Read turkana Mariko 3 Bible Online

Mariko 3 - turkana bible

Mariko 3

¹Toloma nabo Yesu kai a Atuk. Ayei neni itwaan ni angwalit akan.

²Ayakasi ngitunga ngiche lu asakete aripun ibore idio ni ichwangakini Yesu topedoreta akititakin, kiteto kesi ngesi ediye esakete akingolikin kitojoki ngesi itwaan ngini akolongit na a Sabato.

³Tolimok Yesu itwaan ni angwalit akan tama, “Bua ngaren nege.”

⁴Sodi kingit ngitunga tama, “Echamakina Alotal yok esubio naajokak kori naaronok akolongit na Sabato? Akiteyar itwaan kori amunyar?” Nakaneni kililinga kesi emam akiroit alimut.

⁵Tokienyik Yesu kesi daang engoit, ani nabo ikoni neni dang, kisieneto kesi ngesi ani agogongioto ngakies tosechito. Sodi tolimok itwaan ngini tama, “Kitorwaa akan kon.” Ani itorwaari ngesi akan, tojoker.

⁶Nakaneni topudosi Ngiparisayo Alokai a Atuk toloto totuko ka ngitunga a atukuor ka Erode eger lo eareta Yesu.

⁷Torotok Yesu kaneni ka ngirukitos keng aapei tananga lokwaas a anam sodi kiwapuut kesi asepich a ngitunga. Aponito ngitunga ngulu alo Galilaya ka Yudea,

⁸ka Yerusalem ka akwap a Idumea, ka ekwakaye a angolol a Yorudan ta akwap a ngirerea a Tiro ka Sidon. Bu asepich ngina daang nia Yesu kainyo eirarito ngakiro daang nasek asubi Yesu.

⁹Kona alalaketa ngitunga noi, sodi tolimok Yesu ngirukitos keng atamar yaut atubwa apei diye sodi nyerideta ngesi ngitunga.

¹⁰Kona etojokea ngesi ngitunga ngikaalak, kidingidingas daang lu adeakasi esakete akitap ngesi.

¹¹ Nakaneni na engolikineta ngitunga lu akoporito ngikerep ngesi, tadakakin kwap ngaren keng kiremasi ebalasi. “Irai iyong Lokookeng a Akuj!”

¹²Todungok Yesu ngipean atamar nyeelimokis itwaan tani ipei atamar ngesi arai ngae.

¹³Todoka Yesu moru, tanyarau ngitunga lu asakit ngesi. Pot ngitunga ngulu neni.

¹⁴Toseu ngesi ngitunga ngitomon ka ngiarei tanyara kesi ngimeanara. Tolimok tama, “Kaseu ayong esi eruko ka ayong nabo kameari ayong esi akitatam.

¹⁵Emini esi agogongu na itwarakineta ngipean.”

¹⁶Ngirora a ngimeanara alutomon ka ngiarei aseuni ngesi kesi lu: Simon (alimokini Yesu ngesi ekiro be Petero),

¹⁷Yakobo ka lokaatokeng Yoana, eraakasi talokookeng a Sebedayo lu alimokini (Yesu ekiro be Boaneriges, ngesi atamar, “Talokookeng a Agiro”),

¹⁸Andirea ka Pilip ka Bartolomayo ka Matayo ka Tomas ka Yakobo lokookeng a Alipayo ka Tadayo ka Simon lo a atukuor anyaritae Salote,

¹⁹ka Yuda Isikariote, lo arikokini Yesu ngitunga.

²⁰Sodi tolot Yesu nawi. Tochunun nabo asepich a ngitunga natikaalan, tongopik tani Yesu ka ngirukitos keng kona imujete.

²¹Ani iirarete ngitunga keng ngakiro nguna apot toloto arikor ngesi kainyo abalasi ngitunga, “Ekerepik ngesi!”

²² Abalasi ngiketatamak a etal ngiche lu apote alo Yerusalem, “Ekapolon a ngipean Beelsebul eyei tooma keng! Erai lokapolon a ngipean ngesi eanyunitor ngesi agogongu na itwarakinea ngipean.”

²³Tanyarau Yesu kesi tolimok a ngakitadapet tama: “Ikokini Esiitan itwarakin bon ai?

²⁴Akwap na etiakatiakatar ngitunga tojwoto make, inyasun akwap ngina.

²⁵Kori ani ketiakatiakasi ngitunga apeiwi tojwoto make, ialarosi kesi.

²⁶Nakaneni ani kenyoikin Esiitan bon, sodi totiakitiak apolou keng, nyerubakini jik apolou ngina, esaluni.

²⁷“Emam itwaan elomakini itwaan nikajwon anawi keng tolema ngiboro keng daang mati mono keen itwaan nikajwon, ani ekisidi tolema ngiboro a awi keng daang.

²⁸“Kalimokinit ngakiro na iteni atamar, erimakinio ngitunga ngasechesea ka ngakiro naaronok daang na imenyatar kesi.

²⁹Nakaneni itwaan cha daang ni elimuni naaronok imenyi Etau a Akuj, nyerimakinio jik, kainyo asech ngesi akisech napenyerimakinio.” (

³⁰ Alimuni Yesu nguna kainyo abalasi ngitunga ngiche, “Ekoporito ngesi ngikerep.”)

³¹Todolut itiokeng ka ngikaitotoi a Yesu, towaa anikalapatan a akai tomeasi itwaan anyarare Yesu.

³²Ebooyi asepich a ngitunga kaneni eriamit Yesu alowaitin kadaang. Tolimokis ngesi tamasi, “Ayoro, eyakasi itiokon ka talokaatokon nikalapatan kisakete iyong.”

³³Tatachak Yesu kesi tama, “Ngae erai itiokang, tangae eraakasi talokaato kang?”

³⁴Tokienyik ngitunga lu eriamito ngesi tama, “Kingolikisi, lugu kesi eraakasi itiokang ka ngikaitotoi kang!

³⁵Itwaan cha daang ni esubi na esaki Akuj, ngesi erai lokaatokang ka nakaatokang ta itiokang.”