Read turkana Mariko 5 Bible Online

Mariko 5 - turkana bible

Mariko 5

¹Tananga Yesu ka ngirukitos keng ekwakaye a anam a Galilaya nakwap a Ngigerasi.

²Napei atiyaunor Yesu anatubwa, kiriamun ka itwaan ni akoporito ngikerep ni abunit analielin,

³eboyeene ngesi analielin. Amam itwaan apedori akien ngesi a ngiriko,

⁴aeneeneo ngakejen ka ngakan keng ngirwa ngikaalak nakaneni angedengede ngesi ngiriko jiik ta ngasua na a ngakejen keng. Kipiyo ngesi ngitunga daang emam tani ipei abu kipiu ngesi.

⁵Erimit ngesi ngalielin ka ngimoru akwaar ka apaaran irema todungudungo bon a ngamoru.

⁶Na engolikinea ngesi Yesu eringa elona, kipiiri toriedik anakejen keng,

⁷sodi kirema ngesi lokojokon tama, “Eya iyong ngakiro ka ayong Yesu, Lokookeng a Akuj, Anaapolon noi a? Kotere ekitimoi a Akuj, kemaimai iyong atamar nyikiboliar kare cha ayong!” (

⁸Alimuni kongina kainyo abala Yesu, “Ekipe, tolom anitwaan kaen!”)

⁹Kingit Yesu ngesi tama, “Ngae ekiro kon?” Tatachak itwaan ngini tama, “Ekiro kang ngesi Ajore, kainyo kilalak sua!”

¹⁰Kimaima ngesi Yesu atamar nyiitwarak ngipean ngulu anakwap kangina.

¹¹Nakaneni ayei neni atwom nakaalan a ngiputiro na adaka akook a emoru.

¹²Kimaima ngipean Yesu tamasi, “Kimiekinae sua atoloto atolomasi loputiro.”

¹³Kimiek ngesi kesi toloto, topudosi kesi tolomasi loputiro. Kipiiri atwom daang, na asibit ngabunge ngaarei, tachakun anakope toloma tooma nanam, tanyam daang anam.

¹⁴Kipiirioto ngikeyokok a ngiputiro lore kisisata ngakiro nguna alore ka ngadakarin nguna. Toloto ngitunga aanyun ngakiro nguna asubakinosi,

¹⁵ani na aponeta nia Yesu, taanyungasi itwaan ni etwaranakinio ngipean ibooyi anakejen a Yesu, enapit ngiworui nabo tojokak ngitamen keng. Apot kesi daang toema.

¹⁶Apot lusek aanyungarete tolimokis ngitunga ngakiro naasubakinosi anitwaan ani akoporito ngikerep ka ngakiro a ngiputiro.

¹⁷Sodi tolimokis kesi Yesu atamar torotok anakwap kech.

¹⁸Ani eringa Yesu edoki atubwa, kimaima ngesi itwaan nisek akoporito ngikerep tama, “Kimiekinae erukosi ka iyong!”

¹⁹Nakaneni towou Yesu tolimok ngesi tama, “Tobongo iyong lotunga a awi kon kisisak kesi nguna kisubea iyong Ekapolon ka eger lo kingarakinea ngesi iyong niajokon.”

²⁰Tobongo itwaan ngini kitor kiding Ngirerea Lutomon daang isisae nguna asubea Yesu ngesi. Toiliilikis daang lu eirarete ngakiro nguna.

²¹Kiwaar Yesu ananam tobongo lokwaas loche a anam. Tochunun asepich a ngitunga nakaalan kaneni kiriam ngesi.

²²Todol Yairo lo erai ekapolon a akai a Atuk. Naengolikinea ngesi Yesu, tadakakin kwap toriedik anakejen keng

²³kimaima ngesi noi tama, “Edeak ikoku kang nipese ekot akitu, bua kare kidokok ngakan kon kidiama keng dio tojoker ngesi toyar!”

²⁴Tonyou Yesu kirukosi ka ngesi. Sodi kiwapak asepich a ngitunga Yesu kiriam ngesi a ngiwaitin kadaang.

²⁵Ayei neni aberu na ariaba noi ani aropiyoto ngaakot a ngikaru a ngitomon ka ngiarei,

²⁶echanito aberu ngina ngimurok lukaalak. Kisunya ngesi ngaropiyae keng daang alomurok, nakaneni esikonokin edeke keng jiik towou angalekin.

²⁷Eirarit sek ngesi ngakiro a Yesu sodi toropun alotunga, bu alokaku a Yesu tatap eworu keng.

²⁸Etami ngesi ebala, “Ani cha katap eworu keng, ajoker jik.”

²⁹Tatap ngesi echilet a eworu a Yesu sodi totubos ngaakot atipei. Toyen ngesi alotau keng atamar angaleki edeke keng.

³⁰Toyen Yesu atipei atamar kepudo agogongu epewae anikeng. Sodi torei ngesi anasepich a ngitunga kingis tama, “Ngae atapi eworu kang?”

³¹Tatachakis ngirukitos keng ngesi tamasi, “Itee cha iyong dang eger lokiriamitotor iyong ngitunga. Nyo tokona ingitar iyong atamar ngae kitapi iyong?”

³²Nakaneni tongolengolek Yesu esaki aanyungar itwaan ni atapi ngesi.

³³Toyen aberu ngakiro nguna asubakin anikeng. Bu ngesi eemit emarani tadakakin kwap toriedik alongaren Yesu kisisak ngesi ngakiro daang na eraakasi ngaka iteni.

³⁴Tolimok Yesu ngesi tama, “Nakoku, kiteyar iyong anupit kon. Kape nikaalimon tojoker ibore ni kiriebi iyong.”

³⁵Ani eringa Yesu iruoro nguna, pot ngimeanara ngiche anawi a Yairo. Tolimokis kesi Yairo tamasi, “Atoana nakookon. Nyo ichanea iyong Eketataman nabo?”

³⁶Nyekachikina Yesu ngakiro na eruorosi kesi. Sodi tolimok Yairo tama, “Nyiem tonup.”

³⁷Nyechamuna ngesi itwaan iche irukorete ka ngesi mati Petero ka Yakobo ta lokaato keng Yoana.

³⁸Tananga kesi nawi a Yairo ni engolikinea Yesu ngitunga echalasi, kigoros lokojokon esutonokinete.

³⁹Toloma ngesi tooma kingit kesi tama, “Ekainyo echale lo? Nyoni igorotor esi? Nyetoanit ikoku en, ejotoe ngesi!”

⁴⁰Tokianatar kesi daang ngesi. Kipudo ngesi kesi daang nikalapatan. Tolomasi ngesi ka Yairo ka itiokeng a ikoku ta ngulu arukito ka ngesi namaniyat na ayei ikoku.

⁴¹Toting Yesu akan a ikoku tama, “Talisa koum,” ngesi atamar, “Ikoku pese, kalimokinit atamar tonyou!”

⁴²Tonyou ikoku atipei torotok. (Arai ngesi ngikaru ngitomon ka ngiarei.) Apot nguna tatalasi ngitunga daang!

⁴³Nakaneni kichikichik Yesu kesi atamar nyeelimokis itwaan tani ipei ngakiro nguna. Tolimok ngesi kesi tama, “Nakisi ikoku akimuj tanyam.”