Read turkana Mariko 9 Bible Online

Mariko 9 - turkana bible

Mariko 9

¹Sodi torubak Yesu iruoro ebala, “Kalimokinit esi atamar eya ngiche nege lu nyetoakete jik eringa nyeanyungara Apolou a Akuj ebuni a agogongu.”

²Adaunet a ngirwa a ngikan-kapei, toriko Yesu Petero ka Yakobo ta Yoana todokasi kesi make kidiama emoru lokooyen. Kibelei Yesu iteete kesi,

³sodi tokwangeta ngiworui keng kea, emam itwaan anakwap ni epedori akilotar ngiworui keng tokwangeta kongina.

⁴Sodi kingolikis ngirukitos luuni ngulu Elija ka Musa iruorosi ka Yesu.

⁵Tolimok Petero Yesu tama, “Eketataman, ejok noi ani kiyakar ngoni nege! Kidukokini sua ngakais ngauni nege, apei akon, apei aka Musa, apei aka Elija.”

⁶ Kona abulitor Petero ka ngirukitos luche noi, tongopikis ngesi ngakiro elimuni.

⁷Sodi totiyaun edou tarap kesi a etorube keng, kiirasi kesi etoil alodou kangolo ebala, “Lokookang lominat ngesi lo, topupokisi ngesi!”

⁸Nipei bore ngini tongolengolekis kesi, nakaneni nyingolikina itwaan iche pearai Yesu bon lo arukito ka kesi.

⁹Ani etiyaate kesi alomoru todungok Yesu tama, “Nyiilimokis itwaan tani ipei nguna ingolikis esi tanang akolongit na eyarunea Lokookeng a Itwaan.”

¹⁰Kiwapa kesi ngakiro na adungokini ngesi, nakaneni tolomakis akingitanar make ebalasi, “Nyo, mono erai ‘ayarun’?”

¹¹ Sodi kingita kesi Yesu tamasi, “Nyo ebalatar ngiketatamak a etal ejoikinit Elija ebuni ekingaren?”

¹²Tatachu ngesi na abala, “Iteni ebuni Elija ekingaren sodi tosubak ngakiro daang kitiriyan. Ani nyo bo elimunitere anagiran atamar eboliare Lokookeng a Itwaan noi sodi tongeroi?

¹³Nakaneni kalimokinit esi atamar abu kolong Elija sodi tosubeta ngitunga ngesi ngakiro daang na asakete asubea loger lo elimunitere ngakiro keng anagiran.”

¹⁴Na abongoreta nia ngirukitos aluche, kingolikis asepich a ngitunga iriamit kesi toya ngiketatamak a etal ngiche lu apegasi ka kesi.

¹⁵Na engolikineta ngitunga Yesu, apot toriangakinos noi, sodi tamataros ni ayei ngesi kimalata.

¹⁶Kingit Yesu ngirukitos keng tama, “Nyo ipegasi esi ka kesi?”

¹⁷Tatachu itwaan ipei anasepich a ngitunga tama, “Eketataman, ayaunit ayong lokookang nikon kainyo etingit ngesi Ekipe lopenyisuruori.

¹⁸Na ekopunio ngesi Ekipe tadakakin nalup, nabo tokuut ngikurudoi anakituk, tokirich ngikel, nabo tokuta akwaan daang. Alimokinit tani ngirukitos kon atamar kitwarakisi Ekipe, nakaneni tokuruwo kesi akitwarakin.”

¹⁹Tolimok Yesu kesi tama, “Iraakasi esi ngitunga lu nyinupito Akuj! Ejoikinit ayong kiruki ka esi tanang ori? Anaikini ayong ngakiro kus tanang ori? Yautu idia nege!”

²⁰Yaut kesi idia nia Yesu. Ani napei engolikinea Ekipe Yesu, abu tadakak idia nalup kirakar, kibelobelokin elakakinit ngikurudoi anakituk.

²¹Kingit Yesu apakeng a idia tama, “Ngirwa ngiai ekonea edia logo nege?” Tatachak tama, “Napei kolong a ekiditeu keng.

²²Ngirwa ngikaalak echakanakini Ekipe ngolo ngesi nakim ka nakipi esaki akiar. Kisienoi kare sua kingarakinae, erai kipedori!”

²³Tolim Yesu tama, “Aawa, erai kipedori! Epedorosi ngakiro daang anitwaan ani enupit.”

²⁴Atipei kirema apakeng a edia tama, “Anupit cha nakaneni kitunupae noi!”

