Read turkana Mariko 8 Bible Online

Mariko 8 - turkana bible

Mariko 8

¹Ngirwa ngulu, tochunakin asepich a ngitunga ache nakaalan wapei. Ani engopokini ngitunga ibore ni enyamete, tanyarau Yesu ngirukitos keng ni ayei ngesi tolimok tama,

²“Kesienito ayong ngitunga lu kainyo kiruk ayong ka kesi ngirwa nguuni, nakaneni emam tokona kesi akimuj enyamete.

³Ani kemiek ayong kesi toloto nawiyei eringa nyimuja, irakanarosi alorot kainyo eponito ngiche anikalonan noi.”

⁴Kingita ngirukitos keng ngesi tamasi, “Nyai nikilemunea ngoni akimuj anariet kana na itemokin asepich naga daang?”

⁵Kingit Yesu tama, “Ngai ngamugati itingito esi?” Tatachakis tamasi, “Eraakasi ngamugati ngakan-kaarei.”

⁶Tolimok Yesu asepich a ngitunga atamar kiboikinos kwap. Sodi tolem ngamugati nakan-kaarei tobuak Akuj alakara. Ani erumor tonyilinyili nak ngirukitos keng dio atamar tokorakis ngitunga. Tosuba ngirukitos keng loger ngolo.

⁷Atingito kesi ngikolia luuchik ngidikidio. Kilip Yesu kotere ngulu dang dio alimokin ngirukitos keng atamar tokorakis ngitunga.

⁸Kimuja ngitunga daang kimwoko, araakasi ngitunga ngulu daang ngabunge ngoomwon. Sodi tolemut ngirukitos a Yesu ngategerin ngakan-kaarei na eleleba akimuj na apiyanun. Tolimok Yesu ngitunga atamar toloto

¹⁰ani erumor todokasi ka ngirukitos keng natubwa atipei totena nakwap a Dalimanusa.

¹¹Pot Ngiparisayo ngiche nia Yesu tolomakis apega ka ngesi. Kona asaketa akining ngesi, apot tolimokis atamar, tosubak ngakiro nakailiilok na idodiunito atamar ebunit ngesi ani a Akuj.

¹² Nakaneni topodok Yesu noi tama, “Nyo esaketa ngitunga a ngirwa kalu aanyungar ngakitoodikinet nakailiilok? Kalimokinit ngakiro na iteni atamar emam ngakitoodikinet ngache nakailiilok na idodikinio kesi!”

¹³Kimiek ngesi kesi, torotok todoka natubwa kiwaar ekwakaye anam.

¹⁴Kimuriakinito ngirukitos a Yesu akiting ngamugati na itemokino. Atingito kesi amugati apei bon anatubwa.

¹⁵ Kichikichik Yesu kesi tama, “Tochoikinos anakiro anaaronok a Ngiparisayo ka Erode ana ikote ekitoe lo itubui ngamugati.”

¹⁶Tolomakis kesi ekiruor make ebalasi: “Elimunit ngesi nugu kainyo emam ngamugati kitingit ngoni.”

¹⁷Ayeni Yesu ngakiro na eruorosi kesi sodi kingit kesi tama, “Nyo iruorotor esi make ibaatar emam ngamugati itingito? Eringa esi nyeyena kitamut a? Ikwa nyichwaaka esi a?

¹⁸Eya esi ngakonyen nyiteete esi a? Eya esi ngaki nyipupete esi a? Nyitamunito esi

¹⁹ nakolong anyilinyilea ayong ngamugati ngakan kotere ngitunga ngabunge ngakan a? Ngai kolong ngategerin ilemunete esi na eleleba akimuj na apiyanun?” Tatachut tamasi, “Ngatomon ka ngaarei.”

²⁰Kingit Yesu tama, “Ani bo nakolong anyilinyilea ayong ngamugati ngakan-kaarei kotere ngitunga ngabunge ngoomwon. Ngai kolong ngategerin elelebun ngamugati na achakanarosi kidepunae?” Tatachut kesi tamasi, “Ngakan-kaarei.”

²¹Kingit Yesu kesi tama, “Eringa esi nyeyena a?”

²²Tanangut kesi Betisaida. Yaut ngitunga ngiche emuduk nia Yesu kimaima ngesi tamasi tatap.

²³Toriko Yesu emuduk ngolo akan kipudo anadakar. Kimaak ngesi ekile ngolo nakonyen dio kidokok ngesi akan kingit tama, “Eyei ibore idio itee iyong a?”

²⁴Tokienyia ekile ngolo kidiama tolim tama, “Etee ayong ngitunga nakaneni ikwaan kesi ka ngikito eloose.”

²⁵Tatap Yesu nabo ngakonyen a ekile kangolo. Esaa ngolo topochu ekile ngolo ngakonyen. Tojoketa ngakonyen keng kingolik ibore daang lokojokon.

²⁶Sodi tolimok Yesu ngesi atamar tolot edungokinit ebala, “Nyiibongo nadakar.”

²⁷Sodi torotokis Yesu ka ngirukitos keng toloto nadakarin na ayakasi diyete Kaisaria Pilipi. Kingit ngesi kesi alorot tama, “Ebaasi mono ngitunga ayong ngesi ngae?”

²⁸ Tatachakis tamasi, “Ebaasi ngiche irai iyong Yoana Ekebatisan. Tabaas ngiche irai iyong Elija. Tabaas nabo ngiche irai iyong epei a ngikadwarak a Akuj.”

²⁹Kingit kesi tama, “Ani bo esi. Ibaasi esi ayong ngesi ngae?” Tatachak Petero tama, “Irai iyong Kiristo.”

³⁰Tolimok Yesu kesi tama, “Nyiilimokis itwaan tani ipei atamar ayong ngesi ngae.”

³¹Tolomak Yesu akitatam ngirukitos keng tama: “Eboliare Lokookeng a Itwaan lokojokon noi. Engerete ngesi Ngikasukou a Atuk ka Ngimurok Luapolok a akai a Akuj ta ngiketatamak a etal. Eario ngesi, ani akolongit na a ngauni eyaruni.”

³²Tolimok ngesi kesi ngakiro nguna ileerete toyena. Nakaneni tachada Petero ngesi kikilak.

³³ Nakaneni torei Yesu kingolik ngirukitos keng sodi kikilak Petero tama, “Esiitan, koto kane. Meere nia Akuj eponitotor ngitamen lukon lugu, eponito alotunga!”

³⁴Sodi tanyarau Yesu asepich a ngitunga ka ngirukitos keng neni tama, “Itwaan daang ni esaki akiwapakin ayong, ejoikinit ejalun bon sodi kiwok apir keng sodi kewapak ayong.

³⁵Kainyo itwaan cha daang ni esaki akirichun akiyar keng, ebukor, nakaneni ni ejali akiyar keng kotere ayong ka ngakiro naajokak a Akuj, eyari.

³⁶Nyoni eanyuni itwaan erai kitiliwo ngesi ibore daang a akwap ikeng, nakaneni tobukor anakiyar? Emam ibore eanyuni ngesi!

³⁷Emam ibore ni ipotori ngesi kilokonyuunio akiyar keng.

³⁸Itwaan ni irumito ngileech kotere ayong ka akiroit kang alorwa aluaronok engeritotor ngitunga Akuj kalu, irumete tani Lokookeng a Itwaan ngileech kotere ngesi ngirwa lu ebunio a Apolou anaketimon ka Apakeng erukito ka ngimalaikae lu italeunitoe.”