Read turkana Luka 10 Bible Online

Luka 10 - turkana bible

Luka 10

¹Ani ekisidi toseu Ekapolon ngitunga ngitomwon-kaarei ka ngiarei tomea a ngiarei-rei kingarenikis toloto lorerea daang ka akwap na asaki ngesi elope alosit.

²Tolimok ngesi kesi tama, “Elalak ngalemet nakaneni ekidioko lu esubete etich. Kilipa robo elope a ngalemet tomea ngikalemak lukaalak lu echunakinete ngalemet keng.

³Kapesi! Toyena atamar kamearit ayong esi nakwap loger a ngimesekin alu eya kiding ngipeei.

⁴Nyiitinga etokole a ngaropiyae, kori echue lo ilipanarotor, kori ngamuk, warasi nyiiwa alorot kiruoro ka itwaan.

⁵Akai daang na ilomarete, tamasi mono ekingaren, ‘Min ekisil nawi naga.’

⁶Ani keyei itwaan ni emina ekisil anawi kangina, emini ekisil ngolo nikeng, ani kemam, nyemini ekisil ngolo neni.

⁷Kiboikinos kai ngina tamata ka akimuj ibore daang nikiinakinio, kainyo ngini esubi etich, echamit etachio. Nyiirimo akwap itubonorosi anakais a ngitunga.

⁸Adakar daang na ilomarete esi kitepeyonere, tanyama akimuj daang na kiinakinio esi.

⁹Kitojoka lu edeakasi alore kangolo, tolimokisi ngitunga lu kaneni tamasi, ‘Aapuu Apolou a Akuj nikus.’

¹⁰Ere daang lo inangete esi nyikitepeyon, torotokisi ani inangete lorotin tamasi,

¹¹‘Tani apua a ere kus na etapunito ngakejen kosi, kitwaari sua kotere ni isechitotor esi. Nakaneni toyena atamar aapuu Apolou a Akuj nikus!’

¹² Kalimokinit ayong esi dir atamar isieniyete Akuj ngitunga a Sodom Akolongit na a Eriras kidwang lu a ere kangolo!

¹³“Oitiakoi! Abe etioko nginyas lu eanyunete ngitunga a Korasin ka Betisaida dang! Kainyo arai kolong tosubae ngakitoodikinet nakailiilok na asubasi anikus alo Tiro ka Sidon, kenapito kesi ngiworui lukoris sodi tojuko ekuron kidodiunotor atamar alunga kesi ngasechesea kech!

¹⁴Isieniyete Akuj ngitunga a Tiro ka Sidon Akolongit na Eriras kidwang esi.

¹⁵ Esi ngitunga a Kaperinaum! Isakete esi tanang ekipur kus kidiama nadis a? Kichakakinio esi tooma nanam na a akim!”

¹⁶Tolimok ngimeanara keng tama, “Itwaan cha daang ni epupi ngakiro kus, epupi tani nakang, itwaan cha daang ni kingeri esi, kanger tani ayong, ani ngini kangeri ayong, anger tani lokolong kameuni ayong.”

¹⁷Tobongut ngitunga lutomwon-kaarei ka ngiarei elakara noi. Tamasi, “Ekapolon, apot tani ngipean topupokis ngakiro kosi nakilimokinea sua kesi ngakiro a ekiro kon!”

¹⁸Tolimok Yesu kesi tama, “Engolikini ayong Esiitan ibirun anadis loger a akimilea.

¹⁹Topupokisi! Kainak ayong esi agogongu topedoreta esi akipudare ngimunio ka ngikuutanea sodi kipiyosi agogongu daang na a Emoit, nabo emam ibore kiwani esi.

²⁰ Nakaneni warasi nyiilakarosi ani kipupeto esi ngipean, echamit ilakarosi ani igiritere ngirora kus nadis.”

²¹Esaa lopei ngolo tolom Etau a Akuj nia Yesu kitalaka lokojokon, tolim tama, “Apa, Ekapolon a adis ka kwap! Kabuakinit iyong alakara kainyo ipudok iyong lu nyeosok ngakiro na idaitae ani eyakasi lukebe a ngakies ka lukoosok. Kongina Apa, isub iyong nguna daang loger lo ichamit iyong alope.”