²⁵Na engolikinea Yesu atamar achunun asepich a ngitunga daang nikech, abu todungok Ekipe ngolo tama, “Iyong Ekipe lokinim lo nyiruoro, kadungokinit iyong atamar tolom alodia kalo, wara nyiiloma nabo nikeng jik!”

²⁶Kibap Ekipe edia ngolo tadakakin kwap kirakar sodi kirema, topudo. Kikok edia ngolo ekatoan, sodi tamasi ngitunga daang, “Atoana ngesi!”

²⁷Nakaneni toting Yesu akan keng sodi kitonyou towo.

²⁸Na alomarea Yesu tooma, kingita ngesi ngirukitos keng anikeng bon tamasi, “Nyo pekitwarakinea sua Ekipe?”

²⁹Tatachak Yesu kesi tama, “Akilip bon itwarakini Ekipe lo ikoni lo, emam nabo ibore iche itwarakini.”

³⁰Torotokis Yesu ka ngirukitos keng kaneni kitoro Galilaya, peasaki Yesu ngitunga toyena atamar ayei ngesi neni.

³¹Ekonea neni, etatami ngesi ngirukitos keng ebala, “Erikokinio Lokookeng a Itwaan ngitunga lu earete nakaneni akolongit na a ngauni eyaruni.”

³²Nyeyenuna kesi ngakitatamet nguna, nakaneni toema kesi akingit ngesi.

³³ Tanangut kesi Kaperinaum, ani elomarete tooma kai, kingit Yesu ngirukitos keng tama, “Anukiro takae ipegasi esi alorot?”

³⁴Kililinga kesi chek kainyo apegasi sek kesi alorot asakete akiyen itwaan ni epolot noi.

³⁵Kiboikin Yesu tanyarau ngirukitos lutomon ka ngiarei tolimok tama, “Itwaan cha daang ni esaki akingaren, ejoikinit isidiyor toliwor ekasuban etich aluche kadaang.”

³⁶Toriku ikoku niichi kitowo alongaren kech, kilogak ikoku ngakan tolimok kesi tama,

³⁷ “Itwaan cha daang ni itepeyoni ipei a ngide a luuchik kalu a ekiro kang, ketepeyon ayong, ani ngini ketepeyoni ayong, etepeyon tani lokolong kameuni ayong.”

³⁸Tolimok Yoana ngesi tama, “Eketataman, kingolikini sua itwaan itwarakini ngipean a agogongu a ekiro kon etengero sua kainyo meere ngesi iyok.”

³⁹Tolimok Yesu kesi tama, “Nyiitengero kainyo emam itwaan esubi ngakitoodikinet nakailiilok a agogongu a ekiro kang ani nabo ekisidi keruoror ayong naaronok.

⁴⁰Kainyo itwaan cha daang ni nyikitepegi ngoni erai iyok.

⁴¹ Kalimokinit ngakiro na iteni atamar, itwaan cha daang ni kitamasi esi ngakipi ani iraakatar ngikang, eriamuni ngesi ebachit keng.

⁴²“Itwaan daang ni itosechi ipei a luuchik kanupito ayong kalu, ejoikinit eenikinio akiries lomosiring tachakakinae nanam.

⁴³Nakaneni ani kitosech iyong akan kon totubo! Ejoikinit ilomari nakiyar ingwalit akan idwangit achakakino nanam na akim ana nyedunge eyakasi ngakan daang. [

⁴⁴Ngikuru lu enyamete kesi kaneni nyetoakete, nabo akim na enomi kesi kaneni, nyedunge.]

⁴⁵Ani kitosech iyong akeju kon, totubo! Ejoikinit ilomari nakiyar ingwalit akeju idwangit achakakino nanam a akim eyakasi ngakejen daang. [

⁴⁶Ngikuru lu enyamete kesi kaneni, nyetoakete, nabo akim na enomi kesi kaneni, nyedunge.]

⁴⁷Ani kitosech iyong akongu kon, touto! Ejoikinit ilomari napolou a Akuj idoony, idwangit achakakino nanam na a akim eyakasi ngakonyen daang.

⁴⁸ Ngikuru lu enyamete kesi kaneni, nyetoakete, nabo akim na enomi kesi kaneni, nyedunge.

⁴⁹ “Itojokio itwaan daang a akim loger lo itojokere ngakipeyos a amakat.”

⁵⁰“Ejok amakat, nakaneni ani kepener amakat, emam kona itababaruunio nabo.” “Min amakat nikus, sodi kiruko esi isilito.”