Read turkana Luka 1 Bible Online

Luka 1 - turkana bible

Luka 1

¹Ayong Luka ngesi kegirakinit iyong Teopilo abarua naga: Apot ngikegirak lukaalak kigira lokojokon ngakiro na asubasi aniyok.

²Egirete kesi nakilimokinete ngoni ngikaanyunak ngulu aanyunete ngakiro nu anakisiakinet, nabo kitatamete akiroit a Akuj.

³Tokona bocha ekile lo kirimae lo, kona esemo ayong ngakiro nugu daang anakisiakinet, engolik atamar ejoikinit kegirak iyong ngakiro nu iwapap.

⁴Sodi toyenea iyong ngakiro na iteni ka nguna kadaang kolong kitatamio iyong.

⁵Kolong ngirwa lu araakar Erode ekapolon a akwap a Yudea, ayei emuron a akai a Akuj lo anyaritae Sekaria. Arai ngesi eka a atukuoru a ngimurok alu anyaritae Abia. Anyaritae aberu keng Elisabet, arai ayenet a Aron alo arai emuron.

⁶Ebooyete kesi daang eboyor lo atenoono alongaren Akuj, nabo ewapito jik ngitalio ka ngakichiket daang a Ekapolon. Amam ibore asechito.

⁷ Amam kesi ngide kainyo akolupana Elisabet, nabo amojongito kesi daang kwasiarei.

⁸Akolongit apei asubi Sekaria etich keng alongaren Akuj, kainyo araakasi ngirwa esubea atukuoru keng etich ngulu.

⁹Taramae ekura toseunae Sekaria loger losek iwapito ngimurok, toloma kai a Akuj kinom emitina alokeno alo ipeyonokinere Akuj,

¹⁰nakaneni elipit asepich a ngitunga anikalapatan esaa lo enomere emitina.

¹¹Bu emalaikat a Ekapolon ni ayei ngesi alotooma kaneni, towo alowae alo aloteten a ekeno alo enomanakinere Akuj emitina.

¹²Na engolikinea Sekaria ngesi, abu tobul, tamaranik.

¹³Nakaneni tolimok emalaikat ngesi tama, “Nyiem Sekaria! Eira Akuj akilip kon, aberu kon Elisabet idouni ikoku nisapat. Ilimokini iyong ngesi ekiro be Yoana.

¹⁴Ilakar iyong noi na idounere ngesi, nabo elakarosi ngitunga lukaalak noi na idounere ngesi!

¹⁵Kainyo eliwor ngesi itwaan niapolon ani a Ekapolon Yesu. Nyejoikinit ngesi emasi emuna lo epuritoe kori epurot. Ilelebun Etau a Akuj nikeng eringa tani eyei nakook a itiokeng,

¹⁶nabo ebuuni ngesi Ngisirael lukaalak nia Ekapolon alo erai Akuj kech.

¹⁷ Ingarenikini ngesi Ekapolon Yesu, etitiny nabo togogong loger a ekadwaran a Akuj Elija. Imorikini ngesi taapa ka ngide kech tachamunos, nabo ereeuni ngesi ngitunga lu engerito Akuj toosokioto anateneanut, nabo kiten ngitunga a Ekapolon Yesu anikeng.”

¹⁸ Tolimok Sekaria emalaikat tama, “Ekokini ayong abili akiyen atamar eraakasi ngakiro nu ngaka iteni ai? Arai ayong ekasukout nabo emojongit aberu kang dang.”

¹⁹Tolimok emalaikat ngesi tama, “Ayong Gaburiel, lo awei alongaren Akuj na kameuni ayong katolimok iyong akiroit naajokon naga.

²⁰Nakaneni abe nyinupit tokona iyong akiroit kang, na iyookin apei kwaar. Kingolik a! Kona tokona nyinupitor, nyiruorikini iyong, ichakin chek, tanang akolongit na iyookinor akichikakinet kang anikon.”

²¹Nakaneni tamasi ngitunga lu aringa idarito Sekaria, “Ekoe, nyo atinenikinio itwaan en nikooyen alotooma akai a Akuj!”

²²Topud ngesi nikalapatan ililingi echakina chek, sodi toyena kesi atamar keanyunga ngesi ngakisingolikinet alokai a Akuj. Ani echakina ngesi chek kongina, kisuruor kesi a ngakan.