²² Tolim Yesu tama, “Kainaki ayong Apakang ngiboro daang: emam itwaan ni eyeni Lokookeng atamar ngesi ngae, mati Apa, nabo emam itwaan ni eyeni atamar Apa ngesi ngae, mati Lokookeng ka ngulu daang esaki Lokookeng akidodikin Apa keng.”

²³Torei lowae lo ayakasi ngirukitos keng kisuruorik anikech make tama, “Kipiaritae esi noi ani ingolikineta na ingolikis!

²⁴Kainyo asakete kolong ngikadwarak a Akuj ka ngikapolok lukaalak akingolikin na ingolikis esi, nakaneni nyingolikina, nabo asakete akiirar na ipupete esi, nakaneni nyiirara.”

²⁵ Sodi bu eketataman a etal eche nia Yesu esaki akilok ngesi a ngakiro. Kingit tama, “Eketataman, ekokini ayong ariamuni akiyar na nyedaun ai?”

²⁶Kingit Yesu ngesi tama, “Nyo igiritae nagiran? Anukiro isoma iyong anagiran?”

²⁷ Tatachak ekile ngolo tama, “Echamit iyong iminakini Akuj Ekapolon kon a etau kon kadaang, ka akiyar kon daang, ka ngikilinga kon daang ta ngitamen kon daang, ‘Nabo echamit iyong iminakini ekidunyet kon loger lo iminar iyong akwaan kon a ilope.’ ”

²⁸Tatachak Yesu ngesi tama, “Ilim iyong nguna iyook, tosub nguna sodi toyar.”

²⁹Nakaneni asaki eketataman a etal ngolo akidodiun atamar arai ngesi itwaan ni nyasechit, sodi kingit Yesu tama, “Ngae erai ekidunyet kang?”

³⁰Tolimok Yesu ngesi tama, “Ayei itwaan iche anyouni alo Yerusalem eteni Yeriko, kituumokis ngirukooi alorot, kibungata talachasi ibore daang ni anapit. Kimiekis kaneni ekot akitu.

³¹Sodi kitoru emuron a akai a Akuj lorot ngolo elosi, ani ingolikini itwaan ngini, abu ngesi kinacha kitor wache.

³²Itwaan a ekitela a Lawi dang lo arai ekasuban etich Alokai a Akuj, abu kitoru lorot ngolo loger a loche, ani ingolikini itwaan eperi alorot, sodi kinacha kitor wache.

³³Nakaneni bu Esamariat iwapit erot ngolo dio kingolik ngesi itwaan ngini eperi alorot, abu kisieni lokojokon.

³⁴Tolot Esamariat diyete itwaan ngini, abu kidokanak akimiet ta emuna najemei keng, sodi toen. Kidokok ngesi itwaan ngini losikiria keng tanang kai a ngipeyok, kitan ngesi itwaan ngini kaneni.

³⁵ Ataparach nache, tolem ngesi ngadinari[4] ngaarei, nak itwaan ni aweikinit akai a ngipeyok tama, ‘Kirichak itwaan en, kitan, ani abonguni ayong katachakini ayong iyong ibore daang ni enyami ngesi.’ ”

³⁶Tolimok Yesu ngesi tama, “Esibit tokona iyong alotunga aluuni kalu, ngae edodiuni dir atamar arai ekidunyet a itwaan ani ebungato ngirukooi?”

³⁷Tolim eketataman a etal tama, “Erai ngolo edodiuni akisienut anikeng.” Tolimok Yesu ngesi tama, “Kape iyong dang tosub na ikote nguna.”

³⁸Na alooso Yesu ka ngirukitos keng, kitoro lore eche lo etepeyonea ngesi aberu na anyaritae Marita.

³⁹Ayei Marita nakaatokeng na anyaritae Mariam na ebooyi alodiye ngakejen a Ekapolon Yesi iirakinit ngakiro na etatami ngesi.

⁴⁰ Nakaneni kisileleny Marita etich lokaalan asubi, sodi tolot ni ayakasi luche tama, “Ekapolon, nyikironikinit iyong nikaisikinea ayong nakaatokang asubi etich bon a? Tolimok iyong ngesi bu kengarak ayong!”

⁴¹Tolimok Ekapolon ngesi tama, “Marita yaa! Ichana iyong, nabo iriaba kotere ngakiro nakokaalak,

⁴²nakaneni akiroit apei bon ngesi esakio. Aseu Mariam ibore ni itemokino, nabo nyelemario anikeng.”