Read turkana Mariko 4 Bible Online

Mariko 4 - turkana bible

Mariko 4

¹Tolomak Yesu akitatam nabo alokwaas a anam a Galilaya. Kotere asepich a ngitunga na achunakina neni, todoka Yesu natubwa kiboikin. Towo asepich a ngitunga alokwaas a anam.

² Kitatam ngesi kesi ngakiro nakaalak a ngakitadapet tolimok tama:

³“Topupokisi! Ayei kolong itwaan ni alosi akitare.

⁴Na elakinea ngesi ngikinyam mana, apot ngikinyam ngiche kialakin lorot, sodi kidepasi ngikieny.

⁵Apot ngiche kialakin nalup na ewarawarakina kidiama natabab. Toruput ngikinyam atipei kainyo pealalak ngalup.

⁶Sodi na ariraunea akolong tonom ngimomwa luuchik ngulu, nabo kotere nipeapisitotor ngaten apot tooniyosi.

⁷Apot ngikinyam ngiche kialakin tooma lookwa. Ani erupunete ngiikwa torida ngimomwa lu arupunito sodi nyekoniut ngimomwa.

⁸Nakaneni kialakinos ngikinyam ngiche nalup naajokak, toruput ngimomwa topolout, tokoniut ngimomwa: ngiche ngitomwon-uni, ngiche ngitomwon-kapei, ngiche amiat apei.”

⁹Sodi tolim Yesu ngakiro narumoret tama, “Ani keya ngaki nakiiraret, kiira robo!”

¹⁰Na ebooyo Yesu alopei, kirukut ngirukitos lutomon ka ngiarei ka epewae asepich a ngitunga anasek etatami ngesi tolimokis ngesi atamar kisaki kesi atoyena eger a ngakitadapet.

¹¹Tatachak Yesu kesi tama, “Kidodikin esi ngakiro namunonoe a Apolou a Akuj. Nakaneni epupete ngitunga luche ngakiro nguna daang a ngakitadapet,

¹² sodi toliwor, ‘Iteete cha iteete, nakaneni nyeyenete, epupete cha epupete nakaneni nyechoiarete. Arai kikoni neni, kereuna kesi nia Akuj, nakaneni kerimaki ngesi kesi.’ ”

¹³Sodi kingit Yesu kesi tama, “Nyiyenete esi eger a ngakitadapet kanu a? Ikokinete esi iyenete eger a ngakitadapet a ngache ai?

¹⁴Itae eketan Akiroit a Akuj.

¹⁵Ikote ngitunga ngiche ngikinyam lu ealakinosi lorot, napei iirareta kesi Akiroit a Akuj, bu Esiitan tolema akiroit na eyei lotai kech.

¹⁶Ikote ngitunga ngiche ngikinyam lu ealakinosi natabab. Napei iirareta kesi Akiroit a Akuj tonupa a alakara.

¹⁷Nakaneni nyenupete kesi lokojokon kori nyenupete akiroit ngina nikooyen. Na ichanere kesi kori na eboliare kotere akiroit ngina, dio toisikis kesi atipei.

¹⁸Ikote ngitunga ngiche ngikinyam lu ealakin tooma lookwa. Eraakasi ngulu ngitunga lu iirarete akiroit,

¹⁹nakaneni ngichan a eboyor a akwap ka aminakinit ebari ta ngiboro luche daang lu iterekuyarito kesi, nyisirichakinete kesi akiroit ngina nakaneni tongopa ngakiro naajokak anakiroit kangina.

²⁰Ngikinyam lu ealakinosi nalup naajokak ikote ngitunga lu iirarete akiroit tonupa, ani erumor tokoniut ageor, ngiche ngatomwon-uni, ngiche ngatomwon-kapei, ngiche amiat apei.”

²¹Torubak Yesu isuruori kesi ebala, “Ekoe, eyei itwaan ni inokakini ataa tobuburik atubwa kori kiwaak kwap ekitanda a? Meere kongina, iwaakinio ni ikeuna.

²²Kainyo emam ibore ni idaitae ni nyetakanuni, kori emam ibore ni erapap ni nyileereuni.

²³ Ani keya ngaki nakiiraret kiira robo!”

²⁴Tolimok nabo tama, “Tochoikisi nguna ipupete! Ngitalio lupei iriraata esi luche kesi lupei kirira esi Akuj nabo kirirao esi niaronon noi.

²⁵ Itwaan ni eyei ibore, einakinio nikaalan, itwaan ni emam ibore, edemario tani nidiochichi ni etingit.”

²⁶Tolim Yesu tama, “Ikoni Apolou a Akuj itwaan ni itakini ngikinyam mana keng.

²⁷Ejotoe ngesi nakwaare ani esaa lo a apaaran tokienyu. Ngirwa ngulu daang, erupete ngikinyam keng topolout nakaneni nyeyeni ngesi erupe kech.

²⁸Iturupunete ngalup ngikinyam tokoniut ageor. Ekingaren isiauni kibutungia ani erumor kiala sodi tokon emwae.

²⁹ Na ekokioto ngimomwa, elemuni elope ekileng kitelio ngimomwa, kainyo anang ngirwa lu elemere.”

³⁰Kingit Yesu tama, “Nyo kisikwaanea Apolou a Akuj? Isikwaanio ka akitadapet ani?

³¹Ikoni nege. Elemuni itwaan echokit a ekoropus kitak mana keng. Edit echokit a ekoropus noi idwangit ngichok daang.

³²Nakaneni ani kerupu, topoloor noi kidwang ngikito luuchik daang. Epete ngaten nalangir toduko ngikieny ngakais naten na eya lotorube.”

³³Etatami Yesu ngitunga a ngakitadapet a ngache anakaalak ana ikote nguna, kiruor a eger kadaang alo apedorete kesi akiyen.

³⁴Esuruori ngesi kesi ngakiro daang a ngakitadapet. Nakaneni ani erukito ka ngirukitos keng make, esisaununi ngakiro daang ileerete.

³⁵Atabong a akolongit kangina, tolimok Yesu ngirukitos keng tama, “Kapana ewaaros atodokasi ekwakaye anam.”

³⁶Sodi toisikis kesi asepich a ngitunga kaneni. Tolomasi ngirukitos a Yesu natubwa na ebooyo ngesi kirukosi. Aya ngatubwae ngache dang neni.

³⁷Atipei tokut ekuwam loapolon ananam. Tokuut ngitoroi kilapakinos natubwa tonyout ngakipi akilelebun natubwa.

³⁸Ayei Yesu naabor a atubwa ajotoe icholongit aworu. Kitokienyut ngesi ngirukitos keng tamasi, “Eketataman, nyikikachit iyong sua kimunyar a?”

³⁹Tonyou ngesi kikilak ekuwam tama, “Kililing chek!” Sodi alimokin ngitoroi tama, “Topero!” Toper ekuwam tachakin wadaang chek.

⁴⁰Kingit Yesu ngirukitos keng tama, “Nyo kibulitor esi kona? Ikwa eringa esi nyenupa?”

⁴¹Tobul kesi noi kingitas make tamasi, “Ani itwaan ikoni nege en? Epupete ngesi tani ekuwam ka ngitoroi!”