²³Ani edaun ngirwa lu esubea ngesi etich alokai a Akuj, tobongo Sekaria nawi.

²⁴Ani ekisidi, topoti Elisabet aberu keng, nyerotokino anawi keng ngilapio ngikan.

²⁵Tolim ngesi tama, “Kengarak ayong Akuj alema ngileech kang alotunga!”

²⁶Nakaneni na anangea elap lo a ngikan-kapei epoti Elisabet, tomea Akuj emalaikat lo anyaritae Gaburiel tolot nakwap a Galilaya, lore lo anyaritae Nasaret.

²⁷Ayei akiroit na asaki ngesi alimokin apese na nyepero ka ekile a ache na anerit ekile lo anyaritae Yosep. Arai Yosep eyenet a Ekapolon Daudi. Arai ekiro a apese kangina Mariam.

²⁸ Toloma emalaikat tooma kai, kimala tama, “Ejok Mariam a! Irukito iyong ka Ekapolon nabo kipia ngesi iyong!”

²⁹Tosur etau a Mariam noi kotere emalas ngolo. Tolomak akitam ebala, “Ekoe, emalas erai nyo lo?”

³⁰Tolimok emalaikat ngesi tama, “Nyiem Mariam, kainyo kisichanyu iyong Akuj ajokis keng.

³¹Kingolik a, ipoti iyong kidou ikoku nisapat, ilimokini iyong ngesi ekiro be Yesu.

³²Eyenikinio ngesi sodi tanyarae Lokookeng a Akuj a Naapolon noi. Itiliwori Akuj ngesi Ekapolon loger ka apaakeng Daudi.

³³ Eliwor ngesi Ekapolon a ngalesea kadaang a Yakobo jik, nabo apolou keng nyesaluni!”

³⁴Tolimok Mariam emalaikat tama, “Arai ayong apese na nyepero ka ekile a ache, ikokinete ngakiro nu esubakin ai?”

³⁵Tatachak emalaikat tama, “Etiyaun Etau a Akuj nikon, nabo kimuki iyong agogongu a Akuj a Naapolon Noi loger a Etorube, kotere nguna, eliwor lo idounio lo italeuno, Lokookeng a Akuj.

³⁶Nakaneni toyen atamar ayenet kon Elisabet, tani kemojongit dang, epoti ngesi ikoku nisapat, nakaneni erai elap lo a ngikan-kapei a apoti keng lo, nangoon anyaritae akolup.

³⁷ Kainyo emam ibore ni ekuruwori Akuj asubakin.”

³⁸Tolim Mariam tama, “Arai ayong akasuban etich a Ekapolon, kimiek kikokis anikang loger lotete ilimuni iyong.” Ani erumor, torotok emalaikat.

³⁹Nakaneni ngirwa lupei ngulu, torotok Mariam atipei toten akwap ache na ayakasi ngaukon, tanang lore a akwap a Yudea.

⁴⁰Toloma ngesi kai a Sekaria, kimala Elisabet.

⁴¹Ani iirari Elisabet emalas a Mariam, abu ikoku ni apoti ngesi kikolianar anakook keng kilelebun Elisabet Etau a Akuj sodi

⁴²kirema ngesi lokojokon tama, “Iyong bon kipiarit Akuj anaberu kadaang! Epiarit Akuj tani ikoku ni idouni iyong!

⁴³Ekoe nyo esubatar ngakiro naapolok nu anikang, ebunitor tani itiokeng a Ekapolon kang nikang?

⁴⁴Kainyo na eirarea ayong emalas kon abu ikoku ni apoti ayong kikolianar a alakara.

⁴⁵Ilakara iyong lokojokon noi, kainyo inupit iyong atamar iyookin akiroit a Ekapolon anikon!”

⁴⁶ Tolim Mariam tama: “Epuruunit ayong Ekapolon lokojokon,

⁴⁷alakara ayong noi kotere Akuj na erai Akayuunan kang,

⁴⁸ kainyo ketam ngesi ayong akasuban etich keng na apalaana! Napei tokona jik, kanyaraate ngitunga daang ayong ngina kapiaritae.

⁴⁹Kainyo Akuj Naapolon Noi, kasubea ayong ngakiro naapolok. Italeuno ekiro keng.

⁵⁰Isienito ngesi ngulu daang ekerito ngesi, analesea kadaang.

