Read turkana Mariko 7 Bible Online

Mariko 7 - turkana bible

Mariko 7

¹Apot Ngiparisayo ka ngiketatamak a etal ngiche lu apote alo Yerusalem tochunun kiriama Yesu.

²Togipasi kesi atamar emujete epewae a ngirukitos keng akimuj eringa nyilotara ngakan loger lo esakitere alotal, ngesi atamar, peelotarito kesi ngakan loger lopalem ebalasi Ngiparisayo ngitunga ejoikinit ilotarete.

³Kainyo iwapito Ngiparisayo ka Ngiyaudi luche daang ngakitatamet nakolong eraakasi ngaka ta apakech. Nyimujete kesi eringa nyilotara ngakan kech niajokon.

⁴Kori nyimujete kesi ibore ni egielunitae eringa nyilotara mono. Nakaneni iwapito ngitalio lukaalak lu aanyut kesi. Ngitalio ngulu ngesi lu ikote akiyen erot loajokon lokilotaret ngikopoi ka ngamoti ka ngiboro lua ngasua.

⁵Sodi kingita Ngiparisayo ka Ngiketatamak a etal Yesu tamasi, “Nyo nyiwapitotor ngirukitos kon ngakitatamet nakolong araakasi ngaka ta apaayok? Nakaneni nyo imujeta kesi eringa nyilotara ngakan kech loger lo echamakinit etal?”

⁶Tatachak Yesu kesi tama, “Iteni dir ngakiro kus nakolong adwari Isaya! Iraakasi esi ngikamodeanak loger lo egiritor ngesi kona: ‘Ebala Akuj, kakerito ngitunga lu ayong a ngakituk, nakaneni eloka ngitai kech anikang.

⁷ Kelipito kesi ayong pas, kainyo itatamete kesi ngitalio a ngitunga kitusubut ngitalio a Akuj!’

⁸ “Ideparete esi akiwap etal a Akuj dio kiwapa ngakitatamet a ngitunga.”

⁹Sodi tolimok Yesu kesi tama, “Eyei esi erot eche lo a aosou lo ipedoreta asegarit Alotal a Akuj sodi kiwapeta ngakitatamet kus a ngikulepek.

¹⁰Kainyo kidungokinit esi Musa ebala, ‘Toker apakon ka itiokon,’ nakaneni, ‘Ngini iruoror apakeng ka itiokeng ngakiro naaronok, eario.’

¹¹Nakaneni itatamete esi atamar ani keyei itwaan ibore ni ingarakinea apakeng ka itiokeng, nakaneni tama, ‘Erai ibore ni enyaritae Koriban’ (eger keng atamar elemikinitae Akuj,)

¹²abe emam ngakiro erai pekingarak ngesi apakeng ka itiokeng.

¹³Aloger kangolo, ngakiro na itatamete esi luche itiliworete Akiroit a Akuj apasit. Nakaneni eya ngakiro nache nakaalak na ikote nguna na isubete esi.”

¹⁴Sodi tanyarau Yesu asepich a ngitunga nikeng nabo tolimok tama, “Topupokinae daang ayong toyeneta.

¹⁵Emam ibore nia anikalapatan ni elomari nakituk a itwaan ni epedori akitoron ngesi. Pearai ibore ni epuduni anakituk keng epedori akitoron ngesi.” [

¹⁶Ani keya ngaki nakiiraret, kiira robo!]

¹⁷Ani erotokini ngesi anasepich a ngitunga toloma kai, tamasi ngirukitos keng kisaki kitatamikin eger a ngakitadapet kanguna.

¹⁸Tolimok Yesu kesi tama, “Ikwa nyichwaaka esi dang nyidwangito luche a? Nyiyenete esi a? Emam ibore nia anikalapatan ni elomari nakituk a itwaan kitoron ngesi,

¹⁹kainyo nyelomari lotau keng pearai elomari nakook sodi topudo anakwaan.” (Alolimune keng kongina, asaki Yesu toyenae dir atamar epedorio akinyam ngamuja daang.)

²⁰Sodi tolim nabo tama, “Erai ibore ni epuduni alotooma etau a itwaan ngesi itoroni ngesi.

²¹Kainyo erai tooma lotau a itwaan ngesi eponitotor ngitamen luaronok lu epedorete akitusub ngesi ngakiro naaronok na ikote akoko, akiar,

²²elomit, etereku ta ngakiro nache naaronok na ikote nugu, engalas, aloloat, arorokanut, eswamit, ekinis ta ekiwaanu,

²³ngakiro naaronok nu daang eponito alotau a itwaan sodi kitorono ngesi.”

²⁴Sodi torotok Yesu kaneni toten nakwap na ayei diye ngirerea a Tiro ka Sidon.[3] Toloma ngesi kai nakaneni peasaki ngesi itwaan tani ipei toyen atamar eyei ngesi neni. Nakaneni peapedori ngesi akiduk kaneni.

²⁵Kiira aberu na akoporito ikoku keng ngikerep ngakiro a Yesu. Bu ngesi nikeng atipei tadakakin nakejen keng.

²⁶Pearai aberu ngina Ayaudit. Arai ngesi aka a akwap a Siria a ekitela alo enyaritae Poinike. Kimaima ngesi Yesu esaki kitwarak ngipean ani a nakookeng.

²⁷Nakaneni tatachak Yesu tama, “Kimiek mono esimuj ngide. Nyejoikinit akimuj a ngide echakakinio ngingokwo.”

²⁸Tatachu aberu ngina tama, “Ekaapaan, nakaneni enyamete tani ngingokwo lu eya kwap emeesa akimuj na epiyanunete ngide!”

²⁹Sodi tolimok Yesu ngesi tama, “Kotere akiroit na itachu iyong ngina, tobongo nawi. Apudosi ngipean anikoku kon!”

³⁰Tolot ngesi nawi torukau ikoku keng eperi alojemu. Kebu Ekipe dir topudo anikeng.

³¹Torotok Yesu anakwap ana ayei diye ere a Tiro kitor lore lo enyaritae Sidon ka akwap a Ngirerea a Lutomon tanang nanam a Galilaya.

³²Yaut ngitunga ngiche nikeng itwaan nikinim ni peapedori tani akiruorikin. Kimaimaa kesi Yesu tamasi kidokok itwaan ngini akan keng topia.

³³Nakaneni toriko Yesu ngesi bon tachada alotunga. Kirepak ngimoyo keng naki a itwaan kangini. Kimaak ani erumor tatap angajep a itwaan kangini.

³⁴Kingolia Yesu kidiama nadis sodi kirema noi tolimok itwaan ngini tama, “Epipasa,” eger keng atamar, “Tangaar!”

³⁵Tangaar ngaki, talaki angajep, sodi kiruorik niajokon.

³⁶Sodi kichikichik Yesu ngitunga atamar nyeelimokis itwaan iche ngakiro nguna, nakaneni ani edungokini ngesi kesi atamar nyeelimosi ngakiro nguna, tolomakis kesi ekiruor lokojokon noi.

³⁷Sodi tatalasi daang lu eirarete ngakiro nguna tamasi, “Kingolikisi eger lo esubea ngesi ibore daang niajokon!” Topodokis kesi ebaasi, “Epedori ngesi akisiirar lukinim ngakiro ka akisuruorikin lu nyiruorosi sek!”