tonyou, tolema ejemu kon torotok’?

¹⁰Asaki ayong esi toyena atamar eyei Lokookeng a Itwaan agogongu anakwap na erimakinea ngasechesea.” Sodi tolimok ekangwalan ngolo tama,

¹¹“Kalimokinit iyong atamar tonyou tolema ejemu kon tolot nawi!”

¹²Tonyou itwaan ngini atipei iteete ngitunga daang tolema ejemu keng tolot. Toililikis ngitunga daang ngakiro nguna kipuruut Akuj ebalasi, “Ekoe, nyaanyuna na ikote nugu a ache!”

¹³Tolot Yesu nabo lokwaas a anam a Galilaya. Pot ngitunga lukaalak neni tolomak ngesi akitatam.

¹⁴Ani eringa elosi alorot taanyunga eketubukon echur lo anyaritae Lawi lokookeng a Alipayo ibooyi alokai ana edieununea ngesi ngaropiyae a echur. Tolimok Yesu ngesi tama, “Kiwapakinae ayong.” Tonyou Lawi kiwapak ngesi.

¹⁵Ani ekisidi emuji Yesu alokai a Lawi. Ewapito ngiketubukok echur lukaalak ka ngikasechak. Kiboikinos Yesu ka ngirukitos keng kimuja aapei.

¹⁶Ngiketatamak a etal ngiche lu eraakasi Ngiparisayo naengolikineta Yesu imujete ka ngikasechak ta ngiketubukok echur, kingita ngirukitos a Yesu tamasi, “Nyo imujeta ngesi ka ngiketubukok echur ta ngikasechak?”

¹⁷Sodi na eirarea Yesu ngakiro kech tolimok tama, “Ngitunga lu nyedeakasi nyesakete eketedekan, lu edeakasi kesi esakete. Nyebuno ayong anyarare luajokak. Abuni anyarare ngikasechak.”

¹⁸Ngirwa ngiche, aroneenete ngirukitos a Yoana Ekebatisan ta Ngiparisayo akimuj. Pot ngitunga ngiche kingita Yesu tamasi, “Abe eroneenete ngirukitos a Yoana Ekebatisan kalu a Ngiparisayo akimuj, nyo peeroneeneto ngirukitos kon akimuj?”

¹⁹Tatachak Yesu tama, “Itamito esi atamar nyimujete ngitunga lu enyaraunitae nakuuta eringa erukito ka ekile lo iuta a? Mam jik! Ani eringa erukito ka ekile lo iuta, nyepedorete akiron akimuj.

²⁰Nakaneni enangi akolongit na erikorere ekile lo iuta anikech, sodi toroneeneto kesi akimuj ngirwa ngulu.

²¹“Emam itwaan edapi eworu longorot a aworu anakitetet. Ani kesub itwaan kongina, echikin aworu ngina aloworu kangolo kitabalanyany apedot a eworu.

²²Kori emam itwaan tani ipei ni epedori akiturakin emuna lo aringa epurio tooma lotuo longorot, ani kiturak, ebwangabwangaari emuna etuo ngolo sodi tobukor emuna nabo kinyasun etuo. Nakaneni iturakinio emuna lo aringa epurio lotuo lokitetet.”

²³Kitoro Yesu ka ngirukitos keng lomanikor a ngimomwa akolongit na a Sabato. Tolomakis ngirukitos keng abiluunun ngakies a ngimomwa.

²⁴ Sodi kingita Ngiparisayo Yesu tamasi, “Ayoro, nyo esubeta ngirukitos kon na engeritoe esubio alotal akolongit na a Sabato?”

²⁵Tatachak Yesu kesi tama, “Nyisoma esi nakolong asubi Daudi ka ngitunga keng na asaketa ibore ninyamat na anyamea akoro a?

²⁶ Sodi ngesi alomar kai a Akuj, ngirwa lu araakar Abiasar Emuron Loapolon a akai a Akuj, sodi tanyam ngamugati na alemikinitae Akuj. Araakasi ngimurok a akai a Akuj make achamakinitae alotal enyamete ngamugati nguna nakaneni abu Daudi tanyam sodi nak tani ngirukitos keng.”

²⁷Tolim Yesu ngakiro narumoret tama, “Asubio Sabato kotere itwaan meere itwaan kotere Sabato.

²⁸Kanguna, Lokookeng a Itwaan ngesi erai Ekapolon a Sabato.”