⁵¹Itorwaari ngesi akan keng, tosub ngitichisio luapolok, epetari ngesi lu inisasi anakiro kadaang a na ereto kesi.

⁵² Ekota ngesi ngikapolok lu apolok noi anapolosio kech, etiliwo ngesi lu itiditeuna ngikapolok.

⁵³Elelebik ngesi lu enyamit akoro ngiboro luajokak, nakaneni erita lu ebarito, arotokis a ngakan a nikirion.

⁵⁴Erichak ngesi akichikakinet nakolong echikakini taapayok, nabo engarak ngesi Ngisirael, ngitunga a ekitela keng.

⁵⁵ Etamu ngesi atamar kesienit Aburaam nabo isienito ngesi tani ngalesea daang ka Aburaam jik!”

⁵⁶Kiboi Mariam anawi a Elisabet ngilapio nguuni, ani erumor, tobongo nawi keng.

⁵⁷Abu kitemokin ngirwa lu idounio Elisabet ikoku keng, kidou ngesi ikoku nisapat.

⁵⁸ Ani iirarete ngikidunyet keng ka ngiyenet keng eger lo engarakinea Ekapolon Akuj ngesi, apot talakaros daang ka ngesi aapei.

⁵⁹Na anangea akolongit na a ngakan-kauni, tasaka ngitunga akilenger idia. Asakete alimokin ngesi ekiro ka apakeng Sekaria.

⁶⁰Nakaneni towou itiokeng tolim tama, “Mam! Enyarao ekiro keng Yoana.”

⁶¹Apot ngitunga tachalakis tamasi, “Abe emam bo itwaan ni iyanasi ka esi enyaritae a ekiro kangolo!”

⁶²Sodi toketut apakeng kingita ekiro lo achamit ngesi tolimokinae idia.

⁶³Kidodiu atamar yaunae ibore ni igirakini, sodi kigirak ngesi kona: “Enyaritae ekiro keng Yoana.” Tatalasi ngitunga daang ngakiro nguna.

⁶⁴Esaa lopei ngolo, kiruorik Sekaria ipuruunit Akuj.

⁶⁵Apot ngitunga daang lu alomito diyete neni toema noi, sodi tokeikin akiroit ngina naukon daang a Yudea.

⁶⁶Ngulu daang eirarete akiroit ngina apot kitama alotai kech tamasi, “Ekoe, ikokini monan idia en ai?” Kainyo etakani dir atamar eyei apolou a Ekapolon nikeng.

⁶⁷Kilelebun Etau a Akuj nia Sekaria, apakeng a Yoana, tolim akiroit a Akuj tama:

⁶⁸“Potu epuruutu Ekapolon, Akuj a Isirael! Lo abuni akingarakin ngitunga keng talachak kesi.

⁶⁹Kiinak ngoni Ekayuunan Lokaagongon, lo ebuni anales a ekasuban etich keng Daudi.

⁷⁰Nugu kesi nakolong alimuni ngesi kisitoru lokadwarak keng lu ebekooko.

⁷¹Kichikakinit ngesi ngoni atamar kiyuuni alomoe yok, ka agogongu ka ngulu kiremokino ngoni.

⁷²Ebala ngesi kesieniyete taapayok, sodi etam achamunet keng na italeunitoe nakolong ekongio.

⁷³Abu Akuj kikong ani ka apaayok Aburaam atamar,

⁷⁴kiyuuni ngesi ngoni alomoe yok, sodi elipeta ngoni ngesi pekibulit.

⁷⁵Sodi atoliworotor ngoni lukitaleuno, lu kitenooko anikeng, ngirwa daang lu kiyarea ngoni.

⁷⁶ Iyong ikakoku, kinyarao ekadwaran a Akuj ana Epolot Noi, ingarenikini iyong Ekapolon Yesu, kitenik erot keng,

⁷⁷tolimok ngitunga keng atamar eyuunio kesi ani erimakinere ngasechesea kech.

⁷⁸Kainyo elilim Akuj yok kisieni ngoni. Kiyuuni ngesi ngoni a eger alo ikoni akwangis a achaunet a akolong.

⁷⁹ Tokwanger kinwaku lu ibooyete anaribu, nabo lu erapit aribu a akitu. Kiyok elote yok, atarata lukisilit.”

⁸⁰Abu idia ngini topolou, nabo toosor noi. Kiboi anariet tanang akolongit na edodikinor ngesi Ngisirael.